Usolwelo 12 - Mukanda Wa Zambi 1970

Pwo ni ngongo munene, dragau

¹ Chilayi chinene yichisoloka kwilu: pwo yazala tangwa ngwe hina, yabwa ni kakweji kushi lia molu jenyi, ni chipangula cha matongonoshi kumi ni aali ha mutwe wenyi.

² Te habwa hakamwihi ni kusema mwana, kanatete ni kubinda chikolo ni yikola ya kusema.

³ Chilayi chikwo yichisoloka kwilu: umwe ngongo munene muchila, dragau, yasoloka ni mitwe shimbiali ni mbinga kumi. Ha mitwe yenyi yabwa ni yipangula shimbiali.

⁴ Te anakoko Chihanda chimuwika cha ku yihanda yitatu ya matongonoshi ni muchila wenyi, ni kwambila hashi. Kanamana ku meso ja pwo yoze unambe kusema mwana, hanga alie mwanenyi muze masemuka.

⁵ Mba pwo yoze yasema mwana lunga, yoze makayula akwa hashi eswe ni lukanda wa utale. Alioze yaanda mwe mwanenyi, yaamutwala kuli Zambi ni ku chitwamo chenyi cha wanangana.

⁶ Pwo yoze yachinyina mu puya ndoo kuma kuze amululikilile Zambi, hanga akamuhokele ko kanunu ni kulakaji jaali ni makumi asambano a matangwa.

⁷ Hohene mwabwile jita mwilu! Mba Mikele ni tunganda twenyi yaasa jita ni ngongo munene, dragau, neye yasa no jita.

⁸ Alioze Mikele yakumba dragau. Kamutayijile ko nawa kusala mwilu hamwe ni tunganda twenyi.

⁹ Ngongo yoze munene yaamumbila haze. Kali kapela mukulu, yoze alukile ngwo, Sakwonga, yoze wakwonga atu eswe. Yaamumbila hashi hamwe ni tunganda twenyi eswe.

¹⁰ Mba yingwivwa liji linene mwilu, ngwo: “Haliabwila ulamwino wa Zambi yetu hiweza! Zambi halweza ndundo jenyi ngwe Mwanangana! Haliabwila Kristu yenyi halweza chiyulo chenyi! Mumu yoze wabwile ni kusuma akwetu akwa Kristu ufuku ni mwalwa, haamunyasa hashi.

¹¹ Akwetu yaamukumba, mumu ha manyinga ja Mwana Panga, ni mumu ha liji lia shindakenyo yo. Yaatayiza kukunjika mwono wo ku kufwa.

¹² Kashika yena lilu, ni yenu waze nwatwama mo, wahililenu! Alioze lamba hashi ni mu kalunga lwiji! Mumu Sakwonga hahulumuka kuli yenu. Kali ni ufwatulo, mumu kananyingika shimbu likepe liamusala.”

¹³ Muze ngongo munene, dragau, hamona ngwenyi, haamunyasa hashi, yabutuka kukaula pwo yoze hasema mwana lunga.

¹⁴ Alioze Zambi yahana mapulwa aali a tela kuli pwo yoze ha kuhumuka ndoo kuma lienyi mu puya, kuze maakamuhoka miaka yitatu ni chipinji, kuze kapela kahashile kumuheta.

¹⁵ Mba kapela yatuhwisa meya mu kanwa lienyi kunyima lia pwo ngwe lwiji munene, hanga pwo yoze atoke mu meya.

¹⁶ Alioze hashi yihakwasa pwo, yihabakula kanwa liaho, yihamina meya waze atuhukile mu kanwa lia ngongo munene.

¹⁷ Mwe dragau yevwila pwo ufwatulo mba yaya ni kwasa jita ni atu akwo a ku Chikota chenyi, waze akufunga Shimbi ja Zambi, waze akushindakenya hakutwala kuli Yesu.

¹⁸ Mba mwe ngongo munene, dragau, yamana ku mbumbulu ya kalunga lwiji.