Usolwelo 11 - Mukanda Wa Zambi 1970

Yela aali

¹ Mba yapa lumbungu wakweseka nenyi, kalifwa ngwe mulumbu. Yangwamba ngwenyi: “Katuka, weseke zuwo lia Zambi ni chilumbilo, walule atu waze akuwayila mo.

² Alioze hichika yiize ya haze lia zuwo lia Zambi. Kanda uyeseka, mumu hingunayihane kuli waze hi Ayuda ko, waze maakaliata Limbo ha Chijila tukweji makumi awana ni aali.

³ Mungukatuma yela jami aali, kaanazala tuku. Maakahanjika munanyi ha matangwa waze kanunu ni kulakaji jaali ni makumi asambano.”

⁴ Yela waze aali kaali mitondo yaali ya Olive ni yikwachilo yaali ya ndeya yize yakumana ku meso ja Mwene wa hashi.

⁵ Nyi umwe makazanga kwalinga chibi, kahia mukatuhuka mu kanwa lio, ni kushiha akwa kole jo. Yoze mazanga kwabinjisa, neye makafwa chizechene.

⁶ Kaali ni chiyulo cha kwajila lilu hanga vula kechi kanoka muze akuhanjeka munanyi. Kaali ni chiyulo cha kwalumuna meya abwe manyinga. Kaali ni chiyulo cha kunyasa lamba heka ni heka hano hashi, nyi kaanazange.

⁷ Muze haamanununa shindakenyo yo, ngongo munene makatuhuka muma mwajotoka, makasa no jita, makaakumba ni kwashiha.

⁸ Mijimba yo muyikasala mu tapalo lia limbo linene kuze ahachilile Mwene wo ha kulusu. Limbo lize kaakulitakenya ni Sodome hanji Egiptu.

⁹ Mavungu eswe, ni akwa maliji eswe, ni yifuchi yeswe maakatala mijimba yo matangwa atatu ni Chipinji. Keechi katayiza kwafunda.

¹⁰ Akwa hashi maakawahilila ha kufwa cha yela waze aali. Kumaakalinga yiteleka, maakaliaha yawana, mumu akwa munanyi waze amwesene akwa hashi lamba linji.

¹¹ Kulutwe lia matangwa atatu ni Chipinji, mwiku wa mwono wejile maha Zambi, yiwanjila, mba yaakatuka. Eswe waze aamwene yeevwa woma unji.

¹² Mba akwa munanyi waze aali a Zambi yeevwa liji linene mwilu ngwo: “Zezukenu nwize kuno!” Yaazezuka mwilu mu lelwa, muze te akwa kole jo anaatale.

¹³ Ha shimbu lizeliene yikubwa munyiko unene hashi. Chihanda chimuwika cha ku yihanda kumi ya limbo yichibuzuka. Tununu shimbiali twa atu yaafwa ni munyiko wa hashi. Akwo yeevwa woma unji, yaahalisa Zambi mwilu.

¹⁴ Lamba lia muchaali hiliabalika, alioze nulimuke! Lamba lia muchitatu muliza nikawashi.

Chitavwi cha muchishimbiali

¹⁵ Hohene kanganda ka mwilu wa muchishimbiali yemba chitavwi. Mba yingwivwa maliji anene ngwo: “Wanangana wa hashi hiwabwa wanangana wa Mwene wetu ni Kristu yenyi. Mwenawo makayula ku miaka yeswe ni miaka yeswe!”

¹⁶ Makulwana makumi aali ni awana, waze te atwama ha yitwamo yo ya wanangana ku meso ja Zambi, yaafulamana hashi, yaawayila Zambi.

¹⁷ Ngwo: “Mwene Zambi, Mukwa Ndundo Jeswe, yena hiuli, ni wabwile! Tunakusakwila mumu hiunalingi ni ndundo je jinji. Hiwabutuka kuyula!

¹⁸ Atu waze hi akwa Kristu ko atenukine, mumu tangwa lia kulweza utenu we hilieza, lize muukabatwila afu. Tangwa hiliaheta lize muuhana chawana kuli tuvumbi twe, akwa munanyi, ni kuli atu je eswe, anene ni akepe, kuli waze eswe akuvwila jina lie woma. Tangwa hilieza lize muukonona waze akwonona hashi!”

¹⁹ Zuwo lia Zambi mwilu yiliazuluka, mba mushete uze uli ni Usendo wa Zambi yiusoloka. Yikubwa mihenyo, ni kukulunguza cha vula, ni zungo likwo, ni kunyika cha hashi, ni chiwe chinji.