Usolwelo 10 - Mukanda Wa Zambi 1970

Kanganda ka mwilu ni mukanda ukepe

¹ Mba yingumona kanganda ka mwilu mukwo wa ndundo, kanahulumuka mwilu. Kanazala lelwa, kongolo kanalilimbi ku mutwe wenyi, meso jenyi ngwe tangwa, molu jenyi ngwe manguji a kahia.

² Mu kwoko lienyi te kanakwata kamukanda kakepe ka kubakula. Yahata kulu lienyi lia chindume ha kalunga lwiji, kulu lienyi lia chimeso hashi.

³ Yakololoka ni liji linene ngwe chize akubwoza tambwe. Muze hakololoka, vula yakulunguza yisuho shimbiali.

⁴ Muze kukulunguza hichahola, nambile kusoneka. Alioze yingwivwa liji mwilu liangwambile ngwo: “Sweka maliji waze a kukulunguza, kanda waasoneka!”

⁵ Mba kanganda ka mwilu yoze namwene unamana kulu limuwika ha kalunga lwiji, kulu likwo hashi, yolola kwoko lienyi lia chindume kwilu.

⁶ Mba yalishinga ni Zambi yoze watwama ku miaka yeswe ni miaka yeswe, yoze watangile lilu ni yize yeswe yilimo, ni hashi ni yize yeswe yiliho, ni kalunga lwiji ni yize yeswe yilimo. Kanganda ka mwilu yamba ngwenyi: “Kutuchi kushimbula nawa!

⁷ Alioze, muze kanganda wa muchishimbiali memba chitavwi, mba Zambi mamanununa chijimbikilo chenyi, ngwe chize anyingikishine tuvumbi twenyi, akwa munanyi.”

⁸ Mba liji lize nevwile mwilu, yilingwamba nawa ngwo: “Yako utambule kamukanda kaze kanabakuka mu kwoko lia kanganda ka mwilu yoze unamana kulu limuwika ha lwiji kulu likwo hashi.”

⁹ Yinguya kuli kanganda ka mwilu, yingumwita kamukanda kaze. Iye yamba ngwenyi: “Katambule, ukalie. Mu jimo lie mukasasa, alioze mu kanwa lie mukayema ngwe wuchi.”

¹⁰ Yingutambula kamukanda ku kwoko lienyi, yingukalia. Mu kanwa liami yikayema ngwe wuchi, alioze muze hinakaminya, yikasasa mu jimo liami.

¹¹ Mba yangwamba ngwenyi: “Chakutamba kuhanjika munanyi hakutwala kuli atu anji, ni mavungu, ni maliji, ni mianangana.”