Usolwelo 1 - Mukanda Wa Zambi 1970

Chikuma chize Yoano asonekenene mukanda uno

¹ Mukanda uno unalumbununa yuma yize Yesu Kristu angusolwelele yami Yoano. Zambi yayilweza Yesu hanga alweze tuvumbi twenyi yuma yize muyikeza kulutwe ha shimbu likepe. Kristu yatuma kanganda kenyi ha kungunyingikisa yo.

² Yami nguli chela cha yuma yize Zambi ambile ni Yesu Kristu ashindakenyene, mumu yami mwene nayimwene.

³ Kawaha yoze wakutanga mukanda uno. Kaawaha waze akwivwa maliji a munanyi a mukanda uno, ni waze akwononokena yize yinasonewa mo! Mumu mwaka uze yuma yize yeswe muyikamanunuka hiwakundama.

Yoano yameneka Yikungulwila shimbiali

^4-5 Yami Yoano, ngunameneka Yikungulwila shimbiali ya mu chifuchi cha Asia: Zambi yoze kwali, yoze wabwile, yoze makabwa, ni Mwiku shimbiali uze uli kulutwe lia chitwamo chenyi cha wanangana, ni Yesu Kristu chela wakushishika, Mwana mutangu kusemuka, mutangu kuhinduka, mukwa kuyula mianangana a hashi, anulweze utu ni anwehe uhwimino. Yesu Kristu kakutuzanga. Ku kufwa chenyi hanatulamwina ku milonga yetu,

⁶ Hanatupwisa mahako a Wanangana ha kulingila Tato Zambi. Uhenya ni ndundo ya Yesu Kristu yisoloke ku miaka yeswe! Chibwe kama Chenacho.

⁷ Talenu, kaneza mu malelwa! Mutu mweswe makamumona, chibwe waze amutuwile. Mavungu eswe a hashi maakalila mbimbi mumu hali iye. Ewa, Chenacho muchikabwa!

⁸ Mwene Zambi, Mukwa Ndundo Jeswe, yoze kwali, yoze wabwile, yoze makeza, kanambe ngwenyi: “Yami nguli Alfa ni Omega.”

Yoano yamona Usolwelo wa Kristu

⁹ Yami, mukwenu Yoano, mu kulinunga ni Yesu nakumona lamba hamwe ni yenu. Tuli mu Wanangana wenyi, yetu eswe twakulihumikiza mu lamba. Haananguse mu tungu lize akuluka ngwo, Patmu, mumu te nakulongesa maliji a Zambi ni umwenemwene uze angulwezele Yesu.

¹⁰ Ha tangwa lia Mwene Yesu, Mwiku wa Linanga wanguyulile, mba yingwivwa liji linene kunyima liami ngwe lia chitavwi,

¹¹ ngwenyi: “Yize unamono, yisoneke mu mukanda. Ukautume ku Yikungulwila yino shimbiali: Efesu, ni Smirna, ni Pergamu, ni Tiatira, ni Sardu, ni Filadelfia, ni Laodisea.”

¹² Yingutewuluka hanga ngutale yoze te unanguhanjikisa. Mba yingumona yikwachilo shimbiali ya oru, ha yize akunangika ndeya.

¹³ Mukachi kayo te munamana umwe walifwa ni Mwana Mutu, kanazala hina lia lubula ndoo ku yiliato ni muya wa oru ha tulo yenyi.

¹⁴ Kambu jenyi te jitoma kuhiana ngwe ngona ja mapanga, hanji ngwe chiwe (neige), meso jenyi te kaanalekwoka ngwe mulengi wa kahia.

¹⁵ Molu jenyi yahenya kuhiana ngwe unengu uze wakusayisa mu jiko lia kahia ni kuuhenyesa. Liji lienyi ngwe mahuhwa.

¹⁶ Te kanakwata matongonoshi shimbiali mu kwoko lienyi lia chindume, ni mukwale wambuka yiutuhuka mu kanwa lienyi. Meso jenyi yabeyima ngwe tangwa ha muchima.

¹⁷ Muze namumwene, yingufulamana ku molu jenyi ngwe mufu. Yangunangika kwoko lienyi lia chindume nikwamba ngwenyi: “Kanda wivwa woma! Nguli mwe mutangu ni mwe kasula songo.

¹⁸ Nguli mukwa mwono. Nafwile, alioze tala, haliabwila nguli ni mwono ndoo ku miaka yeswe ni miaka yeswe. Ngunayulu kufwa. Ngunayulu nawa chifuchi cha waze haanafu.

¹⁹ Soneka yeswe yize unamono, ni yize ya haliabwila, ni yize muyikeza kulutwe.

²⁰ Ulumbunwiso wa Chijimbikilo cha matongonoshi shimbiali waze hiwamona ha kwoko liami lia chindume, ni yikwachilo shimbiali ya oru ha yize akunangika ndeya, wenau au: matongonoshi shimbiali e tunganda a mwilu a Yikungulwila shimbiali, yikwachilo shimbiali ye Yikungulwila shimbiali.”