Ubutukilo 9 - Mukanda Wa Zambi 1970

¹ Zambi yawahisa Noa ni ana jenyi a malunga ngwenyi: “Semenu nuliokese, nukazalise hashi heswe.

² Tushitu ni tujila ni yishi, eswe maakanuvwila woma. Eswe munukaayula.

³ Haliabwila nanwaha tushitu eswe ha kulia, ngwe chize nanuhele mafwo eka ni eka a wisu.

⁴ Shina Chuma chimuwika kunwahashile kulia, kashitu ni manyinga jenyi, mumu mwono uli mu manyinga.

⁵ Nyi mutu mashiha mukwo, yami mungukala yoze hafwa. Mungukala mutu mweswe yoze maashiha kuli kashitu.

⁶ Yoze mashiha mukwo, neye maakamushiha kuli mukwo weka, mumu Zambi yatanga mutu ni kulifwa nenyi.

⁷ “Yenu Semenu nuliokese, nukalumbame hashi heswe.”

⁸ Mba Zambi yaambila ngwenyi:

⁹ “Yami ngunakolesa Usendo ni yenu ni vungu lienu lia kulutwe.

¹⁰ Ngunakolesa Usendo ni eswe waze ali hamwe ni yenu: ni tujila, ni yimuna, ni tushitu a mu yambu, kulumbunuka eswe waze atuhukile mu ulungu.

¹¹ Ngunakolesa Usendo ni yenu ni maliji wano ngwami: Eswe waze akwete mwono keechi kafwa nawa ni sanga lia meya. Ndoo ku miaka yeswe sanga lia meya kulichi kwonona nawa akwa hashi.

^12-13 Ngunase kongolo yami mu lelwa ha kulweza yisemuko yeswe Usendo uze hinakolesa ni yenu ni tushitu eswe. Chinyingi chino muchibwa chilweza cha Usendo uze hinakolesa ni eswe waze ali hano hashi.

¹⁴ Lieswe tangwa lize mungusolola malelwa kwilu, nyi kongolo wamoneka,

^15-16 mungwiwuluka Usendo uze hinakolesa ni yenu ni tushitu eswe ku miaka yeswe ngwami, sanga lia meya kulichi kwonona nawa eswe waze atwama hashi.

¹⁷ Chino che chinyingi chize hinasa mumu hali eswe waze akwete mwono hano hashi.”

Noa ni ana jenyi a malunga

¹⁸ Wano e ana ja Noa a malunga waze atuhukile mu ulungu: Sheme, ni Hame, ni Jafete. Hame mwe tato ya Kanana.

¹⁹ Ana wano atatu a Noa e abwile tushakulu twa akwa hashi eswe.

²⁰ Noa mwe mutangu kulima mitondo ya vinyu.

²¹ Yanda yimwe vinyu, yanwa, yazengewa, yabomba uselesele mu zuwo lienyi lia makubu.

²² Muze Hame, tato ya Kanana, hamona uselesele wa tato, yaya ni kulweza ayayo.

²³ Mba Sheme ni Jafete yaanda hina, yaalikika lio ha yipaya. Yaaya unyimenyime ndoo mu zuwo, mba yaafuka tato hina lize. Yaatalikisa meso jo ku tenga, kaamwene ko uselesele wa tato.

²⁴ Noa, muze vinyu hiyamubatwoka, yahinduka, yevwa chize mwanenyi wa kanuke hamulinga,

²⁵ yamba ngwenyi: “Kanana namushinga, kumakabwa ndungo ya ayayo.

²⁶ Mwene Zambi ya Sheme afumane. Kanana kumakabwa ndungo ya Sheme.

²⁷ Zambi okese Jafete. Vungu lienyi akatwame hamwe ni vungu lia Sheme. Kanana makabwa ndungo ya Jafete.”

²⁸ Muze sanga lia meya hilioma, Noa yatwama ni mwono miaka yikwo 350.

²⁹ Mba muze habwa ni miaka 950, Noa yafwa kwenyi.