Ubutukilo 8 - Mukanda Wa Zambi 1970

Kuhuwa cha sanga lia meya

¹ Mba Zambi yewuluka Noa ni tushitu eswe waze abwile hamwe nenyi mu ulungu, yabalikisa fuji helu lia meya, mba meya yaabutuka kuhuwa.

² Zambi yajika mafuji a jondo, yakanjisa vula mwilu, mba vula yabatuka.

³ Meya yaahuwa hakepe hakepe. Muze matangwa 150 haabalika, meya yooma liakulu.

⁴ Mba ha tangwa kumi ni lia muchishimbiali lia kakweji wa muchishimbiali ulungu yiusakaminya ha umwe mbundu wa ku milundu ya Ararate.

⁵ Meya yaaya lume nikuhuwa, mba ha tangwa litangu lia kakweji wa muchikumi masongo ja milundu yaabutuka kusoloka.

⁶ Muze matangwa makumi awana haabalika Noa yazulula tupenda a ulungu,

⁷ yatuhwisa chikwakwalo, neye yendangana mu tetela ndoo ni muze meya omine hashi.

⁸ Mwabwamuze Noa yatuma katele hanga anyingike nyi meya haahuwa hashi nyi ka.

⁹ Alioze ndoo ni tangwa lize meya te achili hashi heswe. Kashika katele kamwene homa haze mabwila, yahiluka. Noa yolola kwoko yamukwata, yamunjisa mu ulungu.

¹⁰ Yashimbwila nawa matangwa akwo shimbiali, mba yatuma nawa katele.

¹¹ Neye yahiluka chingoloshi, kuma te kali ni lifwo lia mutondo wa olive lia wisu ku mivumbo yenyi. Mba Noa yanyingika ngwenyi, kuma hashi meya haahuwa.

¹² Yashimbwila nawa matangwa akwo shimbiali, mba yatuhwisa nawa katele. Neye yaya, alioze chisuho chino kahilukile ko nawa.

¹³ Muze Noa habwa ni miaka 601, ha tangwa litangu lia kakweji mutangu, meya eswe yooma hashi. Noa yafukula ulungu, yatala hashi, yamona ngwenyi hashi heswe hihoma chau.

¹⁴ Ha tangwa makumi aali ni lia muchishimbiali lia kakweji wa muchaali hashi heswe yihoma chau.

¹⁵ Zambi yambila Noa ngwenyi:

¹⁶ “Yena ni pwo lie, ni ana je ni mapwo jo, tuhukenu mu ulungu.

¹⁷ Tuhwisa nawa tushitu eswe, ni tujila, hanga akaseme akaliokese hashi heswe.”

¹⁸ Mba Noa ni pwo lienyi, ni ana jenyi ni mapwo jo, yaatuhuka mu ulungu,

¹⁹ ni tushitu eswe ni tujila eswe yaatuhuka mu ulungu mu mikana yo.

Noa yalambula milambu kuli Zambi

²⁰ Hohene Noa yatunga chilumbilo cha Mwene Zambi. Tushitu ni tujila waze atela kulambula, yanda umuwika umuwika, yoocha ha chilumbilo, yaawema bwililii.

²¹ Muze Mwene Zambi hevwa lupembo mubema wa mulambu uze, yamba ngwenyi: “Hikwahwa, chichi kushinga nawa hashi hakutwala ku yize akulinga atu. Ngunanyingika ngwami, kuma atu chize ku wanuke wo, manyonga jo kaali lume abi. Eswe waze natangile, akwete mwono, chichi kwonona nawa ngwe chize hinalinga.

²² Matangwa eswe hashi muhanyongonoka, mwaka wa kukuwa ni mwaka wa kuhela, chishika ni chivukuminya, lwiza ni lushiho mwalwa ni ufuku, kuyichi kahwa nichimwe.”