Ubutukilo 7 - Mukanda Wa Zambi 1970

Zambi yatuma sanga lia meya hashi

¹ Mwene Zambi yambila Noa ngwenyi: “Yena ni akwa zuwo lie, yenu eswe nunjile mu ulungu, mumu hinamona ngwami, hashi heswe shina yena lume mwe mukwa ululi.

² Tushitu waze atela kulia ni kungulambula yami Mwene Zambi, wanda aali aali yisuho shimbiali, kuji ni chihwo. Alioze waze hi abema ko ni kulia wanda shina aali aali, kuji ni chihwo.

³ Wanda nawa tujila a milali yeswe aali aali, yisuho shimbiali, kuji ni chihwo. Ulinga kanawa ha kufunga mwono wa tushitu ni tujila a milali yeswe hanga akoke hashi heswe.

⁴ Kwasala matangwa shimbiali, mba mungunokesa vula hashi. Muyikanoka matangwa makumi awana ha kwonona eswe waze akwete mwono, waze natangile.”

⁵ Mba Noa yalinga yeswe yize amwambile Mwene Zambi.

⁶ Noa te habwa ni miaka 600 muze sanga lia meya liejile hashi.

⁷ Chenacho Noa anjilile mu ulungu, ni pwo lienyi, ni ana jenyi a malunga ni mapwo jo, ha kuchina sanga lia meya.

⁸ Tushitu ni tujila a milali yeswe anatela kulambula kuli Zambi ni kulia, ni waze hi abema ko ni kulia, anene anene ni akepe akepe, kuji ni chihwo,

⁹ ayo eswe yaanjila mu ulungu hamwe ni Noa, ngwe chize amulwezele kuli Zambi.

¹⁰ Ha kuhwa cha matangwa shimbiali sanga lia meya yiliza hashi.

¹¹ Muze te Noa habwa ni miaka 600, ha tangwa kumi ni lia muchishimbiali lia kakweji wa muchaali, ha tangwa lizeliene mafuji eswe a njondo yabakuka, ni mwilu yimwazuluka, yikunoka vula munji.

¹² Vula yanoka hashi matangwa makumi awana.

¹³ Ha tangwa lizeliene Noa, ni pwo lienyi, ni ana jenyi atatu, Sheme ni Hame ni Jafete, ni mapwo jo yaanjila mu ulungu.

¹⁴ Mba milali yeswe ya tushitu a ha chihunda ni a mu yambu, anene anene ni akepe akepe, ni milali yeswe ya tujila,

¹⁵ kuji ni chihwo, yaanjila mu ulungu hamwe ni Noa,

¹⁶ ngwe chize amulwezele kuli Zambi. Mba Mwene Zambi yajila ulungu.

¹⁷ Vula munji yanoka hashi matangwa makumi awana, hashi yihabwa meya anji, mba ulungu yiuzunduka.

¹⁸ Meya yooka, mba ulungu yiubutuka kwendangana ha meya.

¹⁹ Meya yooka ndoo milundu yisuku yeswe yiijimuka.

²⁰ Meya yooka kuhiana helu lia milundu ha kwalula metro shimbiali.

^21-22 Eswe waze te akwete mwono hano hashi: tujila, ni yimuna, ni tushitu a mu yambu, ni atu, ayo eswe yaafwa.

²³ Mwene Zambi yashiha eswe waze te akwete mwono hashi: atu ni tushitu, ni tujila; yikusala shina Noa ni ana jenyi ni tushitu waze abwile no mu ulungu.

²⁴ Sanga lia meya yilibwa hashi matangwa 150.