Ubutukilo 49 - Mukanda Wa Zambi 1970

Yakoba yawahisa ana jenyi kumi ni aali

¹ Yakoba yatambika ana jenyi a malunga ngwenyi: “Yenu eswe kungulukenu kuno, hanga ngunulweze yize muyikanuwana kulutwe.

² “Tweyenu ana ja Yakoba. Banjikenu yami tatenu Israele.

³ “Rubene, yena uli mwe kabula jimo, uli tachi jami, uli mwanami mutangu wa ukulwana wami, uli mukwa kulengumuka ni mukwa tachi kuhiana ana jami akwo.

⁴ Yena uli ngwe lundunjila wa mahuhwa a meya alioze kuuchi kubwa mulemu Wahiana, mumu walimwene ni pwo lia yami tatenu, yiulelesa muhela wami.

⁵ “Simeone ni Levi kaali asongo ni mutu, kaakushiha atu ni mata jo.

⁶ Chichi kanjila mu milonga yo ya kuhengama, chichi kanjila mu punga jo, mumu mu ufwatulo wo ashihile atu, amakwine molu ja ngombe a makuji mu kuheha cho.

⁷ Zambi ashinge utenu wo, mumu woka naye, ni ufwatulo wo, mumu uli wa uswiyi. Mungukaamwangina mu chifuchi cha Yakoba, mungukaamwangina hakachi ka Aisraele.

⁸ “Yuda, akwenu maabwa nikukuchichimieka, muubwa ni kwoka akwa kole ha miliwu yo, akwenu maabwa nikukuhetamina.

⁹ Yuda kali ngwe mwevu wa tambwe, kakushiha nikuhiluka mu chivwenge chenyi. Ngwe tambwe wa kuji kakuutama moko akwolola, ngwe tambwe wa chihwo, iya mahasa kumuhindwisa?

¹⁰ Lukanda wa wanangana kechi akatuka kuli Yuda, mbwechi ya mukwa kuyula keechi kayichiza ku vungu lienyi ndoo ni kuze mwenya yo makasoloka, yoze atu maakononokena.

¹¹ Mba mihuko ya vinyu muyikabwa yinji kuhiana, kashika kechi kevwa woma ha kukashila ko chimbulu chenyi. Makakosela mahina jenyi mu vinyu, kazaku kenyi mu vinyu yichila.

¹² Meso jenyi maakachila kuhiana vinyu, mazo jenyi maakatoma kuhiana yamwa.

¹³ “Zabulone makatwama ku mbumbulu ya kalunga lwiji, kwe mukukabwa zuzu lia maulungu. Chifuchi chenyi muchikaheta ndoo ku limbo lia Sidone.

¹⁴ “Isakare kali ngwe chimbulu wa tachi, yoze wakubomba mukachi ka yiteli yenyi.

¹⁵ Muze akumona ngwenyi, homa hano hali habema, ni chifuchi chili chibema, mba molola nyima yenyi ha kumbata yilemu, ni kubwa ndungo wa kuhondangana milimo.

¹⁶ “Dane makabatwila atu jenyi, makabwa ngwe mavungu akwo ja Aisraele.

¹⁷ Dane makabwa ngwe kapela mu jila, ngwe yenge ku sesa lia jila, yoze wakusuma kavwalu ku kasendengele, mba mwenya kavwalu maholoka hashi.

¹⁸ “Aa Mwene Zambi, ngunakushimbwila ungulamwine kama.

¹⁹ “Gade, eji maakeseka kumwiya yuma yenyi, alioze iye makabwa nikwapekwisa minanga.

²⁰ “Ashere, chifuchi chenyi muchikabwa ni yakulia yibema, yakulia yize chibwe mianangana mayizanga.

²¹ “Naftali kali ngwe kai yoze hatusuka, kakusema ana abema.

²² “Josefe kali ngwe chimbulu wa mu yambu, ngwe mwana wa chimbulu hehi ni meya,

²³ Akwa kole kaakufupa kumushiha, kaakumuhanga ni mata jo akwasa.

²⁴ Alioze iye kali mukwa tonga, Zambi ya Yakoba, Mukwa Ndundo Jeswe, mwe Kafunga ka Israele, kakukolesa moko jenyi.

²⁵ Mwe Zambi ya tatenu kakukukwasa. Zambi Mukwa Ndundo Jeswe kakukuwahisa ni yiwape ya vula kwilu, ni yiwape ya meya kushi lia mavu, ni yiwape ya ana ni yimuna,

²⁶ ni yiwape ya yakulia ni yitemo, ni yiwape ya milundu yikulu, ni yiwape ya mindundena ya miaka yeswe. Yiwape yino yeswe yibwe niye, yena yoze ahandunwine kuli ayayo.

²⁷ “Benjamine kali kangunga musasu. Ha chichamene kakulia yifwo yenyi yize akushiha, ha chingoloshi machacha yifwo yenyi yize akwatanga.”

²⁸ Wano kaali mavungu kumi ni aali a Israele, ni yuma yize aalwezele kuli tato. Yaawahisa mutu ni mutu nikulita ni yiwape yize yinamutela.

Yakoba yafwa, yaamufunda

²⁹ Mba Yakoba yashika ana jenyi ngwenyi: “Hasala hakepe ngufwe kwami, hanga nguye ngukawane akaka waze afwile kulu. Nukangufunda hamwe ni akaka mu chivwenge chize chili mu munda wa Efrone, wa ku vungu lia Ahite.

³⁰ Chivwenge chize chili ku kanda ya Makapela, ku sali lia chivumbuko ku limbo lia Mamre, mu chifuchi cha Kanana. Kaka Abrahama mwe walanjile chivwenge ni tungu lia Efrone, wa ku vungu lia Ahite, ha kubwa ni kufunda mo afu.

³¹ Kwenako afunjile kaka Abrahama ni pwo lienyi Sara, ni kakenu Isake ni pwo lienyi Rebeka, kwenako nawa nafunjile noko Leya.

³² Lie tungu ni che chivwenge chalio yaachilanda kuli Ahite.”

³³ Muze Yakoba hamanununa kushika ana jenyi, yasa molu jenyi ha muhela, yatandala, mba yafwa.