Ubutukilo 46 - Mukanda Wa Zambi 1970

Yakoba yaya ku Egiptu ni akwa jiko lienyi

¹ Israele yakasa yuma yenyi yeswe, mba yaya ku limbo lia Bersheba. Yalambwila ko Zambi ya tato Isake milambu.

² Ha ufuku Zambi yambila Israele mu chilota ngwenyi: “Yakoba, Yakoba!” Neye ngwenyi: “Ewa, mwane.”

³ Zambi ngwenyi: “Yami nguli Zambi, Zambi ya tatenu. Kanda wivwa woma ha kuya ku chifuchi cha Egiptu. Kwenako mungukakupwishila vungu linene.

⁴ Ngunayi ne ku Egiptu, ni mungwiza kuhilwisa nawa vungu lie kuno. Josefe makabwa hamwe ne muze muukafwa.”

⁵ Yakoba yakatuka ku Bersheba. Ana jenyi yaambata tato hamwe ni mapwo jo ni ana jo, ha matemba waze atumine mwanangana wa Egiptu.

⁶ Yaanda yimuna yo yeswe ni yuma yo yize abichile mu Kanana, yaaya ku Egiptu. Yakoba yanda akwa zuwo lienyi eswe,

⁷ ni ana jenyi a malunga ni a mapwo, ni ajikulu jenyi a malunga ni a mapwo.

^8-9 Wano e majina ja atu ja Yakoba waze ayile hamwe nenyi ku Egiptu. Mwanenyi mutangu Rubene hamwe ni ana jenyi a malunga: Hanoke, ni Palu, ni Hezrone, ni Karmi.

¹⁰ Simeone hamwe ni ana jenyi a malunga: Jemuele, ni Jamine, ni Ohade, ni Jakine, ni Zohare, ni Shaule, mwana wa umwe pwo wa Akanana.

¹¹ Levi ni ana jenyi a malunga: Gershone, ni Kohate, ni Merari.

¹² Yuda hamwe ni ana jenyi a malunga: Shela, ni Pereze, ni Zera, (alioze Ere ni Onane yaafwila mu Kanana). Ana ja Pereze a maluanga wano: Hezrone ni Hamule.

¹³ Isakare hamwe ni ana jenyi a malunga: Tola, ni Puwa, ni Jashube, ni Shimrone.

¹⁴ Zabulone hamwe ni ana jenyi a malunga: Serede, ni Elone, ni Jalile.

¹⁵ Wano e ana a malunga Leya asemene mu chifuchi cha Mesopotamia, yasema nawa mwana wa pwo Dina. Vungu lia Leya kwoka cho te makumi atatu ni atatu.

¹⁶ Gade hamwe ni ana jenyi a malunga: Zefone, ni Hagi, ni Shuni, ni Ezbone, ni Eri, ni Arode, ni Areli.

¹⁷ Ashere hamwe ni ana jenyi a malunga: Imna, ni Ishva, ni Ishvi, ni Beria, ni ndumbwo wa pwo Sera. Ana ja Beria a malunga wano: Hebere ni Malkiele.

¹⁸ Ku jimo lia Zilpa yikusemuka ana wano kumi ni asambano. (Zilpa te mwe mwana pwo yoze Labane ahanyine kuli mwanenyi Leya ha kumukwasa.)

¹⁹ Yakoba ni Rashele yasema ana aali a malunga: Josefe ni Benjamine.

²⁰ Ana a malunga waze asemene Josefe mu chifuchi cha Egiptu ni Asenate, mwana wa Potifera, hako wa Zambi wa ku limbo lia One, wano: Manase ni Efraime.

²¹ Ana ja Benjamine a malunga wano: Bela, ni Bekere, ni Ashbele, ni Gera, ni Namane, ni Ehi, ni Roshe, ni Mupime, ni Hupime, ni Arde.

²² Vungu lia Rashele eswe kwoka cho te kumi ni awana.

²³ Dane ni mwanenyi wa lunga Hushime.

²⁴ Naftali ni ana jenyi a malunga: Jazele, ni Guni, ni Jezere, ni Shileme.

²⁵ Atu wano shimbiali yaasemuka ku jimo lia Bila. (Bila te mwana pwo yoze Labane ahanyine kuli mwanenyi Rashele ha kumukwasa.)

²⁶ Ana ja Yakoba waze ayile ku Egiptu, kwoka cho eswe makumi asambano ni asambano, kuchiza ko mapwo jo.

²⁷ Josefe yasema ana aali a malunga mu Egiptu. Ha chino kwoka cha atu eswe a ku jimo lia Yakoba kuze ku Egiptu yaabwa atu makumi shimbiali.

Yakoba ni akwa jiko lienyi mu Egiptu

²⁸ Yakoba yatuma Yuda kulutwe ha kulweza Josefe aabatwize mu Goshene. Muze haaheta ku Goshene,

²⁹ Josefe yanyina ha temba lienyi, yaya ni kubatwiza tato ku Goshene. Ha kulimona nenyi, Josefe yamukakaminya, yalila shimbu lisuku.

³⁰ Israele yambila Josefe ngwenyi: “Haliabwila ngufwe lume, mumu hinakumona ni hinanyingika ngwami, kuma kuuli ni mwono.”

³¹ Mba Josefe yambila ayayo ni akwa jiko lia tato ngwenyi: “Ngunayi ni kulweza mwanangana ngwami: ‘Ayaya ni akwa jiko lia tata, waze te atwama ku Kanana, heeza.

³² Malunga, milimo yo kufunga yimuna. Heeza ni yimuna yo ni yuma yo yeswe.’

³³ Muze mwanangana manutambika ni kunuhula ngwenyi: ‘Milimo yenu yika?’

³⁴ Chanutamba kwamba ngwenu: ‘Mwanangana, chize ku ukweze wetu milimo yetu kufunga yimuna, ngwe chize te akulinga akaka.’ Nyi nwamba Chenacho mba munubwa nikutwama mu Goshene.” Chino Josefe yachamba mumu akwa Egiptu te keeshi kuzanga tufunga twa yimuna.