Ubutukilo 40 - Mukanda Wa Zambi 1970

Josefe yaula yilota ya funge a mu zuwo lia lamba

¹ Limwe tangwa mwata wa akwa kukela vinyu ni mwata wa akwa kwocha mbolo ya mwanangana wa mu chifuchi cha Egiptu, yaamuvulumuna.

² Mwe mwanangana yaavutwokela,

³ mba yaasa mu zuwo lia lamba lia mwata wa tujita, muze abwile Josefe.

⁴ Mwe mwata wa zuwo lia lamba yaakunjika mu moko ja Josefe ha kwafunga. No yaabwa funge matangwa anji.

⁵ Limwe tangwa, mu zuwo lia lamba, mwata wa akwa kukela vinyu ni mwata wa akwa kwocha mbolo yaalota yilota.

⁶ Chichamene muze Josefe heza ni kwameneka, yamona ngwenyi, kaali ni yinyengo.

⁷ Josefe yaahula ngwenyi: “Kuchi nuli ni yinyengo chichize musono?”

⁸ Ayo ngwo: “Twalotanga yilota, alioze mukwa kutulumbunwina yo wakuhi.” Josefe ngwenyi: “Zambi mwe wakulumbununa yilota. Ngwawilenu ye yilota yenu, nyi nunazange.”

^9-10 Mba mwata wa akwa kukela vinyu yamwawila chilota chenyi ngwenyi: “Mu chilota nalotanga kulutwe liami kuli mutondo wa vinyu, uli ni mitango yitatu. Yikusokoloka mafwo, yikutemuka yitemo, yikwima vinyu.

¹¹ Te ngunakwata musenge wa mwanangana mu moko, yingwanda vinyu, yinguyikamina mu musenge, mba yingumwaha wo mwanangana.”

¹² Josefe yamukumbulula ngwenyi: “Chilota che, ulumbunwiso wacho uno, mitango yize yitatu yili ngwe matangwa atatu.

¹³ Kwasala matangwa atatu hanga mwanangana akutuhwise mu zuwo lia lamba ni kukuhilwisa ku milimo ye. Mba muumwaha mwanangana musenge wa vinyu ngwe chize te wakumwaha hatangu, muze wabwile mwata wa akwa kukela vinyu.

¹⁴ Ungwiwuluka kama muze milonga ye muyiwaha. Unguvwile keke ungwambulule kuli mwanangana ha kungutuhwisa mu zuwo lino lia lamba.

¹⁵ Haanangwiyi mu chifuchi cha Ahebreu. Chibwe muno mu Egiptu, mu zuwo lino nguli mwe mwashili malaa, chalingile kwami chibi nichimwe.”

¹⁶ Mwata wa akwa kwocha mbolo, muze hamona ngwenyi, Josefe kalumbununa kanawa chilota chize, yamwamba ngwenyi: “Ni yami nawa chilota nalotanga. Te nguli ni mitonga yitatu ya mbolo ha mutwe.

¹⁷ Mwe mu mitonga mwabwanga mbolo jeka ni jeka ja mwanangana. Tujila yeeza ni kujilia.”

¹⁸ Josefe ngwenyi: “Chilota che ulumbunwiso wacho uno, mitonga yize yitatu yili ngwe matangwa atatu.

¹⁹ Kwasala matangwa atatu hanga mwanangana akutuhwise mu zuwo lia lamba ni kukusukika ha mutondo. Mba tujila meeza ni kukulia.”

²⁰ Ha tangwa lia muchitatu te lie tangwa lia kwiwuluka kusemuka cha mwanangana. Mwanangana yalinga chiteleka chinene, yatambika akwa lutwe eswe a mu wanangana wenyi. Yatuhwisa mwata wa akwa kukela vinyu ni mwata wa akwa kwocha mbolo mu zuwo lia lamba, yaatumbika ku meso ja akwa lutwe a mu wanangana wenyi.

²¹ Mba yahilwisa mwata wa akwa kukela vinyu ku mulimo wenyi utangu,

²² alioze yasukika mwata wa akwa kwocha mbolo. Yino yeswe yiilita ngwe chize alumbunwine Josefe.

²³ Alioze mwe mwata wa akwa kukela vinyu kewulukile ko Josefe, yamuvulama lume.