Ubutukilo 4 - Mukanda Wa Zambi 1970

Kene ni Abele

¹ Mba Samutu yalimona ni mukwo pwo, Namutu, neye yaka ufumba, yasema mwana wa lunga. Neye yamba ngwenyi: “Mwene Zambi hangukwasa, hinabwa ni mwana wa lunga.” Kashika yamuluka jina ngwenyi, Kene.

² Kulutwe yasema nawa mwana mukwo wa lunga, yamuluka jina ngwenyi, Abele. Abele milimo yenyi kufunga yimuna, Kene milimo yenyi kulima minda.

³ Muze matangwa amwe haabalika, Kene yanda mihuko ya mu munda wenyi, yayilambula kuli Mwene Zambi.

⁴ Abele neye yanda mwana mutangu wa umwe panga wa ku chendo chenyi, yamushiha, yanda yifwo yibema yahiana ni e maji jayo, yayilambula. Mwene Zambi yatayiza Abele ni mulambu wenyi,

⁵ alioze Kene yamumba nyima ni we mulambu wenyi. Kashika Kene yevwa ufwatulo, yanyakana ku meso.

⁶ Mba Mwene Zambi yahula Kene ngwenyi: “Ufwatulo waka? Mumu yika unanyakana ku meso?

⁷ Nyi kuwalinga kanawa, kachi kuwevwile kuwaha, nyi? Alioze mumu hiwalinga chibi, nyingika ngwe, shili yili ngwe kashitu wa chilianyi yoze unautama ku chikolo cha mbunge ye hanga akukwate. Shili yinambe kukuyula alioze sako tachi ha kuyikumba.”

⁸ Mba Kene yambila mwanakwo Abele ngwenyi: “Tuye ni kwendangana hakepe.” Muze haaheta mu munda, Kene yatumbukila mwanakwo, yamushiha.

⁹ Mwene Zambi yahula Kene ngwenyi: “Mwanakwenu kuli ali?” Kene ngwenyi: “Chanyingikine. Yami nguli kafunga ka mwanakwetu, nyi?”

¹⁰ Mwene Zambi ngwenyi: “Kuchi walinga? Banjika! Liji lia mwanakwenu mu mavu linakololoka kuli yami ha kumukafa.

¹¹ Kuwashingiwa ku mavu waze haanwa manyinga ja mwanakwenu muze wamushiha.

¹² Muze muulima hashi, yakulia kuyichi kwiza ho. Muubwa mukwa kuchinachina kanda chendanganyi hashi heswe.”

¹³ Mba Kene yakumbulula Mwene Zambi ngwenyi: “Mama yami! Lamba liami! Malaa! Chichikuhasa.

¹⁴ Musono hiwanguhuma ku mavu wano a chinuno ni ku meso je. Mungubwa mukwa kuchinachina kanda chendanganyi. Ha chino mweswawo mangutakana mangushiha lume.”

¹⁵ Alioze Mwene Zambi ngwenyi: “Ka. Mweswawo makushiha yena, atu maakukala yishuho shimbiali.” Kashika Mwene Zambi yamusa chinyingi, hanga niumwe kechi kamushiha muze makamutakana.

¹⁶ Kene yakatuka ku meso ja Mwene Zambi, yaya ni kutwama ku chivumbuko cha Edene mu chifuchi chize akuvuluka ngwo: Kwendangana.

Vungu lia Kene

¹⁷ Kene yalimona ni mukwo pwo, neye yaka ufumba, yasema mwana wa lunga, yamuluka jina ngwenyi, Enoke. Mba Kene yatunga limbo, yaliluka jina lia mwanenyi Enoke.

¹⁸ Enoke yasema mwana wa lunga, jina lienyi Irade. Irade yasema Mahujele. Mahujele yasema Matujele. Matujele yasema Lameke.

¹⁹ Lameke yambata mapwo aali, Ada ni Zila.

²⁰ Ada yasema Jabale, mwe kashakulu ka atu waze akubita yimuna ni waze akutwama mu mazuwo akutunga ni makubu.

²¹ Jina lia mwanakwo Jubale. Jubale mwe kashakulu ka waze te akwimba tulialia ni ndembo.

²² Zila neye yasema Tubale Kene te mwe kashakulu ka eswe waze akufula yikungo ya utale ni ya unengu. Tubale Kene te ndumbwenyi akwete, jina lienyi Nama.

²³ Mba mwe Lameke yalweza mapwo jenyi ngwenyi: “Yenu mapwo jami Ada ni Zila, banjikenu. Mutu nashiha mumu hangulemeka, mwana lunga, mumu hangusa chilonda.

²⁴ Nyi maakala Kene yisuho shimbiali, nyi mashiha yami, atu maangukala yisuho makumi shimbiali ni shimbiali.”

Sete ni mwanenyi Enoshe

²⁵ Mba Samutu yalimona nawa ni mukwo pwo, neye yasema mwana wa lunga. Pwo yamba ngwenyi: “Zambi hangwaha mwana mukwo ha kusalakana Abele yoze ashihile kuli Kene.” Kashika yamuluka ngwenyi, Sete.

²⁶ Sete yasema mwana wa lunga, yamuluka jina ngwenyi, Enoshe. Ha matangwa waze atu yaabutuka kuvuluka jina lia Mwene Zambi mu kuwayila cho.