Ubutukilo 39 - Mukanda Wa Zambi 1970

Josefe ni pwo lia Potifare

¹ Aishmaele yaatwala Josefe ku chifuchi cha Egiptu. Kwenako Potifare, Kaegiptu, mwata wa tujita waze akufunga zuwo lia mwanangana, yamulanda.

² Mwene Zambi yabwa hamwe ni Josefe, neye yayuka. Te kaatwama mu zuwo lia mwene wenyi.

³ Mwata wenyi yamona ngwenyi, Mwene Zambi kali hamwe ni Josefe ni kukukwasa Josefe ku yeswe yize te akulinga.

⁴ Potifare yawahilila ni Josefe ha milimo yize te akumulingila. Kashika yamupwisa mwata wa yuma yenyi ni zuwo lienyi lieswe.

⁵ Chize ku tangwa lize, Mwene Zambi yawahisa zuwo lia Potifare, ni yuma yenyi yeswe ya mu zuwo ni ya ku minda, ha mukunda wa Josefe.

⁶ Mba Potifare yakunjika yeswe mu moko jenyi, iye katalile ko nawa Chuma nichimwe shina kulia wika. Josefe te mwana lunga mubema ku mujimba ni ku meso.

⁷ Muze amwe matangwa haabalika, pwo lia mwata wenyi yabutuka kumusa meso. Mwe pwo yamwamba ngwenyi: “Tweya tulimone.”

⁸ Josefe yalituna ngwenyi: “Ka! Tala, mwata wami keshi kutala ku Chuma nichimwe mu zuwo muze nguli kuno. Yami nguli ni chiyulo ha kutala yuma yenyi yeswe.

⁹ Yami nguli ni chiyulo ngwe iye. Kangukanjishile ku Chuma nichimwe, shina yena pwo lienyi. Ngwe kuchi munguhasa kulinga yibi yibwa haha ni kuvulumuna ku meso ja Zambi?”

¹⁰ Tangwa ha tangwa mwe pwo te kakuhula Josefe ha kulimona nenyi, alioze iye te keshi kutayiza kwenyi.

¹¹ Limwe tangwa Josefe yaya Akulinga milimo yenyi mu zuwo. Te kumushi kavumbi mukwo niumwe.

¹² Mba pwo lia Potifare yakwata Josefe ku kazaku kenyi ngwenyi: “Tuye tulimone.” Alioze Josefe yatusuka mu moko jenyi, yatuhuka haze. Kazaku kenyi yasala mu moko ja pwo yoze.

¹³ Muze mwe pwo hamona ngwenyi, Josefe hahichika kazaku kenyi, hachina haze,

¹⁴ yatambika tuvumbi twenyi a mu zuwo, ngwenyi: “Haa, puu! Talenu, lunga liami hananeha Kahebreu yono mu zuwo lietu, alioze tala, kanatuhepwisa. Heza ni kunguhula mu chibatulo cha mu zuwo ngwenyi: ‘Tulimone’ alioze muze yami hinateta,

¹⁵ hahichika kazaku kenyi, hachinyina haze.”

¹⁶ Mwe pwo yasweka kazaku ka Josefe ndoo lunga lienyi yahiluka.

¹⁷ Mba yamwambulwila je sango ngwenyi: “Ndungo yono Kahebreu wanehene kuno, hanjila muchima lia zuwo liami, yangukwata.

¹⁸ Muze natetanga yachinyina haze, alioze kazaku kenyi yasala mu moko jami.”

¹⁹ Mwene wenyi yevwa ufwatulo kuhiana ha kwivwa yize yeswe Josefe halinga ni pwo lienyi.

²⁰ Yalweza atu ha kukwata Josefe. No yaamukwata, yaamusa mu zuwo lia lamba, muze te akusa funge ja mwanangana. Josefe yatwama ko,

²¹ alioze Mwene Zambi yabwa hamwe nenyi, yamuwahisa. Ha chino mwata wa zuwo lia lamba yawahilila nenyi.

²² Yamwaha Josefe chiyulo cha kutala funge eswe ni milimo yeswe ya mu zuwo lia lamba.

²³ Mwe mwata katalile ko nawa Chuma nichimwe chize akunjikile mu moko ja Josefe, mumu Mwene Zambi yabwa hamwe nenyi, ni yize yeswe te akulinga yiyiwaha.