Ubutukilo 38 - Mukanda Wa Zambi 1970

Yuda ni Tamare

¹ Ha matangwa waze Yuda yahichika anakwo yaya ni kutwama ni umwe lunga Hira mu limbo lia Adulame.

² Yamona ko umwe mwana pwo, jina lia tato te Shua, wa ku chifuchi cha Kanana. Yuda yamumbata.

³ Pwo yaka ufumba, yasema mwana wa lunga, yamuluka ngwenyi, Ere.

⁴ Pwo yaka nawa ufumba, yasema mwana wa lunga, yamuluka ngwenyi, Onane.

⁵ Yasema nawa mwana wa lunga, yamuluka ngwenyi, Shela. Muze Shela hasemuka, Yuda te kali mu chihunda cha Akzibe.

⁶ Yuda yambachila mwanenyi mutangu Ere, pwo, jina lienyi Tamare.

⁷ Ere te kali chingulungulu, kashika Mwene Zambi yamushiha.

⁸ Mba Yuda yambila Onane ngwenyi: “Yako umbate nyalie ahichika yayenu, ha kumanununa Shimbi jetu, hanga usangule vungu lia yayenu Ere.”

⁹ Alioze mwe Onane yanyingika ngwenyi, ana waze keechi kabwa ana jenyi. Kashika te lieswe tangwa akulimona ni pwo yoze, mbuto yayimwanga hashi, ngwenyi: “Nyi ka, mungusangula vungu lia yaya.”

¹⁰ Chuma chize alingile yichibwa chibi ku meso ja Mwene Zambi, kashika neye, Zambi yamushiha.

¹¹ Mba Yuda yambila tembwa mwanenyi ngwenyi: “Hiluka ku zuwo lia tatenu ndoo kuze mwanami Shela hakola.” Yamba chino mumu yanyonga ngwenyi, hanji Shela malinga afwe ngwe chize afwa ayayo. Mba Tamare yahiluka, yaya nikutwama maha tato.

¹² Muze miaka hiyabalika, pwo lia Yuda, yafwa kwenyi. Muze kufwa hichabalika, Yuda yazala mahina abema. Mba iye ni sepa lienyi Hira, mukwa Adulame, yaaya ku limbo lia Timna ha kutala waze te akukamba mapanga ja Yuda.

¹³ Umwe mutu yalweza Tamare ngwenyi: “Ukwe we kanayi ku Timna ni kukamba mapanga jenyi.”

¹⁴ Mba Tamare yazula mahina jenyi a utuliwa, yalifuka mahina eka ku meso, mba yaya ni kutwama ku chikolo cha Enaime, chihunda chize chili mu jila ya kuya ku Timna. Yanyingika ngwenyi, Shela hakola, alioze ndoo ni haliabwila ukwe wenyi kanda atayiza kulimbata ni Shela.

¹⁵ Muze Yuda hamumona yanyonga ngwenyi, kota chitanji, mumu Tamare yalifuka hina ku meso.

¹⁶ Yakundama hakamwihi haze abwile mwe pwo ku sesa lia jila, yamwamba ngwenyi: “Ngunazange kulimona ne.” Yuda te kanyingikine ko ngwenyi, kali tembwa mwanami. Tamare ngwenyi: “Yika muungwaha?”

¹⁷ Yuda ngwenyi: “Mungukutumina mwana pembe.” Iye ngwenyi: “Muungwaha chifungo ndoo muukamutuma, nyi?”

^18-19 Yuda ngwenyi: “Chuma chika?” Pwo ngwenyi: “Kazeya ke, ni muya we, ni lukanda we yoze uli nenyi mu kwoko lie.” Yamwaha yuma yize, mba yalimona nenyi. Tamare yahinduka, yakatuka ho, yaya kwenyi. Yazula mahina abema mba yazala nawa mahina jenyi a utuliwa. Mba pwo yalimona ngwenyi, nguli ni ufumba.

²⁰ Yuda yatuma sepa lienyi, mukwa Adulame, ngwenyi: “Anda mwana pembe yono, yako ukangutambwile yuma yami yize nahichikilile pwo yoze chitanji.” Alioze pwo yoze kamumwene ko.

²¹ Yahula atu waze abwile ko ngwenyi: “Yolihi pwo yoze chitanji wabwile hano mu jila ya kuya ku Enaime?” Ayo ngwo: “Hano kuhatwamine pwo chitanji.”

²² Yahiluka kuli Yuda, yamulweza ngwenyi: “Chamumwene. Atu waze atwama ko kangulweza ngwo: ‘Kuno kukwatwamine niumwe pwo chitanji.’ ”

²³ Yuda ngwenyi: “Azuke koko. Nyi ka, matukolesa tuhu sonyi. Namutumina mwana pembe alioze kuwamumwene, hikwahwa.”

²⁴ Yikubalika tukweji atatu, mba umwe mutu yalweza Yuda ngwenyi: “Tembwa mwane Tamare, ufumba ali nawo.” Yuda ngwenyi: “Yenu nukamuchize mu chihunda, nukamutuhwise haze. Nukamwoche ha kahia, akafwe.”

²⁵ Muze atu anatuhwisa Tamare haze, yatumina ukwe wenyi maliji ngwenyi: “Mutu yoze wanguhichikilile kazeya, ni muya, ni lukanda wenyi, mwe unakangwaha ufumba. Achitalenu nyi yuma yino yili yaya.”

²⁶ Yuda yanyingika ngwenyi, yuma yize yili niyenyi, yamba ngwenyi: “Kasamba kwenyi. Yami nalinga chibi, mumu chamuhanyine kuli mwanami Shela.” Mba Yuda hikalimwene ko nawa nenyi.

²⁷ Ha tangwa lia kusema yaamona ngwo, ana apasa ali mu jimo.

²⁸ Muze te anevu musongo wa kusema, mwana umuwika yatuhwisa kwoko. Chifunguji yakwata lie kwoko, yalijichika lwoji muchila, yamba ngwenyi: “Yono mwe mukulwana.”

²⁹ Alioze mwe mwana yahilwisa kwoko mu jimo. Mba mukwo yahanga kusemuka. Chifunguji yamba ngwenyi: “Ku tachi je wasemuka!” Yaamuluka ngwo, Pereze.

³⁰ Mba mwanakwo yasemuka, yoze uli ni lwoji ku kwoko. Yaamuluka ngwo, Zera.