Ubutukilo 37 - Mukanda Wa Zambi 1970

Josefe ni ayayo

¹ Yakoba te katwama mu chifuchi cha Kanana, muze te atwamine tato.

² Jino je sango ja akwa jiko lia Yakoba. Muze Josefe habwa ni miaka kumi ni shimbiali, iye ni ayayo te kaakufunga yimuna. E ayayo te ana ja Bila ni Zilpa, mapwo ja tato. Josefe yalweza tato yibi yize te akulinga ayayo.

³ Israele yazanga Josefe kuhiana ana jenyi akwo, mumu wamusemene mu ushinakaji wenyi. Kashika yamutungila kazaku ka moko asuku

⁴ Muze ayayo haamona chize tato te akuzanga Josefe kuhiana ayo, yaabutuka kumuvutwokela kuhiana. Kashika te keeshi kumuhanjikisa nawa ni zango.

⁵ Limwe tangwa Josefe yalota chilota, yachawila ayayo. Kashika yamuvutwokela kuhiana hatangu.

⁶ Josefe yalweza ayayo ngwenyi: “Ivwenu chilota nalianga.

⁷ Namonanga ngwe tunajichika yichita mu munda, mba chichita chami yichikatuka yichimana, ya yenu yiyiza ni kuchijingilika, ni kuhetamina hashi ku chichita chami.”

⁸ Ayayo ngwo: “Haa, puu! Unanyongo ngwe, muukatuyula, nyi? Hanji muukatuzeyesa, nyi?” Mba yaamunwa kuhiana ha chilota chize awile.

⁹ Josefe yalota nawa chilota chikwo. Yachawila ayayo ngwenyi: “Namonanga tangwa, ni kakweji, ni matongonoshi kumi ni kashi kaananguhetamina.”

¹⁰ Chilota chino Josefe yachawila nawa tato, alioze tato yamubajila ngwenyi: “Chilota chika walotanga chibwa chocho? Kafwa unanyongo ngwe, yami, ni noko, ni ayayenu tukeze ni kukufukamina hashi, nyi?”

¹¹ Ayayo ya Josefe yaamuvwila ukwa kuhiana, alioze tato yafunga yilota yize mu mbunge yenyi.

Ayayo yaalanjisa Josefe, Aishmaele yaamutwala ku Egiptu

¹² Ayayo ja Josefe yaaya ku Shekeme ni kufunga yimuna ya tato.

¹³ Israele yambila Josefe ngwenyi: “Ayayenu kaanafungu yimuna ku Shekeme. Tweya ngukutume ko.” Josefe ngwenyi: “Ewa, Tata.”

¹⁴ Mwe tato ngwenyi: “Yako utale nyi ayayenu ni yimuna kaali kanawa, hanga Wize ungulweze.” Chenacho akatukile ku chikulo cha Hebrone, mba yaya ku Shekeme.

¹⁵ Umwe lunga yamuwana te kanachamangina mu yambu. Yahula Josefe ngwenyi: “Yika unafupu?”

¹⁶ Josefe ngwenyi: “Ayaya ngunafupu. Nalemba ngulweze kama kuze anafungila yimuna.”

¹⁷ Mwe lunga ngwenyi: “Hano anakakatuka kulu ho. Ngunakeevwa maamba ngwo: ‘Tuyenu ku limbo lia Dotane.’ ” Mba Josefe yakaula ayayo, yaawana ku Dotane.

¹⁸ Josefe te uchili kusuku muze ayayo amumwene. Muze te kanda achiheta ko, yaamutwama punga akamushihe.

¹⁹ Yaalihanjikisa ngwo: “Sayilota kaneza.

²⁰ Tumushihenu, tumumbile mu umwe wina hano. Ha chino mutukambulula ngwetu, ngongo hamulia. Mba tumone yilota yenyi chize muyibwa.”

²¹ Muze Rubene hevwa ko, yeseka kulamwina Josefe ku moko jo. Yamba ngwenyi: “Ka, kanda tumumona manyinga.

²² Kanda numushiha. Mumbilenu kama tuhu mu wina uno mu puya, alioze kanda numulemeka.” Yamba chino ha kulamwina Josefe ni kumuhetesa nawa kuli tato.

²³ Muze Josefe haaheta, ayayo yaamukwata, yaamuzula kazaku kenyi ka moko asuku,

²⁴ yaamwanda, yaamumbila mu wina. Wina uze te kuushi meya.

²⁵ Mba ayayo yaatwama hashi ni kulia. Susumuku yaamona mukana wa atu, Aishmaele, kaaneza. Te kaanakatuka ku chifuchi cha Gileade, ni kuya ku chifuchi cha Egiptu. Ha tumelu two kaanambata yuma yeka ni yeka ngwe ndundu, ni maji a vumba libema, ni ndungu.

²⁶ Mba Yuda yambila akwo ngwenyi: “Nyi twashiha mwanakwetu mba twachisweka, che mutwanda ho chika?

²⁷ Chinalite tumulanjise kuli Aishmaele wano, alioze kanda tumulemeka mumu kali mwanakwetu, tuli akwa mujingwa umuwika.” Akwo yamutayiza.

²⁸ Muze amwe akwa kulanjisa, Amidiane, abalikile ho, yaamutuhwisa mu wina, yaamulanjisa kuli Aishmaele ni ndando ya makumi aali a mbongo ja prata. Mba e Aishmaele yaamutwala ku Egiptu.

²⁹ Muze Rubene hahiluka kwe ku wina, kuwana Josefe keshimo, yachanuna mahina jenyi mumu ha chinyengo.

³⁰ Yaya ni kuhula akwo ngwenyi: “Mama yami! Kanuke keshimo, kuchi mba mungulinga kwami?”

³¹ Hohene yaashiha kuji a pembe, yaanda kazaku ka Josefe, yaamuchubika mu manyinga.

³² Yaatwalila tato kazaku yoze, yaamba ngwo: “Hitwawana kazaku yono. Achimutale, nyi kali wa mwane, nyi ka.”

³³ Yamunyingika, yamba ngwenyi: “Ewa kali wa mwanami. Ngongo haha Josefe, hamupupulula yihanda yihunda!”

³⁴ Yakoba yachanuna mahina jenyi, yazala mwanji, mumu ha chinyengo chenyi. Yalila mwanenyi matangwa anji.

³⁵ Ana jenyi eswe a malunga ni a mapwo yeeza ni kumulembejeka, alioze katayijile ko, ngwenyi: “Mungulila mwanami ndoo mungukamuwana muma mwa afu.” Chenacho te Yakoba akulila mwanenyi Josefe.

³⁶ Muze Amidiane haaheta ku Egiptu, yaalanjisa Josefe kuli Potifare, kavumbi ka mwanangana, kanda mwata wa tulayi a ku zuwo lia wanangana.