Ubutukilo 36 - Mukanda Wa Zambi 1970

Vungu lia Esau (Tala nawa 1 San 1:34-37)

¹ Atu wano kaali vungu lia Esau, hanji Edome.

² Esau yambata mapwo a yilambala a mu chifuchi cha Kanana. E mapwo wano: Ada, mwana wa Elone, wa ku vungu lia Hite, ni Oholibama, mwana wa Ana, mujikulu wa Zibeone, wa ku vungu lia Hive,

³ ni Basemate, mwana wa Ishmaele, ndumbu ya Nebayote.

⁴ Ada yasema Elifaze, Basemate yasema Rewele,

⁵ Ohilibama yasema Yeushe ni Yalame ni Kora. Wano eswe kaali ana malunga waze Esau asemene mu chifuchi cha Kanana.

⁶ Esau yanda mapwo jenyi, ni ana jenyi a malunga ni a mapwo, ni atu eswe a mu zuwo lienyi, ni yimuna yenyi, ni yuma yeswe yize abichile mu chifuchi cha Kanana, yahichika mwanakwo Yakoba, mba yaya ku chifuchi chikwo.

⁷ Yakatuka ko mumu chifuchi chize atwamine ni Yakoba te chikepe, ni yimuna yo yinji yahiana.

⁸ Ha chino Esau (hanji Edome) yaya ni kutunga mu milundu ya Seire.

⁹ Atu wano kaali vungu lia Esau, kashakulu ka akwa Edome, waze te atwama mu milundu ya Seire.

^10-13 Ada, pwo lia Esau yasema Elifaze. Mwe Elifaze te kali ni ana wano atano a malunga: Temane, ni Omare, ni Zefo, ni Gatame, ni Kenaze. Pwo mukwo wa Elifaze, Timna, yasema Amaleke. Pwo lia Esau mukwo, Basemate, yasema mwana umuwika wa lunga, Rewele. Mwe Rewele yasema ana wano awana a malunga: Nahate, ni Zera, ni Shama, ni Miza.

¹⁴ Pwo lia Esau mukwo, Oholibama, mwana wa Ana, mujikulu wa Zibeone, yasema ana wano atatu a malunga: Yeushe, ni Yalame, ni Kora.

¹⁵ Wano e mavungu ja Esau (Edome). Elifaze, mwanenyi mutangu te kashakulu ka mavungu wano: Temane, ni Omare, ni Zefo, ni Kenaze,

¹⁶ ni Kora, ni Gatame, ni Amaleke. Wano eswe kaali a ku vungu lia Ada, pwo lia Esau.

¹⁷ Rewele, mwana wa Esau, te mwe kashakulu ka mavungu wano: Nahate, ni Zera, ni Shama, ni Miza. Wano eswe kaali a ku vungu lia Basemate, pwo lia Esau.

¹⁸ Mavungu waze Esau asemene ni pwo lienyi Oholibama wano: Yeushe, ni Yalame, ni Kora.

¹⁹ Atu wano eswe te kaali vungu lia Esau (Edome).

Vungu lia Seire

^20-21 Ana wano a malunga a Seire, mukwa Hori, kaabwile atu atangu mu chifuchi cha Edome: Lotane, ni Shobale, ni Zibeone, ni Ana, ni Dishone, ni Ezere, ni Dishane.

²² Lotane te mwe kashakulu ka mavungu ja Hori ni Hemane. (Timna te ndumbwa Lotane.)

²³ Shobale te mwe kashakulu ka majimo wano: Alvane, ni Manahate, ni Ebale, ni Shefo, ni Oname.

²⁴ Zibeone te kali ni ana a malunga aali, Aya ni Ana. (Ana yono mwe wamwene shima lia meya lia kahia mu puya, muze te akufunga yimuna ya tato Zibeone.)

^25-26 Ana te mwe tato ya Dioshone, kashakulu ka majimo wano: Hemdane, ni Eshbane, ni Itrane, ni Cherane. Ana te kali nawa ni mwana wa pwo Oholibama.

²⁷ Ezere te mwe kashakulu ka majimo wano: Bilhane, ni Zavane, ni Akane.

²⁸ Dishane te mwe kashakulu ka majimo ja Uze ni Arane.

^29-30 Atu wano te kaali a ku mavungu ja Hori mu chifuchi cha Seire (Edome): Lotane, ni Shobale, ni Zibeone, ni Ana, ni Dishone, ni Ezere, ni Dishane.

Mianangana a mu chifuchi cha Edome

^31-39 Atu wano e mianangana waze ayulile mu chifuchi cha Edome muze te Aisraele kanda achibwa ni mwanangana: Bela, mwana wa Beore, wa ku chihunda cha Dinhaba, Yobaba mwana wa Zera wa ku limbo lia Bozra, Hushame wa ku chifuchi cha Temane, Hadade mwana wa Bedade wa ku limbo lia Avite (yoze wakumbile Amidiane mu jita mu chifuchi cha Moabe), Samla wa ku chihunda cha Masreka, Shaule wa ku limbo lia Rehobote ku lwiji, Bal Hanane mwana wa Akbore Hadade wa ku limbo lia Pau (Jina lia pwo lienyi te Mehetabele, mwana wa Metrede, mujikulu wa Mezahabe.)

^40-43 Esau te mwe kashakulu ka mavungu wano a mu chifuchi cha Edome: Timna, ni Alva, ni Yetete, ni Oholibama, ni Ela, ni Pinone, ni Kenaze, ni Temane, ni Mibzare, ni Magdiele, ni Irame. Wano te mianangana mu chifuchi cha Edome ni kulita ni yifuchi yo muze te akutwama.