Ubutukilo 35 - Mukanda Wa Zambi 1970

Zambi yawahisa Yakoba ku Betele

¹ Zambi yambila Yakoba ngwenyi: “Katuka uye ku limbo lia Betele, Ukatwame ko. Ukatunge chilumbilo homa haze akusolokelele Zambi muze wachinyine yayenu Esau.”

² Mba Yakoba yambila akwa zuwo lienyi ni waze eswe abwile hamwe nenyi ngwenyi: “Mbilenu mahamba a yilambala waze nuli no hakachi kenu, chizenu manyonga eswe abi a mu mbunge jenu, nuzale mahina aha.

³ Tukatukenu tuyenu ku Betele. Kwenako mutukatungila chilumbilo ha kuwayila Mwene Zambi yoze wanguvwile ha tangwa lia lamba, wangufungile kanawa kuma kweswe te nakuya.”

⁴ Mba yaamwaha Yakoba mahamba eswe a yilambala waze abwile no, yaamwaha nawa yingeliengelie ya ku matwi yize te akuzala. Yakoba yayivumbika mushi lia mutondo shene uze wabwile hakamwihi ni limbo lia Shekeme.

⁵ Muze Yakoba ni ana jenyi te anayi mu jila, akwa membo waze akusulangana yeevwa woma unji, kaakawile ko.

⁶ Yakoba ni atu jenyi eswe yaaheta ku limbo lia Luze (hanji Betele) mu chifuchi cha Kanana.

⁷ Yatunga ko chilumbilo, yaluka ko jina ngwenyi, Betele, mumu kwenako alimwene ni Zambi, muze te anachinyi yayo Esau.

⁸ Debora, ndeji ya Rebeka, yafwa. Yaamufunda mushi lia mutondo shene, uze wabwile hehi ni Betele. Mba mutondo uze yaauluka ngwo, Shene wa Malilo.

⁹ Yakoba, ha kuheta chenyi ku Kanana, Zambi yamusolokela nawa, yamuwahisa ngwenyi:

¹⁰ “Jina lie kulichi kubwa nawa Yakoba, alioze Israele.” Chenacho Zambi amulukile ngwenyi, Israele.

¹¹ Zambi yamwamba nawa ngwenyi: “Yami nguli Mwene Zambi Mukwa Ndundo Jeswe. Usema ana anji. Vungu lie maakabwa anji, akwo maakabwa mianangana anene. Vungu lie mulikoka, maakabwa mavungu anene.

¹² Chifuchi chino nahele Abrahama ni Isake, ngunakwehe cho yena ni vungu lie lia kulutwe.”

¹³ Mba Zambi yahichika Yakoba, yahiluka kwenyi mwilu.

¹⁴ Yakoba yamika ho liwe ha chiwulukilo, yahinjila ho vinyu ni kuzujila ho maji ha kulikunjika kuli Zambi,

¹⁵ yaluka ho jina ngwenyi, Betele.

Kufwa cha Rashele

¹⁶ Yakoba ni atu jenyi yaakatuka ku Betele. Muze haaheta hehi ni limbo lia Efrata, Rashele yevwa musongo wa kusema, yabinda kuhiana.

¹⁷ Muze misongo hiyoka chifunguji yamwamba ngwenyi: “Kanda wivwa woma, yono nawa kali mwana wa lunga.”

¹⁸ Muze Rashele te himasutuka, yaluka mwana jina ngwenyi, Benoni Alioze Yakoba yamuluka jina ngwenyi, Benjamine.

¹⁹ Muze Rashele hafwa, yaamufunda mu jila ya kuya ku limbo lia Efrata. (Musono kaakulivuluka ngwo, Betleheme.)

²⁰ Yakoba yamika liwe ha fuka lia Rashele. Lie liwe kwe lili ndoo ni musono.

²¹ Israele yakatuka ho, yasa musumba wenyi ku sali lia zuwo lisuku lia Edere.

Ana ja Yakoba a malunga

²² Muze Israele te anatwama mu chifuchi chize, mwanenyi Rubene yalimona ni Bila, umwe pwo lia tato, mba tato yachinyingika. Yakoba yabwa ni ana kumi ni aali a malunga.

²³ Wano e ana ja Leya: Rubene (mwe mwana mutangu wa Yakoba), Simeone, ni Levi, ni Yuda, ni Isakare, ni Zabulone.

²⁴ Wano e ana ja Rashele: Josefe, ni Benjamine.

²⁵ Ana ja Bila, ndungo ya Rashele wano: Dane ni Naftali.

²⁶ Ana ja Zilpa, ndungo ya Leya wano: Gade, ni Ashere. Wano eswe e ana ja Yakoba waze te asemene mu chifuchi cha Mesopotamia.

Kufwa cha Isake

²⁷ Yakoba yaheta maha tato Isake ku limbo lia Mamre, hehi ni Kiriate Arba, (jina likwo Hebrone), kuze abwile Abrahama ni Isake hatangu.

²⁸ Isake yatwama ni mwono miaka kulakaji ni makumi nake,

²⁹ te kashinakaji wa tachi ndoo ni ku kufwa chenyi. Mba ana jenyi Esau ni Yakoba yaamufunda.