Ubutukilo 34 - Mukanda Wa Zambi 1970

Shekeme yalimona ni Dina ku tachi

¹ Dina, mwana wa Yakoba yoze asemene ni Leya, yaya ni kutala ana mapwo a mu chifuchi chize.

² Hamore, Kahive, te mwanangana wa chifuchi chize. Shekeme, mwana wa Hamore, hakumona Dina, yamukwata ni tachi mba yalimona nenyi.

³ Alioze Shekeme yalalaminya Dina, yamuzanga kuhiana, yafupa kumulembejeka.

⁴ Mba Shekeme yalweza tato Hamore ngwenyi: “Tata, yako ungumbachile mwana pwo auze Dina, ngunazange kumumbata.”

⁵ Yakoba yevwa chize halumbula mwanenyi, alioze kalingile nichimwe mumu te anenyi a malunga haaya mu yambu ni ngombe. Yaashimbwila ndoo ku kuhiluka cho.

⁶ Hamore, tato ya Shekeme, yeza ni kuta pande ni Yakoba.

⁷ Tangwa lizeliene ana ja Yakoba yaahiluka ku chihunda. Ha kwivwa sango jize, yeevwa ufwatulo kuhiana, yaamba ngwo: “Shekeme kalinga Chuma cha sonyi kuhiana. Hatuka Aisraele eswe mumu halimona ni ndumbwetu ni tachi.”

⁸ Hamore yaambila ngwenyi: “Mwanami Shekeme kanazange mwanenu wa pwo. Nalemba, tayizenu amumbate.

⁹ Tukalimbachile ni yenu. Yenu munumbata ana jetu ni yetu mutumbata ana jenu.

¹⁰ Mba munutwama ni yetu heswe haze nunazange. Chifuchi cheswe muchibwa nichenu. Twamenu mo ni kulanda ni kulanjishila mo, nukabichile mo.”

¹¹ Mwabwa muze Shekeme yambila tato ya Dina ni mandumbu jenyi ngwenyi: “Nalemba, nguvwilenu kama vumbi. Mungunwaha cheswe chize munwita.

¹² Ngwitenu cheswe chihako ni yawana yize nunazange. Mungunwaha cheswe Chuma munwita, alioze nalemba kuhiana, ngutayizenu ngumbate mwe mwana pwo.”

¹³ Ana ja Yakoba yaafupa mana akwonga Hamore ni mwanenyi Shekeme, mumu Shekeme hakolesa ndumbwo sonyi.

¹⁴ Ngwo: “Ndumbwetu kahashile kuya ulo kuli chilima. Kuli yetu sonyi jinji.

¹⁵ Kutuchi kunutayiza Chuma chino shina munwononoka ku Shimbi yetu kupwisa malunga eswe ngalami.

¹⁶ Mba mutunutayiza ha kumbata ana jetu a mapwo, ni yetu mutumbata ana jenu. Mututunga hakachi kenu, mutubwa vungu limuwika.

¹⁷ Alioze nyi kunwatayijile maliji wano a Ungalami twanulweza, mututambula ndumbwetu, tuye nenyi.”

¹⁸ Hamore ni mwanenyi Shekeme yatayiza yize yeswe.

¹⁹ Mwe Shekeme kashimbwilile ko ha kulinga yize yeswe ambile ana ja Yakoba, mumu yazanga mwana wa Yakoba kuhiana. Shekeme te mulemu Wahiana hakachi ka akwa vungu lienyi.

²⁰ Chenacho Hamore ni mwanenyi Shekeme ayile ku chikolo cha chipanga cha limbo lio, kuze te akulikungulwila atu. Mba yaambila akwa limbo ngwo:

²¹ “Atu wano kaali akwa sambukila. Twatayizenu hanga atwame mu chifuchi chetu, akalande lande ni kulanjishila mo. Chifuchi chili kwacho chinene. Mutumbata ana jo a mapwo, no mambata ana jetu a mapwo.

²² Alioze Shimbi yimuwika yasala mba atayize kutwama ni yetu hanga tukabwe vungu limuwika. Shina malunga eswe a mu chifuchi chetu aapwise ngalami ngwe ayo.

²³ Yimuna ni yuma yo yeswe kuyichi kubwa ni yetu, nyi? Twatayizenu mba atwame ni yetu.”

²⁴ Atu eswe a mu limbo yaatayiza maliji waze aalwezele Hamore ni Shekeme. Mba malunga eswe yaapwisa ngalami.

²⁵ Ha tangwa lia muchitatu, shimbu te malunga achili ni yikola, ana aali a Yakoba, Simeone ni Levi, e mandumbu ja Dina, yanda mikwale yo, yaanjila mu limbo ni hamu lieswe, yaashiha malunga eswe.

²⁶ Yaashiha nawa Hamore ni mwanenyi Shekeme, mba yaatambula Dina mu zuwo lia Shekeme, yaaya kwo.

²⁷ Mabwa muze ana ja Yakoba akwo yaanjila mu limbo, yaabalieka hakachi ka afu, yaabuba yuma yeswe ya ndando yinji ku tachi, mumu akwa limbo lize akolesele ndumbwo Dina sonyi.

²⁸ Yaabuba mapanga, ni ngombe, ni yimbulu, ni yuma yize yeswe awanyine mu limbo ni mu minda.

²⁹ Yaabuba ubite weswe, yaakwata mapwo ni ana jo eswe, ni yaabuba yuma yeswe yize yabwile mu mazuwo, yaaya nayo.

³⁰ Yakoba yambila Simeone ni Levi ngwenyi: “Yitela nwangukokela, mungubwa ni lufuma mubi. Akanana ni Aperize kumanguvutwokela kwami. Chishi kwami ni atu anji. Nyi atu wano maalichinga ha kwiza ni kwasa jita ni yami, kumangushiha hamwe ni akwa zuwo liami eswe.”

³¹ Alioze yaamukumbulula ngwo: “Te chamutamba kupwisa ndumbwetu ngwe chitanji, nyi?”