Ubutukilo 33 - Mukanda Wa Zambi 1970

Yakoba yalitakana ni Esau

¹ Yakoba yahetuka, yamona Esau kaneza ni malunga kulakaji jiwana. Mba Yakoba yahandununa ana jenyi kuli Leya, ni Rashele, ni ndungo aali a mapwo.

² Yasa ndungo ni ana jo kulutwe lia mukana, yikusula Leya ni ana jenyi, mba yikusula Rashele ni Josefe.

³ Iye mwene yaya kulutwe lia eswe, yafulamana yisuho shimbiali, yaheta haze te anamana yayo Esau.

⁴ Alioze Esau te kanazomboka fuji ni kulitakana ni mwanakwo. Yamusambilila, yamushisa, no eswe aali yaabutuka kulila.

⁵ Esau yahetuka, yamona mapwo ni ana, yahula ngwenyi: “Wano eswe uneza no, aya?” Yakoba ngwenyi: “Mwene, wano e ana waze Zambi, mu vumbi lienyi, hangwaha yami kavumbi kenu.”

⁶ Mba ndungo ja mapwo yeeza ni ana jo, yaafulamana.

⁷ Leya neye yeza ni ana jenyi, yaafulamana, mba Josefe ni Rashele yeeza, no yaafulamana.

⁸ Esau yahula ngwenyi: “Mba yendo yize natakananga nayo, kuchi yinalumbunuka?” Yakoba ngwenyi: “Mwene, hanga nunguvwile kama keke.”

⁹ Alioze Esau ngwenyi: “Mwanakwetu, anji nguli no. Mbata kwe.”

¹⁰ Yakoba ngwenyi: “Nalemba mwane, nyi hinwanguvwila keke, tambulenu kama mulambu uze hinanwaha. Muze hinanumona, chili ngwe Zambi namona, mumu hinwangutambula kanawa.

¹¹ Nalemba, tambulenu kama yuma yino nanunehena. Mumu Zambi hananguwahisa, hanangwehe yuma yeswe yize nguli nayo.” Yakoba yashinjila Esau kuhiana mba yayilambula.

¹² Esau ngwenyi: “Tukatukenu tuyenu. Yami ngunatetekela.”

¹³ Yakoba ngwenyi: “Mwene wami, nunanyingika ana kanda akola. Mba Changutamba kunyongena nawa mapanga ni ngombe waze anamwisa ana jo. Nyi ngwe tweendesa fuji fuji, chibwe tangwa limuwika, yimuna yeswe kumuyifwa.

¹⁴ Nalemba mwane tetekelenu, mba yetu mutukaula hakepe hakepe ni yimuna ni ana, ndoo mutunuwana mu chifuchi cha Seire.”

¹⁵ Esau ngwenyi: “Kuheshi Chuma, alioze mungukuhichika ni atu jami akwo.” Yakoba ngwenyi: “Ka, mwene wami, ngunasakwila.”

¹⁶ Mba Esau yahiluka ni kuya ku Seire.

¹⁷ Yakoba yaya ku limbo lia Sukote. Yatunga ko zuwo lienyi ni matanga a yimuna. Kashika yaaluka ho jina ngwo, Sukote.

¹⁸ Chenacho Yakoba ahetele kanawa ku limbo lia Shekeme mu chifuchi cha Kanana muze akatukile mu chifuchi cha Mesopotamia. Yajika musumba wenyi mu munda hehi ni limbo.

¹⁹ Yalanda munda uze kuli akwa vungu lia Hamore, tato ya Shekeme. Yafweta mbongo ja prata kulakaji yimuwika.

²⁰ Yatunga ho chilumbilo, yachiluka jina ngwenyi, Zambi kali Zambi ya Israele.