Ubutukilo 32 - Mukanda Wa Zambi 1970

¹ Yakoba yaya mu jila yenyi. Mba yatakana ni tunganda twa mwilu.

² Muze Yakoba haamona, yamba ngwenyi: “Uno uli musumba wa Zambi.” Mba homa haze yaluka ho jina ngwenyi, Mahanaime.

³ Yakoba yatuma tunganda kuli yayo Esau. Mwe Esau te katwama ha mulundu wa Seire mu chifuchi cha Edome.

⁴ Yakoba yamba ngwenyi: “Lwezenu Esau maliji wano: ‘Yami ndungo ye Yakoba, nayile ni kutwama matangwa anji maha Labane, nashimbula ko ndoo ni musono.

⁵ Nguli ni ndungo a malunga ni a mapwo, ni ngombe, ni tumelu, ni mapanga, ni pembe. Nalemba mwane, ngunaliange kukutumina liji, ungutambule kama kanawa.’ ”

⁶ Tunganda yaahiluka kuli Yakoba yaamulweza ngwo: “Tunakaheta maha yayenu Esau. Twamuhichika mu jila, kaneza ni kukubatwiza. Malunga 400 kali no.”

⁷ Yakoba yevwa woma unji, yalibikala. Yahandununa atu jenyi ni yimuna yenyi yeswe, mapanga, ni pembe, ni ngombe, ni tumelu, ha mbunga jaali jaali.

⁸ Yanyonga ngwenyi, nyi ngwe Esau masa jita ni mbunga yitangu, mbunga ya muchaali maachina.

⁹ Hohene yalemba ngwenyi: “Zambi ya kaka Abrahama ni tata Isake, ngwivwe kama. Yena Mwene wami wangwambile nguhiluke ku chifuchi chami, ni kuli usoko wami, mba muukanguwahisa.

¹⁰ Yami, kavumbi ke, ha kumona chize wangulwezele zango, ni chize wamanunwine yilakenyo yeswe yize wangulakenyene, kuyangutelele nihakepe. Nazaukile lwiji wa Yordau, te Chishi nichimwe ku moko, shina lukanda wami wika. Alioze haliabwila ngunahiluka ni mbunga jaali.

¹¹ Nalemba ngulamwine kama ku moko ja yaya Esau. Ngunevu woma, hanji meza ni kungububa ni mapwo hamwe ni ana.

¹² Wangulakenyene ngwe: ‘Mungukakuwahisa. Vungu lie mungukalipwisa anji ngwe masekeseke ku mbumbulu ya kalunga lwiji, waze atu kaahashile kwalula.’ ”

¹³ Ha ufuku uze Yakoba yabomba. Muze hikwacha yasakula yimuna yakumwaha yayo Esau.

¹⁴ Ye yimuna yili yino: pembe a yihwo kulakaji jaali, makuji makumi aali, ni mapanga a yihwo kulakaji jaali, makuji makumi aali,

¹⁵ tumelu a yihwo ni ana jo, waze te maachamwa, makumi atatu, ni ngombe a yihwo makumi awana, makuji kumi, ni yimbulu a yihwo makumi aali, makuji kumi.

¹⁶ Chendo ni chendo cha yimuna yachikunjika mu moko ja akwa milimo ha kwatwala. Mba yaalweza ngwenyi: “Tetekelenu kulutwe liami, nuhichika kachipinji hakachi ka chendo ni chendo muze nunende.”

¹⁷ Yalweza mukwa milimo mutangu ngwenyi: “Nyi walitakana ni yaya Esau mu jila, nyi makuhula ngwenyi: ‘Iya mwene we? Kuli unayi? Yimuna yino yaya?’

¹⁸ Mba muukakumbulula ngwe: ‘Kaali a kavumbi kenu Yakoba, mwane. Hatuma chawana cha mwene wenyi Esau. Yakoba iye mwene kanakaula kunyima.’ ”

¹⁹ Yakoba yalongesa nawa chizechene mutu wa muchaali, ni wa muchitatu, ndoo ni atu eswe waze te anatwala yimuna, ngwenyi: “Chenacho munukalweza yaya Esau muze munukatakana nenyi mu jila.

²⁰ Nukamba nawa ngwenu: ‘Kavumbi kenu Yakoba kanakaula kunyima.’ ” Yakoba yanyonga ngwenyi, ufwatulo wa Esau muukahwa mumu ha chawana chize amutuminyine kulutwe. Yanyonga nawa ngwenyi, nyi natakana nenyi kota manguvwila keke.

²¹ Chenacho atetekesele milambu kulutwe, mba iye yasala ha musumba.

Yakoba yalitachika ni Zambi

²² Ha ufuku uzewene Yakoba yakatuka, yanda mapwo jenyi ni ana jenyi kumi ni kashi, yanda nawa ndungo jenyi a mapwo aali. No yaazauka lwiji Jaboke ha mwaa.

²³ Muze Yakoba hazawisa atu jenyi, yazawisa nawa yuma yeswe.

²⁴ Yasala ukawenyi mu sali. Mba umwe lunga yalitachika ni Yakoba ndoo ni muze hikwacha.

²⁵ Muze lunga yoze hamona ngwenyi, kahashile kukumba Yakoba, yamukwata ha shina lia kulu, mba kulu yilisengunuka.

²⁶ Mwe lunga yambila Yakoba ngwenyi: “Ngweche nguye, mumu hikwacha.” Alioze Yakoba ngwenyi: “Chichi kukwecha ndoo hiwanguwahisa.”

²⁷ Lunga yamukumbulula ngwenyi: “Jina lie yena iya?” Yakoba ngwenyi: “Yami Yakoba.”

²⁸ Mutu yoze ngwenyi: “Jina lie kulichi kubwa nawa Yakoba, mumu hiwalitachika ni Zambi ni atu, hiwakumba. Kashika maakuvuluka ngwo, Israele.”

²⁹ Yakoba ngwenyi: “Nalemba ngulweze kama jina lie.” Alioze iye ngwenyi: “Mumu yika unahulila jina liami?” Mba yamuwahisa.

³⁰ Yakoba yaluka ho jina ngwenyi, Peniele, mumu yamba ngwenyi: “Hinamona Zambi meso ni meso hindu nguli ni mwono.”

³¹ Shimbu Yakoba machikatuka ku Peniele, tangwa yilivumbuka. Alioze yabalita mumu shina lia kulu lienyi liasengunukine.

³² Kashika, ndoo ni musono, Aisraele keeshi kulia yifwo ya ha shina lia kulu lia kashitu, mumu lunga yoze wasengunwine Yakoba ha shina lia kulu.