Ubutukilo 30 - Mukanda Wa Zambi 1970

¹ Muze Rashele hamona ngwenyi, keshi kusema ana, yevwila yayo Leya ukwa. Yambila Yakoba ngwenyi: “Ngwehe ana, nyi ka, kumungufwa.”

² Yakoba yatenuka, yambila Rashele ngwenyi: “Yami nguli Zambi, nyi? Mwenawo wakupwisa mutu mumba.”

³ Rashele yakumbulula ngwenyi: “Tala ndungo yami Bila yono. Mutambule ulimone nenyi hanji mangusemena kama mwana, munguzuka ana jenyi.”

⁴ Chenacho Rashele ahanyine ndungo yenyi kuli lunga lienyi. Neye yalimona nenyi.

⁵ Bila yaka ufumba, yasema mwana wa lunga.

⁶ Rashele yamba ngwenyi: “Zambi hangubatwila kanawa, hevwa kuliumba chami, kashika hangwaha mwana wa lunga.” Mba yamuluka jina ngwenyi, Dane.

⁷ Bila, ndungo ya Rashele, yaka nawa ufumba, yasema mwana wa muchaali wa lunga.

⁸ Rashele ngwenyi: “Nalitachika kuhiana ni yaya Leya, hinakumba.” Kashika yamuluka jina ngwenyi, Naftali.

⁹ Leya, muze hamona ngwenyi, kasemene nawa, yanda ndungo yenyi Zilpa, yamwaha yo Yakoba.

¹⁰ Mba Zilpa yasema mwana wa lunga.

¹¹ Leya ngwenyi: “Nayuka.” Kashika yamuluka jina ngwenyi, Gade.

¹² Mba Zilpa ndungo ya Leya, yasema mwana wa muchaali wa lunga.

¹³ Leya yamba ngwenyi: “Ngunawahilila kuhiana. Haliabwila mapwo ni akwetu maanguvulwoka ngwo: ‘Kawaha.’ ” Kashika yamuluka jina ngwenyi, Ashere.

¹⁴ Ha matangwa a kuhela mbuto mu minda, Rubene yaya ku minda. Mba yamona ko mawundu waze akuvuluka ngwo, mandragora, yaatwalila naye Leya. Rashele yambila Leya ngwenyi: “Ngwehe kama mawundu waze akwahanga mwane.”

¹⁵ Leya ngwenyi: “Hatangu hiunangutambula lunga, haliabwila unazange kungutambula nawa mandragora a mwanami, nyi?” Rashele ngwenyi: “Nyi wangwaha mandragora, mba ufuku uno mulimona ni mukwetu lunga.”

¹⁶ Chingoloshi, muze Yakoba hahiluka ku munda kuze ayanga, Leya yaya ni kumubatwiza. Yamwamba ngwenyi: “Musono Chakutamba kulimona ni yami, mumu hinafweta mwanakwetu mandragora hanga tulimone ufuko uno.” Mba ufuku uze Yakoba yabwa hamwe ni Leya.

¹⁷ Zambi yevwa kulemba cha Leya, mba yaka ufumba, yasema mwana wa lunga.

¹⁸ Leya yamba ngwenyi: “Zambi hangwaha fweto mumu ngunakamwaha mukwetu lunga ndungo yami ha kusema nenyi.” Kashika yamuluka jina ngwenyi, Isakare.

¹⁹ Leya yaka nawa ufumba, yasema mwana wa lunga wa muchisambano.

²⁰ Leya yamba ngwenyi: “Zambi hangwaha chawana chibema. Haliabwila mukwetu lunga mangulemesa mumu hinasema nenyi ana asambano a malunga.” Mba yamuluka jina ngwenyi: Zabulone.

²¹ Kulutwe Leya yasema mwana wa pwo, yamuluka jina ngwenyi Dina.

²² Mba Zambi yanyongena Rashele, yevwa kuliumba chenyi, yamwaha kusema ana.

²³ Rashele yaka ufumba, mba yasema mwana wa lunga. Yamba ngwenyi: “Zambi hanguchiza sonyi mumu nabwile mumba.

²⁴ Mwene Zambi angwehe kama mwana mukwo wa lunga!” Kashika yamuluka jina ngwenyi, Josefe.

Yakoba yaalihangujola hakutwala ku fweto

²⁵ Muze Rashele hasema Josefe, Yakoba yambila Labane ngwenyi: “Ngutayize hanga nguye ku mahietu ku chifuchi chami.

²⁶ Ngwehe akwetu mapwo ni ana jami waze nakulingililile milimo. Ngweche nguye kwami. Yena mwene unanyingika milimo yize hinakulingila.”

²⁷ Labane yamukumbulula ngwenyi: “Nyi muutayiza twama ni yami, mumu ha kutaha chami ngunanyingika ngwami, Mwene Zambi hangukwasa mumu hali yena.

²⁸ Ngulweze chize Changutamba kukufweta, ngukwehecho.”

²⁹ Yakoba ngwenyi: “Yena unanyingika chize hinakulingila milimo, ni chize yimuna ye hooka ha kufunga chami.

³⁰ Mwene Zambi hakuwahisa mumu hali yami. Muze te kanda nguchiza, yuma yikepe wabwile nayo, haliabwila hiyoka. Mba mwaka uka mungukalinga milimo ha kukwasa akwa jiko liami?”

³¹ Labane yahula nawa ngwenyi: “Kuchi unazange ngukufwete?” Yakoba ngwenyi: “Chazangile mbongo. Mungufunga nawa yimuna ye, nyi watayiza maliji waze ngunahanjika.

³² Musono mungubalika mukachi ka yimuna ye yeswe, mba mungusakula pembe mweswe wa yibeka yibeka ni wa yihesa yihesa ni panga mweswe mulaa. Eno ngunechi, ye muyibwa fweto yami.

³³ Ha matangwa a kulutwe mba muukanyingika nyi ngunakakwonga. Muze muukeza nikutala yimuna ya yami, nyi wamona umwe pembe keshi yibeka yibeka ni yihesa yihesa hanji panga mulaa, mba muunyingika ngwe, kuma nguli mwiji.”

³⁴ Labane ngwenyi: “Chinabeme. Mutulinga ngwe hiwamba.”

³⁵ Alioze tangwa lioliene Labane yaya ni kusakula pembe a yibeka yibeka ni a yihesa yihesa, yachiza nawa mapanga eswe alaa, yaakunjika ku moko ja ana jenyi a malunga ha kwafunga.

³⁶ Mba yatwala yimuna yize kusuku, matangwa atatu mu jila. Alioze Yakoba yasala kuzekwene nikufunga yimuna ya Labane yize yasalile ho.

³⁷ Mba Yakoba yanda mizalanganga, ni mikesha, ni milende, yayisongasonga ni kuyisa yihesa yihesa hanga utome wa mitondo usoloke.

³⁸ Yasa mitondo yize ku yingolongolo kuze akunwina yimuna, mumu makuji te ndako akwete yakunyina hali yihwo muze akwiza ku shima ni kunwa meya.

³⁹ Kashika muze makuji a pembe te akunyina hali yihwo, kulutwe lia mitondo yize, yaaka majimo, yasema ana a yibeka yibeka ni a yihesa yihesa ni a mioli mioli.

⁴⁰ Mba Yakoba yahandununa mapanga ni pembe. Yatalikisa meso jo ku yimuna ya yihesa yihesa ni alaa ja Labane. Chenacho Yakoba okesele yimuna yenyi ni kwahandununa ku yimuna ya Labane.

⁴¹ Muze yimuna ya tachi akunyina, Yakoba masa mitondo ku meso ja yimuna yize hanga akake majimo kulutwe lia ye mitondo.

⁴² Alioze kayisele ko ku meso ja yimuna waze keeshi tachi. Chenacho yimuna ya tachi yaabwa a Yakoba, mba waze keeshi tachi yaabwa a Labane.

⁴³ Mba Yakoba yabita chikolo. Yabwa ni yimuna yinji, ni ndungo anji a malunga ni a mapwo, ni tumelu ni yimbulu anji.