Ubutukilo 3 - Mukanda Wa Zambi 1970

Mutu yavulumuna

¹ Hakachi ka tushitu eswe waze atangile Mwene Zambi, kapela yabwa mukwa kukanyama kuhiana. Neye yahula pwo ngwenyi: “Kuma chamwenemwene Zambi kanakamba ngwenyi, kanda nulia ku mitondo ya mu munda, nyi?”

² Pwo yamukumbulula ngwenyi: “Tunahase kulia mihuko ya ku mitondo yeswe ya mu munda,

³ shina mihuko ya mutondo uze uli mukachi ka munda kutwahashile kuyilia. Mumu Zambi yatwamba ngwenyi: ‘Kanda nulia mihuko ya mutondo uze, chibwe kuyikwata ka. Nyi ka, kumunufwa.’ ”

⁴ Kapela ngwenyi: “Mahuza, kunuchi kufwa kwenu.

⁵ Zambi kanakamba chino mumu kananyingika ngwenyi, nyi nwayilia, meso jenu maalaula, kuchina mununyingika yibema ni yibi ngwe iye Zambi.”

⁶ Pwo yamona ngwenyi, mutondo uze unabeme, ni mihuko yawo nawa yinabeme ha kulia. Yanyonga nawa ngwenyi, chili chibema ha kubwa ni mana. Kashika yahela ko mihuko, yalia. Mba yahana Chihanda kuli lunga lienyi, lunga neye yalia.

⁷ Muze haalia shimbu lizeliene meso jo yaalaula, mba yaanyingika ngwo, kuma uselesele tuli. Kashika yaanuka mafwo a mukuyu, yaatenga mahina, yaazala.

⁸ Ha chingoloshi yeevwa Mwene Zambi kaneza ni kwenda mu munda, ngi ngi ngi! Mba lunga ni pwo yaaswama mushi lia mitondo.

⁹ Mwene Zambi yahula lunga ngwenyi: “Kuli uli?”

¹⁰ Lunga ngwenyi: “Te ngunakwivu muze unende mu munda, yingwivwa woma. Kashika naswama, mumu nguli uselesele.”

¹¹ Zambi yamuhula ngwenyi: “Iya yoze wakulwezanga ngwenyi, uli uselesele? Hiwalia muhuko wa mutondo uze nakukanjishile ngwami, kanda uyilia, nyi?”

¹² Lunga ngwenyi: “Pwo yoze wanguhele kubwa nenyi mwe wangwahanga, kashika nalianga.”

¹³ Mba Mwene Zambi yahula pwo ngwenyi: “Mumu yika walinganga chino?” Pwo ngwenyi: “Kapela wangwonganga kashika nalianga.”

Zambi yaabatwila hanga amone lamba

¹⁴ Mba Mwene Zambi yambila kapela ngwenyi: “Ha chize hiwalinga, kuwashingiwa kuhiana yimuna yeswe ni tushitu eswe a mu yambu. Shingo lie lino, chize musono ndoo ku miaka yeswe muwendela ha jimo lie, muubwa ni kulia mavu.

¹⁵ Yena kapela ni pwo munukabwa akwa kole. Vungu lie ni vungu lia pwo mulikabwa akwa kole. Mulikafupa mana akukushihila ku mutwe, ni yena muukafupa mana akumusumina ku kashi jino.”

¹⁶ Mba yambila pwo ngwenyi: “Yibikalo yinji muukabwa nayo muze muukabwa ni ufumba, ni yikola yinji ha kusema. Hindu muukevwila lunga lie usona, neye makakuyula.”

¹⁷ Yambila nawa Samutu ngwenyi: “Wabanjikanga mukwenu pwo ha kulia mihuko ya mutondo uze nakukanjishile ngwami, mavu kaashingiwa. Ha matangwa eswe a mwono we muukahondangana ni kulima, mba ukabwe ni yakulia.

¹⁸ Hashi muhakusokela mikalale ni mbimbo. Muukalia yilimalima.

¹⁹ Matukuta anji muukasapangana, muukahondangana ha kulima hashi ndoo muukahiluka ku mavu kuze nakuchijile. Ku mavu wakatukile kwenako muukahiluka nawa.”

²⁰ Mba Samutu yaluka pwo lienyi ngwenyi, Namutu, mumu iye naye ya atu eswe.

²¹ Hohene Mwene Zambi yanda makubu ja tushitu, yaanukina Samutu ni pwo lienyi, yaajika.

Mwene Zambi yahanga Samutu ni Namutu mu munda

²² Mba Mwene Zambi yamba ngwenyi: “Haliabwila mutu habwa ngwe yetu mumu hanyingika yibema ni yibi. Kuchamutambile kulia mihuko ya mutondo uze wakuhana mwono, kuchina makabwa ni mwono wa miaka yeswe.”

²³ Kashika Mwene Zambi yahanga mutu mu munda wa Edene, hanga akalime e mavu kuze amuchijile.

²⁴ Mba ku sali lia chivumbuko lia munda wa Edene, yasa ko akwa mwono a mwilu ni mukwale wa mulengi wa kahia wakutalikisa ku majila eswe, ha kujika jila ya ku mutondo uze wakuhana mwono.