Ubutukilo 29 - Mukanda Wa Zambi 1970

¹ Yakoba yaheta maha Labane Yakoba yaya mu jila yenyi, yatalikisa mu chifuchi cha atu waze atwama ku chivumbuko.

² Yamona shima lia meya mu chana. Yamona nawa yendo yitatu ya mapanga unautama ko. Kwenako akwanwishina meya. Shima te kakulifuka ni liwe linene.

³ Muze yendo yeswe maakunguluka ha kunwa meya, tufunga maachize liwe lize, mba yendo maanwa. Muze haanwa tufunga maafuka nawa lie shima.

⁴ Yakoba yahula tufunga waze abwile ko ngwenyi: “Akwetu, ku mahienu kulihi?” Yaamukumbulula ngwo: “Ku Harane.”

⁵ Iye ngwenyi: “Labane, mwana wa Nahore, nwamunyingika, nyi?” Ayo ngwo: “Ewa, tunamunyingika.”

⁶ Yakoba ngwenyi: “Kanahinduka, nyi?” Ayo ngwo: “Ewa, kanahinduka kwenyi. Tala, mwanenyi wa pwo Rashele, auze kaneza ni yimuna ya tato.”

⁷ Yakoba ngwenyi: “Tala, tangwa lili ha muchima, tangwa lia kuhilwisa yimuna ku chihunda kanda lichiheta. Anwisenu meya mba nwahilwise nawa ni kwalisa.”

⁸ Ayo ngwo: “Kutwahashile kuchilinga ndoo yendo yeswe hiyaswila hamuwika, mba mutuchiza liwe ha kwanwisa.”

⁹ Shimbu Yakoba machihanjika ni tufunga, Rashele yaheta ni yimuna ya tato, mumu te iye wakwafunga.

¹⁰ Yakoba, hakumona Rashele kaneza ni yimuna ya natu Labane, yaya ku shima, yachiza liwe, yanwisa mapanga.

¹¹ Yakoba yashisa Rashele, mba yalila ni chiseke.

¹² Yalweza Rashele ngwenyi: “Nguli mwana wa Rebeka, ndumbwa tatenu.” Rashele yazomboka fuji ni kulweza tato.

¹³ Muze Labane hevwa sango ja Yakoba, mwana wa ndumbwenyi, yazomboka fuji ha kumusambilila. Yamumeneka, yamushisa, mba yamutwala mu zuwo. Yakoba yalumbunwina Labane sango jeswe.

¹⁴ Labane yamwamba ngwenyi: “Ewa chamwenemwene tuli mujingwa unuwika.” Yakoba yatwama kakweji umuwika mu zuwo lia Labane.

Yakoba yalingila Labane milimo ha kumbata Rashele ni Leya

¹⁵ Labane yahula Yakoba ngwenyi: “Chazangile ungulingile milimo yamokomoko mumu uli usoko wami. Yika unazange ngukufwete?”

¹⁶ Labane te kali ni ana mapwo aali, mukulwana jina lienyi Leya, kanuke jina lienyi Rashele.

¹⁷ Leya te hi mubema ko ku meso, alioze Rashele chileza.

¹⁸ Yakoba yazanga Rashele kuhiana, kashika yalweza Labane ngwenyi: “Mungukulingila miaka shimbiali hanga ngukambate mwane wa kanuke, Rashele.”

¹⁹ Labane ngwenyi: “Chinalite umumbate yena kuhiana mutu mukwo. Twama mu zuwo liami.”

²⁰ Yakoba yalinga miaka shimbiali ha kumbata Rashele. Miaka yize kayimwene ko ngwe yinji, mumu te wazangile Rashele kuhiana.

²¹ Yakoba yambila Labane ngwenyi: “Tangwa hiliaheta, ngwehe mwane ngumumbate.”

²² Mba Labane yalinga chiwanyino cha umbachiso, yatambika akwa limbo eswe.

²³ Ha ufuku Labane yatwalila Yakoba Leya, hi Rashele ko. Mba Yakoba yamumbata. (

²⁴ Labane yahana Zilpa, ndungo yenyi wa pwo, ha kukwasa mwanenyi Leya.)

²⁵ Muze hikwacha, yamona ngwenyi, kumana Leya. Yakoba yambila Labane ngwenyi: “Kuchi wangulinga Chuma ngwe chino? Nakulingilile ha kumbata Rashele. Mumu yika wangwongela chichize?”

²⁶ Labane ngwenyi: “Shimbi yimuwika tukwete, yenayi ayi: kanuke kahashile kuya ku ulo nyi mukulwana kanda achiya ku ulo.

²⁷ Shimbwila semane yimuwika, nyi chiwanyino chahwa mungukukunjika nawa Rashele ha milimo ya miaka yikwo shimbiali yize muukangulingila.”

²⁸ Yakoba yatayiza. Mba muze semane yimuwika hiyahwa, ni umbachiso hiwahwa, Labane yamwaha Yakoba mwanenyi Rashele kubwa mukwo pwo. (

²⁹ Labane yahana nawa Bila, ndungo yenyi wa pwo ha kukwasa mwanenyi Rashele.)

³⁰ Mba Yakoba yambata Rashele. Te kakuzanga Rashele kuhiana Leya. Yalingila nawa Labane miaka yikwo shimbiali.

Ana ja Yakoba

³¹ Mwene Zambi yamona ngwenyi, Yakoba keshi kuzanga Leya. Kashika yamwaha Leya ngoji ya kusema, alioze Rashele te mumba.

³² Leya yaka ufumba, yasema mwana wa lunga. Leya yamba ngwenyi: “Mwene Zambi hamona luyinda wami, haliabwila mukwetu lunga manguzanga kama.” Kashika yamuluka jina ngwenyi, Rubene.

³³ Yaka nawa ufumba, yasema mwana mukwo wa lunga. Leya yamba ngwenyi: “Mwene Zambi hangwaha mwana yono mumu hanyingika ngwenyi, Yakoba keshi kunguzanga.” Kashika yamuluka jina ngwenyi, Simeone.

³⁴ Leya yaka nawa ufumba, yasema mwana mukwo wa lunga. Leya yamba ngwenyi: “Haliabwila Yakoba malinunga ni yami mumu hinasema nenyi ana atatu a malunga.” Kashika mwana yoze yamuluka jina ngwenyi, Levi.

³⁵ Leya yaka nawa ufumba, yasema mwana mukwo wa lunga. Leya yamba ngwenyi: “Chisuho chino munguhalisa Mwene Zambi.” Kashika yamuluka jina ngwenyi, Yuda. Mba hikasemene ko nawa.