Ubutukilo 28 - Mukanda Wa Zambi 1970

¹ Isake yatambika Yakoba, yamuwahisa, mba yamwamba ngwenyi: “Mwanami, kanda umbata pwo wa mu chifuchi chino cha Kanana.

² Lilulike uye ku chifuchi cha Mesopotamia, ku limbo lia kakenu Betuele, kwenako muukambachila pwo, umwe pwo wa kuli nokotu Labane.

³ Zambi Mukwa Ndundo Jeswe akakuwahise, akakwehe ana, akakwokese ukabwe tato ya mavungu anji hano hashi.

⁴ Akakuwahise yena ni vungu lie ngwe chize awahishile Abrahama. Akakwehe chifuchi chino cha ungeji we chize ahele Abrahama, ukatwame mo.”

⁵ Isake yatuma Yakoba ku chifuchi cha Mesopotamia, maha Labane, mwana wa Betuele. Mwe Betuele te wa ku vungu lia Arame. Labane mwe ndumbwa Rebeka, naye ya Esau ni Yakoba.

Esau yambata pwo mukwo

⁶ Esau yevwa ngwo, Isake hawahisa Yakoba ni hamutuma ni kumbata pwo ku chifuchi cha Mesopotamia. Yevwa nawa ngwo, muze Isake te anawahisa Yakoba, yamulweza ngwenyi kanda ambata pwo wa mu chifuchi cha Kanana.

⁷ Esau yevwa nawa ngwo, Yakoba hononokena naye ni tato, haya ku Mesopotamia.

⁸ Mba Esau yanyingika ngwenyi, tato kuma keshi kuzanga mapwo ja mu chifuchi cha Kanana.

⁹ Ha chino yaya maha Ishmaele, mwana wa Abrahama, yambata pwo mukwo, jina lienyi Mahalate. Mwe Mahalate te mwana wa Ishmaele ni ndumbwa Nebayote.

Yakoba yalota chilota ku Betele

¹⁰ Yakoba yakatuka ku chihunda cha Bersheba, yaya mu jila, yatalikisa ku limbo lia Harane.

¹¹ Yaheta hamwe homa hanga abombe ko, mumu te tangwa hiliatoka kulu. Yanda liwe yalitenga musau.

¹² Yalota chilota, yamona ndalo yinamana hashi, songo lialio ndoo mwilu. Yamona nawa tunganda twa mwilu kaananyina ni kusunuka ha ndalo yize.

¹³ Yamona nawa Mwene Zambi kanamana hakamwihi nikwamba ngwenyi: “Nguli Mwene Zambi, Zambi ya Abrahama ni Isake. Chifuchi chino unabombo mungukakwaha cho yena ni vungu lie.

¹⁴ Vungu lie maakabwa anji ngwe mavu. Maakalitanda ku chivumbuko ni ku chitokelo, ku norde ni ku sude. Mungukawahisa akwa hashi eswe mumu hali yena ni vungu lie.

¹⁵ Nyingika ngwe, mungukabwa hamwe ni yena kweswako muuya, mungukakuhilwisa nawa ku chifuchi chino. Chichi kakwehuka ndoo mungukamanununa yilakenyo yeswe yino nakulakenya.”

¹⁶ Yakoba yalaula, yamba ngwenyi: “Haa puu! Chamwenemwene Mwene Zambi hano hali. Te chachinyingikine!”

¹⁷ Yevwa woma, yamba ngwenyi: “Homa hano hakole ni woma. Kuma he ha zuwo lia Zambi, ku chikolo cha mwilu.”

¹⁸ Yakoba yalimeneka, yanda liwe lize atengele musau, yalimika ngwe chingina, yazujila ho maji.

¹⁹ Yaluka ho ngwenyi, Betele. (Alioze jina lia chihunda hatangu Luze.)

²⁰ Mba Yakoba yalakenya ngwenyi: “Nyi Zambi makabwa hamwe ni yami ni kungufunga mu jila yino ngunende, nyi mangwaha yakulia ni mahina,

²¹ nawa nyi makanguhilwisa kanawa maha tata, mba Mwene mabwa Zambi yami.

²² Liwe lino namika ngwe chingina, mulikabwa zuwo lia Zambi. Ku yuma yeswe yize mangwaha, mungukahilwisa Chihanda chimuwika cha ku yihanda kumi.”