Ubutukilo 27 - Mukanda Wa Zambi 1970

Isake yawahisa Yakoba

¹ Isake te habwa kashinakaji, ni meso jenyi haalaa. Yatambika mwanenyi mutangu Esau, yamwamba ngwenyi, “Mwanami!” Esau ngwenyi: “Vulie tata.”

² Isake ngwenyi: “Unamono, hinabwa kulu kashinakaji, ni Chanyingikine tangwa lize mungufwa.

³ Anda uta we wa kwasa, yako mu yambu ungushihile yifwo,

⁴ ungutelekele yakulia yiyema, ngwe chize nakuzanga. Ungunehene yo ngulie, hanga ngukuwahise shimbu kanda nguchifwa.”

⁵ Rebeka te kanevu yeswe yize Isake alwezele mwanenyi Esau. Kashika muze Esau haya mu yambu ni kushihila tato yifwo,

⁶ Rebeka yambila Yakoba ngwenyi: “Hinevwa tatenu malweza Esau ngwenyi:

⁷ ‘Ngunehene yifwo, ngutelekele yakulia. Muze hinalia mba mungukuwahisa ku meso ja Mwene Zambi shimbu kanda nguchifwa.’

⁸ Haliabwila mwanami, ngwivwe. Linga chize ngunambe.

⁹ Yako mu tanga, ukwate misamba a pembe a maji. Wize no kuno hanga ngwashihe, ngwateleke ngwe chize akuzanga tatenu.

¹⁰ Umutwalile tatenu hanga alie, hanga akuwahise shimbu kanda achifwa.”

¹¹ Alioze Yakoba yambila naye ngwenyi: “Unanyingika ngwe, mujimba wa yaya Esau uli wa ukulukumbwa, alioze yami kunasenena.

¹² Hanji tata mangupapata, kumangunyingika. Nyi chocho mangumona nguli mukwa kalimbalimba, mangushinga kwami, kechi kunguwahisa.”

¹³ Naye ngwenyi: “Mwanami, Shingo lize libwe hali yami. Alioze yena, linga chize ngunakwambe, yako ungunehene pembe aali.”

¹⁴ Yakoba yaya ni kwakwata, yaanehena naye. Mba Rebeka yateleka yakulia yiyema ngwe chize akuzanga Isake.

¹⁵ Mwe Rebeka yanda mahina abema a Esau, yaajika Yakoba.

¹⁶ Yanda e makubu a misamba ja pembe, yaajingilika ha moko ni ha kota ya Yokoba kuze te kwasenena.

¹⁷ Mba yamwaha yakulia yiyema ni mbolo yize alingile.

¹⁸ Mba mwe Yakoba yanjila maha tato, yamba ngwenyi: “Tata!” Isake ngwenyi: “Ewa, yena iya, mwanami?”

¹⁹ Yakoba ngwenyi: “Tata, yami Esau, mwanenu wa mukulwana. Hinalinga yeswe ngwe chize nwangulwezanga. Hindukenu mwane, nutwame, nulie yakulia yize nanunehena hanga nunguwahise kama.”

²⁰ Isake yamuhula ngwenyi: “Ngwe kuchi hiwamona lume yifwo nikawashi chichize, mwanami?” Yakoba ngwenyi: “Mwene Zambi, Zambi yenu, mwe wangukwasa ha kuyimona.”

²¹ Isake yambila Yakoba ngwenyi: “Ngukundame mwanami, ngukupapate kama. Chamwenemwene uli mwanami Esau, nyi ka?”

²² Yakoba yakundama kuli tato, neye yamupapata. Yamba ngwenyi: “Liji lie lili ngwe lia Yakoba, alioze moko je, muze hinakupapata, ngunevu ngwe moko ja Esau.”

²³ Kanyingikine ngwenyi, kali Yakoba, mumu moko jenyi yabwa aukulukumbwa ngwe moko ja Esau. Isake yamba kumuwahisa,

²⁴ alioze yahula nawa ngwenyi: “Chamwenemwene yena uli mwanami Esau, nyi?” Yakoba ngwenyi: “Ewa, mwane.”

²⁵ Isake ngwenyi: “Ngunehene yifwo ngulie, mba hanga ngukuwahise.” Yakoba yamwaha yakulia, yamutwalila nawa vinyu.

²⁶ Mba Isake yamulweza ngwenyi: “Mwanami, ngukundame, ngushise.”

²⁷ Muze te Yakoba anashise tato, Isake yevwa vumba lia mahina jenyi, yamwamba ngwenyi: “Vumba libema lia mwanami lili ngwe vumba lia yambu yize Zambi hanawahisa.

²⁸ Zambi akakwehe mume wa kwilu, ni chinuno cha hashi. Akakwehe mbuto ni vinyu yinji.

²⁹ Mavungu akwo akakulingile, atu akwo akakuhetamine. Ukayule usoko we eswe, vungu lia naye akahetame ku meso je. Mweswawo makakushinga, neye akashingiwe. Mweswawo makakuwahisa, neye akawahe.”

Esau yaliumba kuli tato amuwahise

³⁰ Muze Isake hawahisa Yakoba, neye machituhuka mu zuwo lia tato, shimbu lizeliene Esau yahiluka ku chihunda.

³¹ Neye nawa yateleka yakulia yiyema, mba yatwalila tato. Yamba ngwenyi: “Lisesa tata, hindukenu nulie yakulia yami, yize nanunehena yami mwane, hanga nunguwahise kama.”

³² Tato Isake yamuhula ngwenyi: “Yena iya?” Esau ngwenyi: “Tata, yami mwanenu wa mukulwana, Esau.”

³³ Isake yabutuka kuchikima nganganga, ngwenyi: “Mba iya yoze wangushihila yifwo, hangunehena yo kuno? He haliabwila lume nayilia muze kanda uchiheta! Mba hinamuwahisa kulu. Kumakawaha ndoo ku miaka yeswe, chahashile kuchichiza nawa.”

³⁴ Esau yevwa kusasaminya mu mbunge ha maliji wano, yalila ni liji linene, yaliumba ngwenyi: “Tata nalemba, ni yami, nguwahise kama.”

³⁵ Isake ngwenyi: “Mwanakwenu heza kuno, hangwonga, hatambula kuwahisa che cheswe.”

³⁶ Esau ngwenyi: “Chino chisuho cha muchaali Yakoba hangwonga! Kuma jina lia Yakoba kuliamuta. Hatangu yangutambula uswana wami, ni haliabwila nawa hangutambula kuwahisa chize tata azanganga kunguwahisa nacho. Tata, kuwahisa cheswe kuchahwa lume? Nichimwe kuchasalile ko, nyi?”

³⁷ Isake yakumbulula Esau ngwenyi: “Hinamupwisa mwata we, ni usoko wenyi eswe naapwisa ngamba jenyi. Hinamwaha yakulia ni vinyu. Mba kuchi mungukulinga nawa yena, mwanami?”

³⁸ Esau yalembejeka tato ngwenyi: “Tata, nwakuwahisa lume chisuho chimuwika? Ni yami nguwahisenu kama, tata.” Mba yabutuka nawa kulila.

³⁹ Isake yamwamba ngwenyi: “Muukafulwa mume wa kwilu ni chinuno cha hashi.

⁴⁰ Muukabwa ni mwono ku tachi ja mukwale we. Muukalingila mwanakwenu. Alioze muze muukasa tachi, muukatusuka ku chiyulo chenyi.”

⁴¹ Esau yevwila kole Yakoba ha kuwahisa chize amuwahishile kuli tato. Yalinyonga mu mbunge yenyi ngwenyi: “Kwasala hakepe tulile tata. Nyi kulila hichahwa mungukashiha Yakoba.”

⁴² Alioze atu yaanyingikisa Rebeka nyonga lia mwanenyi wa mukulwana, Esau. Mba Rebeka yatambika mwanenyi wa kanuke, Yakoba, nikwamba ngwenyi: “Banjika, yayenu Esau kanafupu kulikala ha kukushiha.

⁴³ Haliabwila ngwivwe. Linga chize ngunakulweze. Chinyina maha ndumbwami Labane, ku limbo lia Harane.

⁴⁴ Ukatwame ko amwe matangwa ndoo ufwatulo wa yayenu muukatuluka,

⁴⁵ ni ndoo kuze mavulama yize hiwamulinga. Mba mungukatumina mutu ha kukusaka. Mumu yika mungufulwa ana eswe aali mu tangwa limuwika?”

Isake yatuma Yakoba maha Labane

⁴⁶ Rebeka yambila Isake ngwenyi: “Mapwo ja Esau, Ahite, haanguhongesa kuhiana. Yakoba, nyi wambata nawa pwo wa ku vungu lino lia Ahite, chibema ngufwe lume.”