Ubutukilo 26 - Mukanda Wa Zambi 1970

Isake yatunga mu limbo lia Gerare mba mu limbo lia Bersheba

¹ Mu chifuchi yimubwa nawa zala, ngwe yize yabwile ha matangwa ja Abrahama. Mba Isake yaya maha Abimeleke, mwanangana wa Afilistia, yoze te watwama mu limbo lia Gerare.

² Mwene Zambi hanalisolola kulu kuli Isake ni kumwamba ngwenyi: “Kanda uya ku chifuchi cha Egiptu, alioze twama mu chifuchi chino.

³ Twama hano, mungubwa hamwe ni yena, mungukuwahisa. Mungukwaha chifuchi chino cheswe, yena ni vungu lie. Mungukakolesa Shingo lize nalishingile ni tatenu Abrahama.

⁴ Mungukakupwisa vungu linene, ngwe matongonoshi a mwilu. Mungukaaha chifuchi chino cheswe. Ku vungu lie mungukawahisa mavungu akwo eswe,

⁵ mumu Abrahama wangwononokenene, wafungile Shimbi jami.”

⁶ Mba Isake yatunga mu Gerare.

⁷ Malunga a mu limbo lize yaahula Isake hakutwala kuli mukwo pwo. Neye yaamba ngwenyi: “Kali ndumbwami.” Mumu yevwa woma hanji malunga waze maamushiha, mba maatambula Rebeka, mumu te kali chileza ku meso.

⁸ Isake te hatwama kulu matangwa anji mu Gerare. Limwe tangwa Abimeleke, mwanangana wa Afilistia, te kanatalila ha kapenda, yamona ngwenyi Isake kanahehe ni Rebeka.

⁹ Mba Abimeleke yatambika Isake, yamuhula ngwenyi: “Yono kali mukwenu pwo, nyi? Kuchi mba unakamba ngwe: ‘Kali ndumbwami?’ ” Isake ngwenyi: “Ngunakanyonga ngwami, munungushiha nyi namba ngwami, kali mukwetu pwo.”

¹⁰ Abimeleke ngwenyi: “Kuchi mba watulinga chichize? Nyi umwe wa kuli yetu unakalimona nenyi, te muutwamba ngwe: ‘Kali atu abi,’ alioze kuma mulonga uno uli wa yena mwene.”

¹¹ Abimeleke yambila atu eswe ngwenyi: “Nyi umwe wamwesa lamba mutu yono ni mukwo pwo, mutu yoze chamutamba kufwa.”

¹² Isake yalima minda mu chifuchi chize. Mwene Zambi yamuwahisa, mba ha mwaka uzewene minda yenyi yiyima mbuto yinji kuhiana.

¹³ Isake yalibichisa ndoo yabwa pichi munene.

¹⁴ Afilistia yaamuvwila chipululu mumu yabwa ni mapanga ni ngombe ni ndungo anji.

¹⁵ Kashika Afilistia yaashikila mashima ja meya eswe waze Abrahama, tato ya Isake, afulile ni ngamba jenyi.

¹⁶ Mba Abimeleke yambila Isake ngwenyi: “Katukenu mu chifuchi chetu. Hinwatuhiana tachi.”

¹⁷ Mba Isake yakatuka mu chifuchi chize, yaya ni kutunga mu chana cha Gerare.

¹⁸ Abrahama, ha matangwa jenyi, yafula mashima a meya. Alioze muze hafwa, Afilistia yaashikila. Mba Isake yaashikulula nawa, yaaluka majina waze ene aalukile tato.

¹⁹ Ngamba ja Isake yaafula shima likwo mu chana chize, yaawana shima libema liakuvelwoka.

²⁰ Tufunga twa Gerare yaazwelesa tufunga twa Isake ngwo: “Shima lino ni lietu.” Kashika Isake yaluka shima lize ngwenyi; Kuzwela, mumu amuzwelesele.

²¹ Ngamba ja Isake yaafula nawa shima likwo. Afilistia yaalizwelela nawa. Isake yaliluka jina ngwenyi, Kole.

²² Neye yakatuka ko, yaya ni kufula likwo. Chisuho chino Afilistia kaazwelesele ko nawa. Kashika yaliluka jina ngwenyi, Chihela Chinene, mumu yamba ngwenyi: “Haliabwila mba Mwene Zambi hatwaha chihela chinene mu chifuchi chino, kuma mututwama kwetu kanawa.”

²³ Isake yakatuka ko, yaya ku limbo lia Bersheba

²⁴ Ha ufuku uzewene Mwene Zambi yamusolokela, yamwamba ngwenyi, “Kanda wivwa woma. Nguli Zambi ya tatenu Abrahama, nguli hamwe ni yena. Mungukakuwahisa, mungukokesa vungu lie mumu hali kavumbi kami Abrahama.”

²⁵ Isake yatunga ko chilumbilo, mba yawayila Mwene Zambi. Homa haze yajika ho zuwo lienyi lia makubu, ni ngamba jenyi yaafula shima likwo lia meya.

Isake ni Abimeleke yaakolesa Usendo

²⁶ Abimeleke yakatuka ku limbo lia Gerare, hamwe ni mukwa kuyula, Ahuzata, ni mwata wa tujita twenyi Fikole, yeza ni kunangisa Isake.

²⁷ Isake yaahula ngwenyi: “Kuchi, nuneza ni kungunangisa, nyi? Ngwami, te nwakunguvwila kole yinunguhuma mu chifuchi chenu.”

²⁸ Ayo ngwo: “Mumu hitwamona ngwetu, Mwene Zambi kali hamwe ni yena. Kashika twanyonga ngwetu, chinalite tukalikunde ni Shingo hakachi ka yetu ni yena tukakolese Usendo.

²⁹ Tunazange ulishinge ngwe, kuuchi kutulinga chibi, ngwe chize yetu kutwakulingile ko chibi. Twakulingile kanawa, yitwamba ngwetu, yako ni sambukila. Haliabwila chinamoneka zwalala Mwene Zambi hanakuwahisa.”

³⁰ Isake yaalingila chiwanyino. No yaalia, yaanwa.

³¹ Yaalimeneka chichamene, yaalishinga. Mba Isake yaalishika no, no yaakatuka ni sambukila.

³² Ha tangwa lizeliene ngamba ja Isake, waze te anafulu shima lia meya, yeeza ni kumulweza ngwo: “Hitwawana meya.”

³³ Isake yaluka shima lize ngwenyi, Sheba. Kashika akuvuluka limbo lize ngwo, Bersheba.

Esau yambata mapwo a mavungu

³⁴ Esau te habwa ni miaka makumi awana muze ambachile mapwo aali Ahite: Judite, mwana wa Beri, ni Basemate, mwana wa Elone.

³⁵ Mapwo wano aali yeevwisa Isake ni Rebeka chinyengo chinji.