Ubutukilo 25 - Mukanda Wa Zambi 1970

Mavungu akwo a Abrahama

¹ Abrahama yambata nawa pwo mukwo, jina lienyi Ketura.

² Yasema nenyi ana wano: Zimrane, ni Jokshane, ni Medane, ni Midiane, ni Ishbake, ni Shua.

³ Jokshane yasema Sheba ni Dedane. Wano e mavungu ja Dedane: Ashurime, ni Aletushime, ni Aleumime.

⁴ Midiane yasema ana a malunga wano: Efa ni Efere, ni Hanoke, ni Abida, ni Elda. Wano eswe te vungu lia Ketura.

⁵ Yuma yize yeswe te abita Abrahama, yamwaha yo Isake.

⁶ Alioze muze te Abrahama kanda achifwa, ana malunga waze asemene ni mapwo akwo, yaahaha yawana. Mba yaalweza ha kuhichika chifuchi cha Isake ni kuya ku chifuchi cha ku sali lia chivumbuko.

Abrahama yafwa, Isake ni Ishmaele yaamufunda

^7-8 Abrahama yatwama miaka kulakaji ni makumi shimbiali ni yitano. Yatwama miaka yinji ni yibema nawa, mba yafwa kwenyi.

⁹ Ana jenyi, Isake ni Ishmaele, yaamufunda mu chivwenge cha Makapela, mu tungu lize liabwile te lia Efrone, mwana wa Zohare, wa ku vungu lia Hite. Tungu lize liabwile ku sali lia chivumbuko ku limbo lia Mamre.

¹⁰ Tungu lize alanjile Abrahama kuli Ahite. Kwenako afunjile Abrahama ni mukwo pwo Sara.

¹¹ Muze Abrahama hafwa, Zambi yawahisa Isake. Isake te katwama hehi ni Shima lia Zambi wa Mwono Yoze Wakungumona.

Vungu lia Ishmaele

¹² Atu wano kaali vungu lia Ishmaele. Ishmaele te mwana wa Abrahama yoze asemene ni Hagare, mukwa Egiptu. Hagare neye te ndungo ya Sara.

¹³ Majina ja ana ja Ishmaele a malunga nikulita ni kusemuka cho wano: mwana mutangu Nebayote, ni Kedare, ni Adbele, ni Mibsame,

¹⁴ ni Mishma, ni Duma, ni Masa,

¹⁵ ni Hadade, ni Tema, ni Jeture, ni Nafishi, ni Kedema.

¹⁶ Atu wano kaali tushakulu twa mavungu kumi ni aali. Majina jo e majina ja yihunda yo ni ye misumba yo.

¹⁷ Ishmaele te habwa ni miaka kulakaji ni makumi atatu ni shimbiali, mba yafwa kwenyi.

¹⁸ Vungu lia Ishmaele te kaatwama hakachi ka chifuchi cha Havila ni chihunda cha Shure, ku sali lia chivumbuko cha chifuchi cha Egiptu, ku jila ya kuya ku chifuchi cha Asuria. Te keeshi kutwama hehi ni mavungu akwo ja Abrahama.

Kusemuka cha Esau ni Yakoba

¹⁹ Jino je sango ja Isake, mwana wa Abrahama.

²⁰ Isake te habwa ni miaka makumi awana muze ambachile Rebeka, ndumbu ya Labane, mwana wa Betuele. Mwe Betuele wa ku chikota cha Arameane mu chifuchi cha Mesopotamia.

²¹ Rebeka, pwo lia Isake te mumba. Kashika Isake yaliumba kuli Mwene Zambi mumu hali iye. Neye yamwivwa, mba Rebeka yaka ufumba.

²² Muze te ana a pasa analitachika mu jimo lienyi, Rebeka yamba ngwenyi: “Mumu yika Chuma chino?” Yahula Mwene Zambi ha chikuma chino.

²³ Neye yamukumbulula ngwenyi: “Mavungu aali ali mu jimo lie. Muukasema mavungu aali waze maakalitachika. Vungu limuwika maakabwa ni tachi kuhiana likwo. Vungu lia mukulwana maakalingila vungu lia kanuke.”

²⁴ Muze tangwa lia kusema hiliaheta, Rebeka yasema ana a pasa

²⁵ Mwana mutangu muchila, mukwa ukulukumbwa. Yaamuluka ngwo, Esau.

²⁶ Mwana wa muchaali, ha kusemuka chenyi, te kanakwata ku kashijino ka yayo Esau. Yaamuluka ngwo, Yakoba. Muze asemukine ana waze Isake te habwa ni miaka makumi asambano.

Esau yalanjisa wata wenyi

²⁷ Ana ja Isake yaakola. Esau yabwa yanga munene te kakwenda mu yambu. Alioze Yakoba te chihumikiji, mukwa kunamina ha chihunda.

²⁸ Isake te kakuzanga Esau kuhiana mumu ha yifwo yize akumushihila, alioze Rebeka yazanga Yakoba kuhiana.

²⁹ Limwe tangwa Yakoba te kanateleka mutato. Esau yakatuka mu yambu kuze ayile ni kuzomba, yeza, te hijamuhwa kuhiana.

³⁰ Mba yambila Yakoba ngwenyi: “Zala yinji ngunevu, ngwehe kama mutato uze uchila, ngulie kama.” (Kashika yaluka Esau jina likwo ngwo, EDOME.)

³¹ Alioze Yakoba ngwenyi: “Kuheshi Chuma, mungukwaha mutato uno nyi wangulanjisa uswana we.”

³² Esau ngwenyi: “Ngunafu ni zala, uswana chika muungukwasa?”

³³ Yakoba ngwenyi: “Achilishinge.” Esau yalishinga, yalanjisa uswana wenyi kuli Yakoba.

³⁴ Yakoba yamwaha mbolo ni mutato. Esau yalia, yanwa, mba yaya kwenyi. Chenacho Esau alelesele wata wenyi.