Ubutukilo 24 - Mukanda Wa Zambi 1970

Abrahama yambachila Isake pwo

¹ Abrahama te habwa kashinakaji. Mu mwono wenyi weswe Mwene Zambi yamuwahisa.

² Abrahama yatambika kavumbi kenyi, mwe mukulwana te wakutala yikumba yenyi yeswe. Yamwamba ngwenyi: “Sako kwoko lie mu molu jami ulishinge ku meso ja Zambi.

³ Ngunazange ulishinge ku meso ja Mwene Zambi ya lilu ni hashi ngwe, kuuchi kambachila mwanami pwo wa kuli Akanana wano natwama no.

⁴ Alioze hiluka ku chifuchi chami, kwenako muukafupila Isake pwo.”

⁵ Kavumbi yamuhula ngwenyi: “Nyi mwe mwana pwo kechi kutayiza kuhichika limbo lienyi ha kwiza kuno, Changutamba kuya ni mwane ku chifuchi chenu, nyi?”

⁶ Abrahama ngwenyi: “Hi chocho ko! Kuwahashile kutwala mwanami ku chifuchi chami.

⁷ Mwene Zambi, Zambi ya mwilu, hananguchiza mu chifuchi cha tata ni cha usoko wami, yanguneha kuno. Yalishinga ngwenyi, makahana chifuchi chino kuli vungu liami. Mwenawo makatuma kanganda kenyi ka mwilu ha kufupila mwanami pwo.

⁸ Nyi mwe pwo kazangile kwiza ni yena, yena muusamba kwe ku Shingo lino. Alioze Chuma chimuwika, kanda ukaya ni mwanami ku chifuchi chetu.”

⁹ Chenacho kavumbi asele kwoko mu molu ja mwene wenyi Abrahama, mba yalishinga nikulita ni liji Ha Abrahama.

¹⁰ Mwe kavumbi yanda tushitu anene tumelu kumi twa mwata wenyi Abrahama, yaya ni yawana yilemu yeka ni yeka ku limbo Ha Nahore, yayo ya Abrahama, mu chifuchi cha Mesopotamia.

¹¹ Muze hakundama ku limbo lize yautamisa tumelu hashi ku shima Ha meya. Yaheta ko chingoloshi, ha shimbu lize akwiza mapwo ni kutaha meya.

¹² Mba mwe kavumbi yalemba Zambi ngwenyi: “Mwene Zambi ya mwata wami Abrahama, ngunaliumbu ungukwase kama musono uno ha kumanununa maliji waze wahanjikile ni mwata wami Abrahama.

¹³ Kuno ngunamana ku shima lia meya, kukuli kuma kuze ana mapwo a limbo lino akwizaza ni kutaha meya.

¹⁴ Mungwambila umwe mwana pwo ngwami: ‘Nalemba, tula mulondo we ngunwe kama meya.’ Nyi mangwamba ngwenyi: ‘Nwako, mungunwisa nawa tumelu,’ mwenawo abwe kama pwo lia kavumbi ke Isake. Nyi yino yeswe yaabwa ngwe chino, mba mungunyingika ngwami, hiwamanununa maliji waze wahanjikile ni mwata wami Abrahama.”

¹⁵ Muze te kanda achimanununa kulemba, Rebeka yaheta ni mulondo wa meya ha yipaya. Tato Betuele. Betuele yono te mwana wa Milka, pwo lia Nahore, yayo ya Abrahama.

¹⁶ Rebeka wabwile mwana pwo mubema kuhiana, te kanda alimona kwenyi ni lunga. Yapalumuka ku shima lia meya, yazalisa mulondo wenyi, yakanduka.

¹⁷ Mwe kavumbi yazomboka fuji ni kutakana ni Rebeka. Yamwamba ngwenyi: “Nalemba, nyi unazange, ngwehe kama meya ngunwe.”

¹⁸ Rebeka ngwenyi: “Nwenu mwane,” yatambuka yaheteka mulondo, yamunwisa meya.

¹⁹ Muze mwe kavumbi hanwa, Rebeka yamba ngwenyi: “Mungutahila nawa tumelu twe ndoo pwila muyihwa.”

²⁰ Yatumbuka yapukumwina meya mu chingolongolo, yazomboka nawa ku shima, yatahila tumelu twenyi meya eswe lukombo.

²¹ Mwe kavumbi te kanatale Rebeka nee, akanyingike nyi Mwene Zambi hawahisa jila yenyi nyi ka.

²² Muze Rebeka hamanununa kunwisa tumelu, mwe lunga yanda kazeya wa oru wa ndando yinji, yamusa ha mazulu ja Rebeka. Yanda nawa mikosa yaali yinene yinene, yayijika ku moko ja Rebeka.

²³ Yahula Rebeka ngwenyi: “Nalemba, tatenu iya? Maha tatenu mukumoneka kama mihela ya kubomba yami ni atu jami, nyi?”

²⁴ Rebeka ngwenyi: “Nguli mwana wa Betuele, yoze Nahore asemene ni Milka.

²⁵ Maha tata yakulia ni yambu ya tushitu yinji yiliko, ni mihela kuyili.”

²⁶ Mwe lunga yahetama, yawayila Mwene Zambi

²⁷ ngwenyi: “Mwene Zambi wa mwata wami Abrahama afumane, mumu hamanununa yilakenyo yeswe yize alakenyene mwata wami. Hiwanguneha ndoo kuno ku limbo lia usoko wa mwata wami.”

²⁸ Mwe mwana pwo yazomboka ndoo ku zuwo lia naye, yaalumbunwina sango jeswe.

^29-30 Labane, ndumbwa Rebeka, yamona kazeya ni mikosa yize te anazala Rebeka. Yatuhuka nikawashi, yazomboka ku shima lia meya kuze te anamana mwe kavumbi ni tumelu twenyi.

³¹ Labane yamulweza ngwenyi: “Njila. Kuchi mba unamana haze? Tuye ku zuwo, hinakululikila kulu muhela. Ni ubombo wa tushitu newo kuuli. Mwene Zambi hakuwahisa.”

³² Mba mwe kavumbi ka Abrahama yanjila. Labane yachiza yuma yize yabwile ha tumelu, yaaha yambu ni yakulia yikwo. Mba yanehena lunga yoze meya asane ku molu, hamwe ni atu jenyi.

³³ Yaanehena nawa yakulia. Alioze kavumbi ka Abrahama yamba ngwenyi: “Hatangu mungwambulula yize ngunakaula.” Labane ngwenyi: “Kuheshi Chuma. Hanjikenu kwenu.”

³⁴ Lunga yoze ngwenyi: “Nguli kavumbi ka Abrahama.

³⁵ Mwene Zambi hanawahisa mwata wami kuhiana, hanamupwisa pichi munene. Hanamwehe yimuna yeka ni yeka; pembe, ni mapanga, ni ngombe, ni tumelu, ni yimbulu. Hanamwehe nawa mbongo ja prata ni oru. Mwata wami Abrahama kakwete nawa ndungo a mapwo ni a malunga.

³⁶ Sara, mwazovu wa mwata wami, hanaseme nenyi mwana wa lunga muze te habwa kulu kashinakaji. Mba mwata wami hanahana yuma yeswe yize abichile kuli mwe mwanenyi.

^37-38 Mwata wami yangushingisa ngwenyi: ‘Kanda umbachila mwanami pwo mu chifuchi chino cha Kanana, muma muze natwama. Alioze yako ku chifuchi cha tata ni kumumbachila ko pwo.’

³⁹ Alioze yinguhula mwata wami Abrahama ngwami: ‘Mba nyi mwe pwo kechi kazanga kwiza ni yami kuno kuchi mungukalinga?’

⁴⁰ Iye ngwenyi: ‘Mwene Zambi yoze nakwononokena ndoo ni musono uno, makakutumina kanganda kenyi ha kukukwasa. Ha chino ukafupile mwanami pwo mu chifuchi cha tata.

⁴¹ Nyi walinga chize nakwamba, nawa nyi usoko wami kaasolo, mba muutusuka ku Shingo liami.’

⁴² “Musono, muze naheta ku shima lia meya, nalembanga Zambi ngwami: ‘Aa Mwene Zambi, Zambi ya mwata wami Abrahama, nalemba ngukwase kama ku chize ngunambe kulinga.

⁴³ Kuno kuli kuma akutahila meya. Nyi umwe mwana pwo meza ni kutaha meya mungumwamba ngwami: Nalemba, ngwehe kama meya ngunwe,

⁴⁴ nyi mangwamba ngwenyi: Nwako, mungunwisa nawa tumelu twe, mba mungunyingika ngwami, kuma mwenawo Mwene Zambi anazange kubwa pwo lia Isake, mwana wa mwata wami.’

⁴⁵ Mba muze te kanda nguchimanununa kulemba mu mbunge yami, yingumona Rebeka kaneza ni mulondo ha chipaya. Yapalumuka ku shima ni kutaha meya. Yingumwamba ngwami: ‘Nalemba, ngwehe kama meya ngunwe.’

⁴⁶ Yaheteka mulondo wenyi nikawashi, ngwenyi: ‘Nwako, mungunwisa nawa tumelu twe.’ Chenacho nanwanga, neye yanwisa nawa tumelu.

⁴⁷ Yingumuhula ngwami: ‘Tatenu iya?’ Yangulweza ngwenyi: ‘Nguli mwana wa Betuele, yoze Nahore asemene ni Milka.’ Mba yingumusa kazeya ha mazulu jenyi.

⁴⁸ Yinguhetama, yingufulamana, yinguwayila Mwene Zambi. Yingumuchichimieka ngwami: ‘Aa Mwene Zambi, Zambi ya mwata wami Abrahama, yena unakangufunga kanawa mu jila, yena nawa wanguhetesa kanawa mu limbo lia yayo ya mwata wami Abrahama, kuze hinawana pwo lia Isake.’

⁴⁹ Haliabwila, nyi hinwatayiza ni mbunge yibema maliji ja mwata, ngulwezenu. Nyi ka, mba hanga ngunyingike chize mungulinga.”

⁵⁰ Labane ni Betuele yaamukumbulula ngwo: “Chuma chino cha kuli Mwene Zambi iye mwene, yetu kutushi ni chize mutwamba.

⁵¹ Rebeka mwenawu. Mwande uye nenyi, akabwe pwo lia mwana wa mwata we ngwe chize Mwene Zambi hachamba kulu.”

⁵² Muze mwe kavumbi hevwa maliji waze, yafulamana, yawayila Mwene Zambi.

⁵³ Mba yanda mahina ni yingeliengelie ya prata ni oru, yamwaha yo Rebeka. Yamwaha nawa yuma ya ndando yinji. Yahana nawa yawana kuli ndumbu ya Rebeka ni kuli naye.

⁵⁴ Mba kavumbi ka Abrahama ni atu jenyi waze ejile nenyi, yaalia, yaanwa, mba yaaya ni kubomba. Chichamene muze haahinduka, mwe kavumbi yamba ngwenyi: “Tushikenu tuye kuli mwata wetu.”

⁵⁵ Alioze ndumbwa Rebeka ni naye yaamba ngwo: “Mwana pwo achitwame kama kuno amwe matangwa, mba munuya.”

⁵⁶ Alioze mwe kavumbi ngwenyi: “Nalemba mala, kanda nutukwika. Mwene Zambi hawahisa wenyi wetu. Tushikenu hanga tuye kuli mwata wetu.”

⁵⁷ Mba ayo ngwo: “Achimanenu, tuchitambike mwe mwana pwo, tumuhule yize ananyongo.”

⁵⁸ Yaatambika Rebeka, yaamuhula ngwo: “Unazange kuya ni lunga yono, nyi?” Rebeka ngwenyi: “Ewa.”

⁵⁹ Mba yaashika Rebeka ni ngamba yenyi wa pwo ha kuya ni kavumbi ka Abrahama.

⁶⁰ Yaawahisa Rebeka ni maliji wano ngwo: “Yena ndumbwetu, ukabwe semi wa tununu ni tununu. Vungu lie akakumbe akwa kole jo.”

⁶¹ Hohene Rebeka, hamwe ni yikwashi jenyi a mapwo, yanyina ha tumelu, mba kavumbi ka Abrahama ni ayo eswe yaabwila mu jila.

⁶² Ha tangwa lize Isake haheta ku shima lia meya lia Zambi wa Mwono Yoze Wakungumona, te mu sude ya Kanana mwe atwama.

⁶³ Chingoloshi te kanendangana mu tungu ni kushinginyeka, yamona tumelu kaaneza.

⁶⁴ Rebeka neye yahetuka, yamona Isake. Rebeka yasunuka ha kamelu kenyi,

⁶⁵ mba yahula mwe kavumbi ngwenyi: “Auze uneza mu tungu ni kutubatwiza, iya?” Yamukumbulula ngwenyi: “Mwe mwata wami.” Mba Rebeka yanda chitambala akalifuke ku meso.

⁶⁶ Mwe kavumbi yalubunwina Isake yuma yeswe yize halinga.

⁶⁷ Isake yatwala Rebeka mu zuwo lia makubu lize ahichikile naye, yamumbata. Isake te kakuzanga Rebeka kuhiana, kashika chinyengo cha kufwa cha naye yichimuhwa.