Ubutukilo 23 - Mukanda Wa Zambi 1970

Sara yafwa, Abrahama yalanda mavu ha kumufunda mo

¹ Sara yatwama miaka 127,

² mba yafwila mu limbo lia Hebrone mu chifuchi cha Kanana. Abrahama yalinyenga ni kulila pwo lienyi.

³ Mba Abrahama yakatuka kuli mufu wenyi, yambila Ahite ngwenyi:

⁴ “Hano nguli chilambala, nguli ngeji hakachi kenu. Nyi nunazange ngulanjisenu hamwe homa hanga ngufunde kama mufu wami.”

⁵ Ahite yaamukumbulula ngwo:

⁶ “Twalemba mwane, ivwenu. Yenu nuli mwata munene mu chifuchi chetu, nunahase kufunda mukwenu pwo mu fuka lize munutongola. Niumwe hakachi ketu manumina homa lienyi.”

⁷ Abrahama yahetama ku meso jo,

⁸ yaamba ngwenyi: “Nyi hinwatayiza ngwenu ngufunde mufu wami hano, hulenu Efrone, mwana wa Zahore,

⁹ nyi mazanga kungulanjisa chivwenge cha Makapela chize chili ku songo lia munda wenyi. Angulanjise cho ku meso jenu ni ndando yeswe yize mazanga, hanga chibwe chifuka cha kufunda afu jami.”

¹⁰ Te ni mwe Efrone kali hakachi ka Ahite waze ali ku chikolo cho chipanga cha limbo, kuze kwakutakanyina atu. Mba yambila Abrahama ku meso ja atu eswe ngwenyi:

¹¹ “Hi chocho ko mwanangana, ngwivwenu. Hi chivwenge wika ko, alioze ni lie tungu Heswe ngunwehe lio ku meso ja atu eswe, hanga nufunde mo mufu wenu.”

¹² Abrahama yahetama,

¹³ mba yambila Efrone ku meso ja akwa chifuchi eswe ngwenyi: “Banjikenu, ngunalande tungu lieswe. Tayizenu ngunufwete mbongo, mba hanga nguye ngufunde mo mufu wami.”

¹⁴ Efrone ngwenyi:

¹⁵ “Nalemba mwata, katungu kano kakufwika kulakaji jiwana ja mbongo ja prata. Yeenu nufunde mufu wenu.”

¹⁶ Abrahama yatayiza, mba yalula mbongo 400 ja prata, ndando yenayo echile Efrone ku meso ja Ahite eswe.

¹⁷ Chenacho tungu Ha Efrone ku Makapela, ku sali lia chivumbuko ku limbo lia Mamre, yilibwa tungu Ha Abrahama. Yuma yeswe yize yabwile mo: tungu, ni chivwenge, ni ye mitondo yeswe, yiibwa ya Abrahama.

¹⁸ Ahite eswe waze abwile homa haze akutakanyina atu ku chikolo cha limbo, yaanyingika ngwo, chifuchi chino haliabwila kuma hichabwa cha mbala cha Abrahama.

¹⁹ Mwabwamuze Abrahama yafunda mukwo pwo Sara mu chivwenge chize mu chifuchi cha Kanana.

²⁰ Chenacho tungu ni che chivwenge yize yabwile ya Ahite hatangu, yiibwa ya Abrahama ha kufunda mo afu jenyi.