Ubutukilo 22 - Mukanda Wa Zambi 1970

Zambi yalweza Abrahama ha kulambula mwanenyi Isake

¹ Kulutwe lia amwe matangwa Zambi yeseka Abrahama. Yamutambika ngwenyi: “Abrahama!” Abrahama ngwenyi: “Ewa, mwane.”

² Zambi ngwenyi: “Anda mwana yono Isake, yoze wakuzanga kuhiana, yako nenyi ku chifuchi cha Moria, ukangula mbule ye ha mulundu uze mungukakulweza.”

³ Abrahama yalimeneka, yachaya kunyi ja kwochela mulambu, yajikashila ha chimbulu, yabwila mu jila hamwe ni Isake ni ngamba jenyi aali. Yaaya kuma kuze amulwezele Zambi.

⁴ Ha tangwa lia muchitatu Abrahama yahetuka, yamona kuma kuze kusuku.

⁵ Mba yambila ngamba jenyi ngwenyi: “Salenu hano ni chimbulu, yami ni mwana tunayi akuze ni kuwayila Zambi, mba mutuhiluka.”

⁶ Abrahama yatwika Isake kunyi ajimbate. Iye mwene yambata kahia ni poko. Yaaya hamuwika.

⁷ Ha shimbu likepe Isake ngwenyi: “Aa tata!” Abrahama ngwenyi: “Ewa mwanami.” Isake ngwenyi: “Kunyi ni kahia tuli nayo, alioze mwana panga yoze mutulambula yolihi mba?”

⁸ Abrahama ngwenyi: “Zambi mwene matwaha panga wa mulambu wa kwocha.” Mba yaaya.

⁹ Muze haaheta homa haze Zambi amulwezele, Abrahama yatunga ko chilumbilo, yatengeka ho kunyi, yakasa mwanenyi Isake, yamusa ho.

¹⁰ Mba yanda poko ha kushiha Isake.

¹¹ Alioze kanganda ka Mwene Zambi yatambika ngwenyi: “Abrahama, Abrahama!” Iye ngwenyi: “Ewa mwane.”

¹² Kanganda ngwenyi: “Kanda umulemeka, kanda umulinga chibi. Haliabwila ngunanyingika ngwami, kuma wakulemesa Zambi, mumu kuwalitunyine kulambula mwane mulambu kuli Zambi, chibwe kali lume umuwika.”

¹³ Abrahama yahetuka yamona kuji a panga kanasakaminya mbinga mu lutandulwila. Yaya ni kumukwata, yamulambula mulambu wa kwocha kuli Zambi ha kusalakana mwanenyi.

¹⁴ Abrahama yaluka homa haze jina ngwenyi: “Mwene Zambi Kakuhana.” Kashika ndoo ni musono atu akwamba ngwo: “Ha mulundu wenyi Mwene Zambi kakuhana.”

¹⁵ Kanganda ka Mwene Zambi yatambika Abrahama chisuho cha muchaali ngwenyi:

¹⁶ “Mwene Zambi kanambe ngwenyi: ‘Hinalishinga mu jina lia yami mwene, mumu ha Chuma chino hiwalinga, kuwalitunyine kungulambula mwane, chibwe kali lume umuwika,

¹⁷ mungukakuwahisa, mungukokesa vungu lie. Maakabwa ngwe matangonoshi a mwilu hanji ngwe masekeseke a ku mbumbulu ya kalunga lwiji. Maakakumbakumba akwa kole jo.

¹⁸ Mba akwa hashi eswe maakazanga ngwawahise ngwe chize hinawahisa yena, mumu yena hiunononoka ku maliji jami.’ ”

¹⁹ Abrahama yahiluka, yaya ni kuwana ngamba jenyi. Mba ayo eswe yaaya ku limbo lia Bersheba, kuze te atunga Abrahama.

Vungu lia Nahore

²⁰ Ha matangwa akepe, Abrahama yevwa ngwo, Milka hanaseme ana ni mwanakwenu Nahore.

²¹ Majina jo wano: mwana mutangu Uze, ni mwanakwo Buze, ni Kemuele tato ya Arame,

²² ni Chesede, ni Hazo, ni Pildashe, ni Jidlafe, ni Betuele

²³ tato ya Rebeka. Milka yasema ana a malunga wano nake ni lunga lienyi Nahore, yayo ya Abrahama.

²⁴ Reuma, temena ya Nahore, neye yasema ana wano: Teba, Gahame, ni Tahashe, ni Maka.