Ubutukilo 21 - Mukanda Wa Zambi 1970

Kusemuka cha Isake

¹ Mwene Zambi yawahisa Sara ngwe chize ambile.

² Sara yaka ufumba, yasema mwana wa lunga muze te Abrahama habwa kwenyi kashinakaji. Mwana yasemuka mu kakweji yoze alakenyene Zambi.

³ Abrahama yaluka mwanenyi ngwenyi, Isake,

⁴ ni muze mwana habwa ni matangwa nake, tato Abrahama yamupwisa ngalami ngwe chize amulwezele kuli Zambi.

⁵ Abrahama te habwa ni miaka 100 muze asemene Isake.

⁶ Sara ngwenyi: “Zambi hangusehesa, hangukwasa. Mweswe mutu mevwa sango jino, kumaseha hamwe ni yami.”

⁷ Yamba nawa ngwenyi: “Iya wahashile kwambila Abrahama ngwenyi: ‘Sara mamwisa ana?’ Alioze chibwe Abrahama habwa kulu kashinakaji, hinasema nenyi mwana.”

⁸ Isake yatatuka, mba muze hasumuka yamulingila chiteleka chinene.

Abrahama yahanga Hagare ni Ishmaele

⁹ Limwe tangwa Ishmaele, mwana yoze Abrahama asemene ni Hagare, mukwa Egiptu, te kanalenye Isake, mwana wa Sara.

¹⁰ Muze Sara hachimona yalweza Abrahama ngwenyi: “Huma ndungo yono wa pwo hamwe ni mwanenyi. Mwana yono wa ndungo kahashile kuhinga hamwe ni mwanami Isake.”

¹¹ Maliji wano yeevwisa Abrahama chinyengo mu mbunge, mumu Ishmaele neye te kali mwanenyi.

¹² Alioze Zambi yambila Abrahama ngwenyi: “Kanda uchivwila chinyengo. Linga cheswe chize anambe Sara, mumu Isake makakusemena mavungu ngwe chize nakulakenyene.

¹³ Ni mwe mwana wa ndungo yono, neye ana anji mungukamwaha, no kumaakabwa vungu linene, mumu Ishmaele kali nawa mwane.”

¹⁴ Abrahama yalimeneka, yanda mbolo ni mulondo unazala too ni meya, yayitwika ha yipaya ya Hagare, mba yashika Hagare ni mwanenyi. Hagare yakatuka, yaya ni kwendangana mu puya ya Bersheba.

¹⁵ Muze meya hahwa mu chikashi Hagare yahichika mwana mushi lia chimwe chibuta,

¹⁶ yaya ni kutwama ha talanganyi, alioze yihabwa kapinji ngwe kwasa cha mwivu, mumu yamba ngwenyi: “Chazangile kumona chize mwana masutula mwono.” Mba yabutuka kulila.

¹⁷ Zambi yevwa chize te mwana analili, Hagare yevwa liji lia kanganda ka mwilu ngwenyi: “Hagare, kuchi? Kanda wivwa woma, Zambi hevwa kulila cha mwane.

¹⁸ Katuka, yako uholese mwana. Mungumupwisa vungu linene.”

¹⁹ Hohene Zambi yalawisa meso ja Hagare, mba yamona shima lia meya. Yaya, yataha meya mu chikashi, yanwisa mwana.

²⁰ Mwana yatatuka, yatwama mu puya ya Parane. Iye te yanga ni uta wenyi wa manana. Zambi yabwa hamwe nenyi.

²¹ Naye yamumbachila pwo wa ku chifuchi cha Egiptu.

Abrahama yakolesa Usendo ni Abimeleke

²² Ha matangwa waze Abimeleke ni Fikole, mwata wa tujita twa Abimeleke, yeeza nikwambila Abrahama ngwo: “Zambi kali hamwe ni yena mu yeswe yize wakulinga.

²³ Kashika haliabwila, lishinge ku meso ja Zambi ngwe, kuuchi kungwonga yami, chibwe ana jami, chibwe ajikulu jami. Nguli sepa lie, kashika lishinge ngwe, yena muubwa sepa liami ni lia waze ali mu chifuchi chino watwama.”

²⁴ Abrahama yatayiza.

²⁵ Mba Abrahama yaketeka Abimeleke ha shima lia meya lize ngamba jenyi atambwile ku tachi.

²⁶ Abimeleke ngwenyi: “Chanyingikine yuma yize. Nyi yena kuwangulwezele yo, kachi chayivwile ko ndoo ni musono.”

²⁷ Hohene Abrahama yamwaha Abimeleke amwe mapanga ni ngombe. Mba ayo aali yaakolesa Usendo wo.

²⁸ Abrahama yasa ana mapanga shimbiali a yihwo ha ukawo.

²⁹ Abimeleke yamuhula ngwenyi: “Kuchi wachiza ana mapanga wano?”

³⁰ Abrahama ngwenyi: “Tambula ana mapanga wano a yihwo ha kunyingika ngwe, yami Abrahama nafulile shima lino lia meya.”

³¹ Mba yaaluka homa haze jina ngwo, Bersheba, mumu lienalio eswe aali alishingilile.

³² Muze haakolesa Usendo ku limbo lia Bersheba, Abimeleke ni Fikole yaahiluka ku chifuchi cha Afilistia.

³³ Mba Abrahama yatumba mitondo homa haze, yawayila Mwene Zambi Wa Miaka Yeswe.

³⁴ Abrahama yatwama matangwa anji mu chifuchi cha Afilistia.