Ubutukilo 2 - Mukanda Wa Zambi 1970

^1-2 Chenacho ha tangwa lia muchisambano Mukulu Zambi amanunwine kutanga lilu ni hashi, ni yuma yeswe yilimo. Mba ha tangwa lia muchishimbiali yanama.

³ Neye yawahisa tangwa lize, yalipwisa lia chijila, mumu ha tangwa lize yanama ku milimo yenyi.

⁴ Chenacho Mukulu Zambi atangile yuma yeswe. Muze Mwene Zambi atangile lilu ni hashi,

Munda wa Edene

⁵ hashi te kuheshi mutondo niumwe, chibwe chambu, mumu te Mukulu Zambi kanda achinokesa vula hashi, ni mutu niumwe kabwile ko ha kulima hashi.

⁶ Chibwe te vula kanda yinoka, hindu mbundu te yakukakumuka ni kutuchikisa hashi heswe.

⁷ Mba Mwene Zambi yanda mukamo wa mavu, yawumba mutu, yamuhwimina mwiku wa mwono mu mazulu, mba mutu yabwa ni mwono.

⁸ Mba Mwene Zambi yalima munda ku chivumbuko mu Edene. Yasamo mutu yoze awumbile.

⁹ Mba ha mavu Mwene Zambi yasokesa ho mitondo yeswe yibema ku meso, ni yize yibema ni kulia. Hakachi ka munda yasokesa mutondo uze wakuhana mwono, ni mutondo uze wakuhana mana akunyingika no yibema ni yibi.

¹⁰ Mu munda wa Edene mwabwile lwiji yoze te wakutuchikisa we munda, yabalika ndoo haze, yalihandununa njiji jiwana.

¹¹ Jina lia lwiji mutangu Pishone, mwenawo wajingilikile chifuchi cha Hawila. (

¹² Chifuchi chize chikwete oru yibema, ni mawe a ndando yinji, ni maji a vumba libema.)

¹³ Jina lia lwiji wa muchaali Gihone, mwenawo wajingilika chifuchi cha Kushe.

¹⁴ Jina lia lwiji wa muchitatu Tigrise, mwenawo wabalikile ku chivumbuko cha chifuchi cha Asuria, ni wa muchiwana Ufrateze.

¹⁵ Mba Mwene Zambi yanda mutu, yamusa mu munda wa Edene mu kuulima ni kuufunga kanawa.

¹⁶ Yambila mwe mutu ngwenyi: “Unahase kulia mihuko ya mitondo yeswe yize yili mu munda uno,

¹⁷ alioze ku mutondo uze wakuhana mana akunyingika no yibema ni yibi kanda ulia ko. Mumu ha tangwa lize muulia ko, muufwa lume.”

¹⁸ Mba Mwene Zambi yamba nawa ngwenyi: “Kuchabemene mutu kutwama ukawenyi. Mungumulingila chikwashi yoze malifwa nenyi.”

¹⁹ Chenacho awumbile tushitu eswe ni tujila eswe ni mavu. Yaaneha kuli mutu hanga amone chize maaluka. Kashitu ni kashitu, kajila ni kajila, yabwa ni jina lize amulukile kuli mutu.

²⁰ Chenacho mutu alukile majina yimuna yeswe ni tushitu eswe a mu yambu ni tujila. Alioze Samutu kawanyine ko mukachi ko niumwe yoze te malita nenyi.

²¹ Hohene Mwene Zambi yamwaha mwe mutu tulo anji. Muze habomba yamuchiza lupachi umuwika, yasalakanyisa mo musunya.

²² Ni mwe lupachi yoze yatanga pwo, mba yamuneha kuli lunga.

²³ Mba lunga yamba ngwenyi: “Ewaa! Haliabwila yono kali chifwaha cha yifwaha yami, musunya wa ku musunya warni. Jina lienyi pwo, mumu kuli yami lunga anakatuka.”

²⁴ Kashika, lunga makahichika tato ni naye akalinunge ni pwo lienyi, mba ayo aali maabwa mutu umuwika.

²⁵ Ayo eswe aali lunga ni pwo yaabwa uselesele, alioze keevwile ko sonyi.