Ubutukilo 19 - Mukanda Wa Zambi 1970

Shili ya akwa Sodome

¹ Muze tunganda a mwilu haaheta ku limbo lia Sodome chingoloshi, Lote te kanatwama ku chikolo cha chipanga cha limbo. Lote, muze haamona, yakatuka, yaya ni kwabatwiza, yafulamana hashi,

² yaamba ngwenyi: “Lisesa mwane, nyi nunazange, tweyenu kama mu zuwo liami, nusane ku molu hanga nubombe. Mba hamene chichamene munuya mu jila yenu.” Alioze ayo ngwo: “Hi chocho ko, tunabombo hanohene haze.”

³ Lote yaashinjila chikolo, mba yaatayiza kuya mu zuwo lienyi. Lote yalinga mbolo, yaatelekela yakulia yibema, no yaalia.

⁴ Muze ngeji kanda achibomba, malunga a mu Sodome yeeza ni kujingilika zuwo lia Lote. Malunga eswe kwe abwile, chize kuli akweze ndoo kuli tushinakaji.

⁵ Yaatambika Lote, yaamuhula ngwo: “Alihi atu waze anabombo mu zuwo lie ufuku uno? Atuhwise haze hanga tulinge no utumwa.”

⁶ Lote yatuhuka haze, yajila chajilo,

⁷ yaamba ngwenyi: “Akwetu ngunaliumbu, kanda nulinga ungulungulu ubwa haha.

⁸ Nguli ni ana mapwo aali, kanda achilimona ni malunga. Chinalite ngununehe no, hanga nwalinge cheswe chize nunazange. Alioze kanda nulinga nichimwe kuli atu wano. Kaali ngeji jami, Changutamba kwafunga kanawa.”

⁹ Alioze malunga a mu Sodome yaamukumbulula ngwo: “Katuka! Ngwami ni yena uli ngeji hano. Hi yena ko Unahase kutulweza chize chatutamba kulinga. Katuka! Tusele tunjile. Nyi ka, mutukulinga chibi kuhiana wano.” Yaashinjika Lote, yaakundama ha kubula chajilo.

¹⁰ Alioze e ngeji waze yaazoza moko, yaakoka Lote ni kumunjisa mu zuwo, yaajila chajilo.

¹¹ Mba malunga eswe waze abwile haze, yaapwisa tupuputa. Ha chino yaalikatalisa ha kuwana chikolo.

Lote yakatuka mu Sodome

¹² Malunga waze aali yaahula Lote ngwo: “Uli ni usoko we akwo mu limbo lino, ana mapwo, hanji ana malunga, hanji makwe je? Atuhwise mo,

¹³ mumu tunalionona. Mwene Zambi hamona ngwenyi, shili yo yoka naye, kashika hatutuma ha kulionona.”

¹⁴ Mba Lote yaya ni kulweza waze ambile kulimbata ni anenyi a mapwo ngwenyi: “Lipupwisenu nukatuke mu limbo lino, mumu Mwene Zambi kumalionona.” Alioze ayo yaanyonga ngwo, Lote miselo anahanjika.

¹⁵ Chichamene cheswe tunganda a mwilu yaambila Lote ngwo: “Lipupwise! Anda mukwenu pwo ni ana je aali a mapwo, tuhukenu, Nyi ka, munufwa muze Zambi mwonona limbo lino.”

¹⁶ Lote yalaluka ha kutuhuka. Alioze Mwene Zambi yamuvwila keke, yalweza tunganda a mwilu ha kumutuhwisa. Mba yaakwata Lote ni mukwo pwo ni ana jenyi aali a mapwo ku moko, yaatuhwisa mu limbo.

¹⁷ Mba kanganda umuwika yambila Lote ngwenyi: “China lume! Kanda utala kunyima, chibwe kanda ulaluka mu chana, alioze chinyina ku milundu yize, nyi ka, munonga.”

¹⁸ Lote ngwenyi: “Ka, hi chocho ko Mwene wami.

¹⁹ Tala hiwangulingila chibema, hiwangupulula ku kufwa. Alioze chahashile kuchinyina ku milundu, nyi ka, chibi muchinguwana, ngukafwe.

²⁰ Unamono kachihunda kaze kakepe, nyi? Hakamwihi kali, Changutamba nguhete ko. Katalenu, kali kachihunda hakepe lume. Mala! Ngutayize kama hanga nguchinyine mo, hanga chichi kafwa.”

²¹ Kanganda ka mwilu ngwenyi: “Ngunakutayiza ha Chuma chino nawa, chichi kwonona kachihunda kaze.

²² Tambuka, chinyina ko, mumu chahashile kulinga nichimwe ndoo muze hiwaheta ko.” Mumu Lote yamba ngwenyi: kachihunda kaze kakepe, kashika yaluka chihunda chize ngwo, Zoare.

Zambi yonona Sodome ni Gomora

²³ Lote yaheta ku chihunda cha Zoare muze tangwa hiliavumbuka.

²⁴ Mba Mwene Zambi yaholwela fundanga ni kahia ha membo ja Sodome ni Gomora.

²⁵ Yonona membo ni chana chize cheswe, ni atu eswe, ni mitondo ni yambu yeswe.

²⁶ Alioze pwo lia Lote te kanakaula, yatala kunyima, mba yamuluka nguji lia mungwa.

²⁷ Muze hikwacha Abrahama yalimeneka ha kuya nikawashi homa haze amanyine ku meso ja Mwene Zambi.

²⁸ Yatala ku membo ja Sodome ni Gomora, ni ku chana cheswe. Yamona mwishi unafwindangana hashi, ngwe mwishi wa mu lutengo.

²⁹ Muze Mwene Zambi honona membo waze te atwama Lote, yewuluka Abrahama, kashika yalamwina Lote.

Chikota cha mavungu ja Amoabe ni Amone

³⁰ Lote yevwa woma ha kutwama mu chihunda cha Zoare. Kashika yaya ku milundu hamwe ni ana jenyi aali a mapwo, te kaatwama mu chivwenge cha milundu.

³¹ Mwanenyi wa mukulwana Yambila kanuke ngwenyi: “Tata habwa kashinakaji. Mu chifuchi chino kumushi malunga waze mutulimbata no ha kusema ana.

³² Tumunwise tata vinyu yinji, nyi hazenga mba mutulimona nenyi, tuseme nenyi ana ha kufunga vungu lia tata.”

³³ Ha ufuku uzewene yaamwaha vinyu. Mba Mwanenyi wa mukulwana yaya ni kulimona nenyi, alioze tato kanyingikine nichimwe mumu te hazenga.

³⁴ Ha tangwa likwo mukulwana Yambila kanuke ngwenyi: “Zau ufuku ngunakalimona ni tata, chinalite musono tumwehe nawa vinyu yinji. Ha chino ni yena ulimone nenyi, tuseme nenyi ana ha kufunga vungu lia tata.”

³⁵ Ufuku yaamwaha nawa vinyu, mba kanuke yaya ni kulimona nenyi. Tato kanyingikine nawa nichimwe mumu te hazengewa.

³⁶ Chenacho ana a mapwo ja Lote alingile ni tato, mba yaaka ufumba.

³⁷ Mukulwana yasema mwana wa lunga, yamuluka jina ngwenyi, Moabe. Mwe kashakulu ka akwa Moabe.

³⁸ Kanuke neye yasema mwana wa lunga, yamuluka jina ngwenyi Benami. Mwe kashakulu ka akwa Amone.