Ubutukilo 18 - Mukanda Wa Zambi 1970

Zambi yalakenya Abrahama ngwenyi: “Isake makasemuka.”

¹ Mwene Zambi yasolokela Abrahama homa ha kuwayila ku Mamre ku mitondo shene. Tangwa ha muchima Abrahama te kanatwama mu chikolo cha zuwo lienyi lia makubu,

² yahetuka, yamona atu atatu kaanamana kikilii. Mba yanyangumuka ha kwabatwiza, yafulamana hashi,

³ mba yamba ngwenyi: “Mwata, nyi nunazange, kanda nuhiana chichize, ngunanulembe yami kavumbi kenu, hetenu ku mahiami, ngunambe kunuzumbula.

⁴ Ngununehene meya nusane, nuchihwime kama mushi lia mutondo uno.

⁵ Ngununehene yimwe yakulia, muze hinwalia mba munwivwa tachi ja kuya mu jila yenu. Mumu hinwaheta maha yami kavumbi kenu.” Yaamukumbulula ngwo: “Chibema, mwane.”

⁶ Abrahama yanjila fuji mu zuwo, yalweza Sara ngwenyi: “Lulika nikawashi jongo jitatu ja wunga wafufunuka uuchike ulinge yimwe mbolo.”

⁷ Mba yazomboka fuji ku tanga, yakwata mwana ngombe mwovu wa maji, yamuhana kuli ngamba yenyi ngwenyi: “Mushihe, muteleke.” Neye yamuteleka nikawashi.

⁸ Abrahama yanda maji a yamwa, ni yanwa, ni yifwo ya mwana ngombe yoze halulika, yayinangika kulutwe lio. Muze te anali, Abrahama yamana hakamwihi mushi lia mutondo.

⁹ Muze haalia yaahula Abrahama ngwo: “Mukwenu pwo Sara kuli ali?” Abrahama ngwenyi: “Mu zuwo ali.”

¹⁰ Umwe mutu yamwamba ngwenyi: “Mungukahiluka ha mwaka uze muwize ho, mba mukwenu pwo Sara makasema mwana wa lunga.” Kuma te Sara kanamana kunyima lia chajilo, kanevu yeswe yize te anambe,

¹¹ Abrahama ni Sara te habwa kulu tushinakaji kuhiana, Sara te kahashile nawa kusema mwana.

¹² Kashika Sara yaseha ngwenyi: “Hinabwa kulu kashinakaji, kuma mungwivwa nawa kuwaha ha kusema mwana, nyi? Ni mukwetu lunga neye habwa kashinakaji.”

¹³ Mba Mwene Zambi yahula Abrahama ngwenyi: “Kuchi mba Sara unasehe? Mumu yika anahamikina ngwenyi: ‘Hinabwa kuli kashinakaji, munguhasa nawa kusema mwana?’

¹⁴ Kuli chimwe Chuma chize Zambi machisa kenu, nyi? Ngwe chize hinamba kulu ngwami, ha mwaka uze muwiza ho Sara makasema mwana wa lunga.”

¹⁵ Sara yevwa woma mba yalikala ngwenyi: “Chasehele kwami.” Alioze Mwene Zambi ngwenyi: “Ewa, waseha.”

Abrahama yalembela akwa Sodome

¹⁶ Mba malunga waze yaakatuka, yaaya, Abrahama yaashinjikila. Yaaheta ha umwe mulundu haze hasolokela limbo lia Sodome.

¹⁷ Mwene Zambi yalihanjikisa ngwenyi: “Mala, ngunahase kuswekela Abrahama chize ngunambe kulinga, nyi?

¹⁸ Abrahama, vungu lienyi mungukaapwisa akwa lufuma ni akwa ndundo. Akwa hashi eswe kumaakawaha mumu hali iye.

¹⁹ Hinatongola Abrahama hanga akalweze ana jenyi ni vungu lienyi ngwenyi, chaatamba kufunga Shimbi jami, ni kulinga yuma yibema ni ya ululi. Nyi maachilinga mungumanununa yeswe yize namwambile.”

²⁰ Mwene Zambi yamba ngwenyi: “Atu kaakusuma akwa Sodome ni Gomora milonga yinji, shili yo yoka naye.

²¹ Changutamba kuya ngutale nyi chili chamwenemwene, nyi ka.”

²² Mba malunga waze yaakatuka yaatalikisa ku Sodome, alioze Mwene Zambi yasala hamwe ni Abrahama.

²³ Abrahama yahula Mwene Zambi ngwenyi: “Kuma muukonona atu abema hamwe ni yitanguke, nyi?

²⁴ Mu limbo lize, nyi wawana mo atu makumi atano akwa ululi muuhasa kwonona limbo lieswe, nyi? Kuwahashile kwevwila keke mumu hali makumi atano waze, nyi?

²⁵ Kuwahashile kwonona akwa ululi hamwe ni yitanganyanyi. Kuwahashile kuchilinga nichimwe! Nyi wachilinga, kafwa ngwe, washiha akwa ululi hamwe ni yitanguke. Kuchahashile kubwa. Yena ngaji wa akwa hashi eswe, chakutamba kubatula ni ululi.”

²⁶ Mwene Zambi ngwenyi: “Nyi nawana akwa ululi makumi atano mu Sodome, chichi kwonona limbo lieswe.”

²⁷ Abrahama yamba nawa ngwenyi: “Lisesa mwanangana, nguchihanjike nawa yami mutu wamokomoko.

²⁸ Nyi kuli atu makumi atano kwahona atano, muukonona limbo Heswe, nyi?” Mwene Zambi yakumbulula ngwenyi: “Nyi nawano mo akwa ululi makumi awana ni atano, chichi kwonona limbo.”

²⁹ Abrahama yamba nawa ngwenyi: “Hanji muwana mo makumi awana wika.” Mwene Zambi ngwenyi: “Chichi kwonona limbo nyi nawana mo makumi awana.”

³⁰ Abrahama ngwenyi: “Mala! Mwanangana, kanda ungutenukina nyi Hahanjika nawa. Mba nyi wawana mo makumi atatu?” Mwene Zambi ngwenyi: “Nyi nawana mo makumi atatu, chichi kuchilinga.”

³¹ Abrahama ngwenyi: “Mwanangana, ungutayize kama nguhanjike nawa. Ngwami, nyi wawana mo lume makumi aali?” Mwene Zambi ngwenyi: “Chichi kuchilinga.”

³² Abrahama ngwenyi: “Mala! Mwanangana, kanda utenuka kama, chino chisuho cha kusula ngunahanjika. Nyi wawana lume kumi?” Mwene Zambi ngwenyi: “Nyi nawana mo kumi, chichi kwoonona.”

³³ Muze Mwene Zambi hamanununa kuhanjika ni Abrahama, yaya kwenyi. Mba Abrahama yahiluka ku mahienyi.