Ubutukilo 17 - Mukanda Wa Zambi 1970

Ungalami: chinyingi cha Usendo uze Zambi akolesele ni Abrahama

¹ Muze Abrama habwa ni miaka 99, Mwene Zambi yasoloka kuli iye ni kumwamba ngwenyi: “Yami nguli Zambi Mukwa Ndundo Jeswe. Chakutamba kungwononokena ni kuliendela ni yami matangwa eswe.

² Ngunakolesa ne Usendo, mungukokesa vungu lie kuhiana.”

³ Abrama yafulamana hashi, mba Zambi yamba ngwenyi:

⁴ “Ngunakolesa ne Usendo ngwe chino: muukabwa kako ya mavungu anji a hano hashi.

⁵ Jina lie hi Abrama nawa ko, hiliabwa Abrahama. Lino lie mulibwa jina lie mumu hinakupwisa kashakulu ka mavungu anji.

⁶ Mungukakwaha mavungu anji, amwe maakabwa mavungu anene. Mukachi ko akwo maakabwa mianangana.

⁷ “Usendo uno ngunakolesa ni yena ni vungu lie nawa ndoo ku miaka yeswe. Mungukabwa Zambi ye kanda Zambi yo.

⁸ Yena uli njize mu chifuchi chino musono, mungukwaha cho yena ni vungu lie. Chifuchi chino cheswe cha Kanana muchikabwa niche ndoo ku miaka yeswe, mungukabwa Zambi yo.”

⁹ Zambi yambila Abrahama ngwenyi: “Yena ni vungu lie ni waze maakasemuka kulutwe, chanutamba kufunga Usendo uno.

¹⁰ Yena ni vungu lie, lunga mweswe chatamba kumupwisa ngalami.

^11-12 Chize ku tangwa lino, mwana mweswe wa lunga yoze masemuka chatamba kumupwisa ngalami nyi habwa ni matangwa nake. Chatamba nawa kupwisa ngalami mwana mweswe wa lunga wa kuli ndungo jenu, chibwe ndungo waze haanasemuka mu mazuwo jenu, chibwe waze nwalanjile kuli yilambala. Chino che chinyingi ngwo, Usendo uli hakachi ka yami ni yena.

¹³ Lunga mweswe numupwisa ngalami. Chinyingi chino hakachi kenu muchilweza ngwo, nakolesa ne Usendo ndoo ku miaka yeswe.

¹⁴ Lunga chilima, kuchatambile kumwalula nawa mukachi ka atu jami, mumu kafungile Usendo wami.”

¹⁵ Zambi yambila nawa Abrahama ngwenyi: “Mukwenu pwo, kanda umuvuluka nawa ngwe, Sarai, alioze habwa Sara.

¹⁶ Mungumuwahisa, neye makasema mwana wa lunga. Mwe Sara makabwa naye ya mavungu anji. Hakachi ko akwo maakabwa mianangana.”

¹⁷ Abrahama yafulamana, yabutuka kuseha chikolo ngwenyi: “Kuma lunga chibwe habwa ni miaka 100 masema mwana, nyi? Sara chibwe neye habwa ni miaka 99 mahasa kubwa ni mwana, myi?”

¹⁸ Abrahama yaweza ho ngwenyi: “Nyi unazange, Ishmaele anguhinge kama.”

¹⁹ Alioze Zambi ngwenyi: “Hi chocho ko. Mukwenu pwo Sara makasema mwana wa lunga. Ukamuluka ngwe, Isake. Mungukakolesa nenyi Usendo, ni lie vungu lienyi nawa. We Usendo muukalinduluka ndoo ku miaka yeswe.

²⁰ Hakutwala kuli Ishmaele hinakwivwa, hinamuwahisa. Mungukamupwisa semi, mungukamwokesa kuhiana; makasema mianangana kumi ni aali.

²¹ Alioze mungukolesa Usendo ni mwane Isake, mwana yoze Sara makasema mwaka uze muwiza ho.”

²² Muze Mwene Zambi hahanjika maliji wano eswe, yahichika Abrahama, yaya kwenyi.

²³ Tangwa lizeliene Abrahama yapwisa mwanenyi Ishmaele ngalami. Malunga waze asemukine mu zuwo lienyi ni waze akulanda ni mbongo, ni malunga waze te atwama mu zuwo lienyi, eswe yaapwisa ngalami ngwe chize amulwezele Zambi.

²⁴ Abrahama yabwa ni miaka 99,

²⁵ ni mwanenyi Ishmaele te habwa ni miaka 13 muze aapwishile ngalami.

²⁶ Abrahama ni Ishmaele yaapwisa ngalami tangwa limuwika,

²⁷ hamwe ni ndungo jenyi eswe.