Ubutukilo 16 - Mukanda Wa Zambi 1970

Hagare ni Ishmaele

¹ Sarai, pwo lia Abrama, te mumba kwenyi. Alioze yabwa ni ndungo yenyi wa pwo, jina lienyi Hagare, yoze te wakumulingila. Mwana pwo yoze te mukwa Egiptu.

² Mba Sarai yambila Abrama ngwenyi: “Unamono, Mwene Zambi kanguhele mwana niumwe. Yako ulimone kama ni ndungo yami yono, hanji matusemena kama mwana.” Abrama yachitayiza.

³ Mba Sarai yakunjika Hagare kuli Abrama ha kubwa pwo lienyi. (Yuma yino yabwile muze te Abrama hatwama miaka kumi mu chifuchi cha Kanana.)

⁴ Abrama yalimona ni Hagare, neye yaka ufumba. Muze Hagare halimona ngwenyi nguli ni ufumba, yabutuka kulelesa Sarai.

⁵ Mba Sarai yambila Abrama ngwenyi: “Kulelesa chino anangulelesa Hagare, yena wachikoka. Yami mwene nakuhele yono ndungo yami. Chize kuze alinyingikine ngwenyi, nguli ni ufumba, hi keshi kungusa nawa vumbi. Chinalite Mwene Zambi atubatwile.”

⁶ Abrama ngwenyi: “Kuheshi Chuma, yono kali ndungo ye, kali mu moko je. Kashika muulinga cheswe chize unazange.” Hohene Sarai yabutuka kuhungumiona Hagare, mba Hagare yachina kwenyi.

⁷ Kanganda ka Mwene Zambi yatakana ni Hagare mu puya hehi ni shima lia meya lize lili mu jila ya kuya ku Shure.

⁸ Yamuhula ngwenyi: “Hagare, ndungo ya Sarai, kulihi unakatuka? Kulihi unayi?” Hagare ngwenyi: “Ngunachina kaka Sarai.”

⁹ Mba kanganda ka Mwene Zambi ngwenyi: “Hiluka kuli kakenu ukamuzeyele.”

¹⁰ Yamwamba ngwenyi: “Mungukokesa vungu lie, mutu niumwe makahasa kwaalula mumu ha unji wo.

¹¹ Muukasema mwana wa lunga, ukamuluka ngwe: Ishmaele, mumu Mwene Zambi hevwa kulila che,

¹² Alioze mwe mwana yoze makabwa ngwe chimbulu wa mu yambu, makazwela ni atu eswe, atu no maakamuzwelesa. Kechi kutwama ni usoko wenyi, makabwa ha ukawenyi.”

¹³ Hagare ngwenyi: “Ayenwe! Kuma hinamona Zambi, hindu nguchili ni mwono, nyi?” Mba yaluka Mwene Zambi, yoze te anahanjika nenyi, jina ngwenyi, “Zambi Yoze Wakumona.”

¹⁴ Kashika shima lia meya lize, hakachi ka Kadeshe ni Berede, akulivuluka ngwo, “Shima lia Zambi wa Mwono Yoze Wakungumona.”

¹⁵ Hagare yasema mwana wa lunga Abrama yamuluka jina ngwenyi, Ishmaele.

¹⁶ Abrama te habwa ni miaka 86 muze asemene Ishmaele.