Ubutukilo 15 - Mukanda Wa Zambi 1970

Zambi yakolesa Usendo ni Abrama

¹ Mwabwa muze Mwene Zambi yalweza Abrama mu Usolwelo ngwenyi: “Abrama, kanda wivwa woma, yami nguli lukebwe we. Mungukwaha chawana chinene kuhiana.”

² Alioze Abrama yakumbulula nyi: “Mwene Zambi, Chawana chika muchingukwasa? Chishi mwana, ni Eliezere wa ku Damasku makaswana ubite wami.

³ Kuwanguhele mwana niumwe, nyi nafwa kwami, umwe ndungo manguhinga.”

⁴ Abrama yevwa nawa maliji a Mwene Zambi ngwenyi: “Ndungo yono kechi kakuhinga, alioze mwana yoze muukasema yena mwene, mwe makakuhinga.”

⁵ Mba Mwene Zambi yamutwala haze, ngwenyi: “Tala kwilu. Alula matangonoshi, nyi muuhasa. Vungu lie mulikabwa ni atu anji ngwe matongonoshi wano.”

⁶ Abrama yafuliela Mwene Zambi, kashika yamwalwila cho ha ululi.

⁷ Mba Mwene Zambi yambila Abrama ngwenyi: “Nguli Mwene Zambi, nakuchijile ku limbo lia Ure mu chifuchi cha Babilonia ha kukwaha chifuchi chino cha chihinga.”

⁸ Alioze Abrama ngwenyi: “Ngwe kuchi mungunyingika ngwami, munguchihinga?”

⁹ Mwene Zambi ngwenyi: “Ngunehene ngombe wa chihwo, ni pembe wa chihwo, ni kuji a panga, eswe a miaka yitatu. Neha nawa katele ni mwana liembe.”

¹⁰ Abrama yamunehena yimuna yize yeswe, Mba chimuna ni chimuna yachibula yihanda yaali, yaayisa mikala yaali. Alioze tujila kaabwilile ko.

¹¹ Yihungu yeeza ha kulia yifwo yize, alioze Abrama yaahanga.

¹² Muze tangwa himulinjila Abrama te himaya tulo anji. Yabutuka kuchikima, yevwa woma unji.

¹³ Mba Mwene Zambi yamwamba ngwenyi: “Nyingika ngwe, vungu lie maakabwa njize mu chifuchi cha mbala, maakabwa ndungo. E atu jako maakaamwesa lamba miaka 400.

¹⁴ Alioze yami mungukamwesa lamba atu waze maakaabita. Vungu lie muze maakatuhuka mu chifuchi chize, maakaya ni ubite unji.

¹⁵ Alioze yena muukafwa ni ushinakaji wa tachi, mba maakakufunda.

¹⁶ Chisemuko che cha muchiwana maakahiluka nawa ku chifuchi cho, mumu chichi kahuma akwa Amore ndoo muze uvulumwino wo muukoka, mba mungukaamwesa lamba.”

¹⁷ Muze tangwa hilianjila, hikwabwa ufuku, susumuku chishichishi cha kahia chinakakumuka mu lutengo ni soka lia kulekwoka yilibalika hakachi ka yifwo.

¹⁸ Ha shimbu lizeliene Zambi yakolesa Usendo ni Abrama ngwenyi: “Ngunalakenya kuhana chifuchi chino cheswe ku vungu lie, chize ku lwiji ku njiza ya chifuchi cha Egiptu ndoo ku lwiji Ufrateze,

¹⁹ yifuchi ya atu wano eswe: Akene, ni Akenize, ni Akademone,

²⁰ ni Ahite, ni Aperize, ni Arafaime,

²¹ ni Aamore, ni Akanana, ni Agirgashe, ni Ajebuse.”