Ubutukilo 14 - Mukanda Wa Zambi 1970

Abrama yalamwina Lote

¹ Mianangana wano: Amrafele wa ku chifuchi cha Babilonia, ni Arioke wa ku limbo lia Elasare, ni Chedorlaomere wa ku chifuchi cha Elame, ni Tidale, mwanangana wa akwa Goyime,

² eswe awana yaaya ni kwasa jita ni mianangana wano atano: Bera wa ku limbo lia Sodome, ni Birsha wa ku limbo lia Gomora, ni Shinabe wa ku limbo lia Adma, ni Shemebere wa ku limbo lia Zeboime, ni mwanangana wa ku limbo lia Bela (lienalio Zoare).

³ Mianangana waze atano yaalichinga ha kwasa jita ni mianangana waze awana mu chikulo cha Sidime (musono che chitende cha Kufwa).

⁴ Mwanangana yoze Chedorlaomere yayula mianangana waze atano miaka kumi ni yaali, alioze ha mwaka kumi ni wa muchitatu yaamukatukila.

⁵ Ha mwaka kumi ni wa muchiwana Chedorlaomere yeza ni mianangana waze alikunjile nenyi, yaakumba atu wano: akwa Refaime mu limbo lio Ashtarote Karnaime, ni akwa Zuzime mu chifuchi cha Hame, ni akwa Emime mu chana cha Kiriataime,

⁶ ni akwa Hore ha mulundu wo wa Seire. Yaatanga ndoo ku limbo lia Elparane hehi ni puya.

⁷ Mba yaahiluka, yaaheta ku limbo lia Kadeshe (ha matangwa waze te ngwo Enmishpate). Yaakumba mianangana eswe ja akwa Amokele, ni akwa Amore waze atwama mu limbo lia Hazazone Tamare.

⁸ Mba mianangana ja Sodome, ni Gomora, ni Adma, ni Zeboime, ni Bela, yaatuhuka akase jita mu chikulo cha Sidime,

⁹ ni mianangana ja Elame, ni Goyime, ni Babilonia, ni Elasare. Mianangana atano yaasa jita ni mianangana awana.

¹⁰ Mu chikulo chize cha Sidime mwabwile mena anji. Mena waze atu afulile ha kwanda usolososhi. Mba mianangana a membo ja Sodome ni Gomora yaaholokela mo muze te anachina jita. Waze asalile yaachinyina ku milundu.

¹¹ Mianangana waze awana akumbile ku jila yaanjila mu Sodome ni Gomoro yaabuba yuma ni yakulia yeswe, mba yaaya kwo.

¹² Yaakwata nawa Lote, mwana wa mwanakwo ya Abrama, ni yuma yenyi yeswe, mumu neye te mu Sodome atwama.

¹³ Alioze mutu unuwika wachinyine jita, yaya, yalumbunwina Kahebreu Abrama yuma yeswe. Mwe Abrama te kutwama hehi ni mitondo ya umwe mukwa Amore, Mamre, kuze te akuwayila. Mamre ni anakwo Eskole ni Anere yalikunda ni Abrama.

¹⁴ Muze Abrama hevwa ngwo, mwanenyi haamukwata, yakungulula tujita twenyi, waze asemukine mu zuwo lienyi, atu 318, yaakaula mianangana waze ndoo ku norde ku limbo lia Dane.

¹⁵ Ku limbo lize Abrama yaahandununa tujita twenyi. Mba ha ufuku yaasa jita ni mianangana waze, yaakumba, yaahanga ndoo ku limbo lia Hoba, ku norde lia limbo lia Damasku.

¹⁶ Yaatambula yuma yeswe yize mianangana waze abubile, yaatambula nawa mwanenyi Lote ni pwo lienyi ni ye yuma, ni atu akwo ni yuma yo yeswe. Mba ayo eswe yaahiluka kwo.

Melkizedeke yawahisa Abrama

¹⁷ Muze Abrama hakumba mwanangana Chedorlaomere ni mianangana waze abwile nenyi mu jita, te Abrama kanahiluka. Mba mwanangana wa limbo lia Sodome yeza ni kutakana nenyi mu chikulo cha Shave (te kaakuchivuluka nawa ngwo, chikulo cha Mwanangana).

¹⁸ Ni Melkizedeke, yoze wabwile mwanangana munene wa limbo lia Saleme kanda hako wa Zambi Mwilu Mwahiana, yeza nawa ni kubatwiza Abrama, yamumbachila mbolo ni vinyu,

¹⁹ yamuwahisa ngwenyi: “Zambi Mwilu Mwahiana, yoze watangile lilu ni hashi, awahise Abrama.

²⁰ Zambi Mwilu Mwahiana, yoze wakukwashile kukumba akwa kole je, afumane.” Mba Abrama yamwaha Chihanda chimuwika cha ku yihanda kumi ya yuma yeswe yize atambwile mu jita.

²¹ Mba mwanangana wa limbo lia Sodome yambila Abrama ngwenyi: “Yuma yeswe yize hiwatambula mu jita mbata kwe, alioze nguhilwishile atu jami.”

²² Alioze Abrama ngwenyi: “Ni Zambi Mwilu Mwahiana, yoze watangile yuma yeswe,

²³ chichi kutambula Chuma nichimwe kuli yena chibwe Wanda wa hina, chibwe lwoji wa sapato, nyi ka muwamba ngwe: ‘Hinabichisa Abrama.’

²⁴ Chichi kutambula Chuma nichimwe yami mwene alioze ngunatayiza lume yize haalia atu jami, ni atu wano hituna-likundu no, Anere ni Eskole ni Mamre ande yuma yo.”