Ubutukilo 13 - Mukanda Wa Zambi 1970

Abrama ni Lote yaalihandununa

¹ Abrama yatuhuka mu chifuchi cha Egiptu, yahiluka ku sali lia ku sude mu chifuchi cha Kanana, iye ni pwo lienyi ni yuma yenyi yeswe. Lote neye yaya hamwe nenyi.

² Abrama yabwa pichi munene kuhiana. Yabita yimuna, ni prata, ni oru yinji.

³ Yendangana ni kututujoka ndoo yaheta homa haze abwile hatangu, hakachi ka chihunda cha Betele ni chihunda cha Ayi,

⁴ haze atungile chilumbilo. Mba yawayila Mwene Zambi.

⁵ Lote neye te kakwete nawa mazuwo jenyi a makubu, ni mapanga, ni pembe, ni ngombe.

⁶ No kaahashile ko kutwama hamuwika mumu te chifuchi chikepe ni yimuna yo yinji.

⁷ Tufunga twa yimuna twa Abrama ni Lote te kaakuzwela chinji. (Ha matangwa waze akwa Kanana ni akwa Perize te achili mu chifuchi chize).

⁸ Mba Abrama yambila Lote ngwenyi: “Yami nguli tatenu, yena uli mwanami. Kuchatambile yetu hanji tufunga twa yimuna yetu kuzwela.

⁹ Tala chifuchi chino cheswe, kusolo kuchimona, nyi? Tulihandunune. Nyi yena muya ku chimeso, yami munguya ku chindume. Nyi yena muya ku chindume, yami munguya ku chimeso.”

¹⁰ Mba Lote yatala sali ni sali, yamona ngwenyi, chana cheswe chize chakatuka ku lwiji Yordau ndoo ku limbo lia Zoare chili ni meya anji. Chili ngwe munda wa Mwene Zambi, hanji ngwe chifuchi cha Egiptu. (Ha matangwa waze te Mwene Zambi kanda achonona membo ja Sodome ni Gomora).

¹¹ Lote yalitongwela chana cheswe cha Yordau, yakatuka, yatalikisa ku chivumbuko. Chenacho Abrama ni Lote alihandunwine.

¹² Abrama yatwama mu chifuchi cha Kanana. Lote yatunga mu membo a mu chana chize, chakusulangana ni limbo lia Sodome.

¹³ Akwa limbo lize te yingulungulu, yibi yinji alingile lingile ku meso ja Mwene Zambi.

Abrama yatunga ku Hebrone

¹⁴ Muze Lote haya, Mwene Zambi yambila Abrama ngwenyi: “Hetuka utale ku norde ni ku sude, ni ku chivumbuko ni ku chitokelo.

¹⁵ Chifuchi cheswe chize unamono mungukwaha cho, yena ni vungu lie, ndoo ku miaka yeswe.

¹⁶ Mungukokesa vungu lie ngwe masekeseke. Nyi atu maahasa kwalula masekeseke, ni vungu lie nawa kumaahasa kwaalula.

¹⁷ Haliabwila katuka wendese chifuchi cheswe, mumu mungukwaha cho.”

¹⁸ Kashika Abrama yatutulula zuwo lienyi lia makubu, yaya ni kutunga hehi ni mitondo ya Mamre ku limbo lia Hebrone, kuze te atu akuwayila. Yatunga ko chilumbilo cha kuwayila Mwene Zambi.