Ubutukilo 12 - Mukanda Wa Zambi 1970

Mwene Zambi yatambika Abrama

¹ Mwene Zambi yambila Abrama ngwenyi: “Katuka muno mu chifuchi che, hichika usoko we ni limbo lia tatenu, hanga uye mu chifuchi chize mungukulweza.

² Mungukakupwisa vungu linene ni kukuwahisa. Mungukafumanyisa jina lie, mba muukawahisa atu akwo.

³ Mungukawahisa waze maakakuwahisa, mungukashinga waze maakakushinga. Mungukawahisa mavungu eswe a hashi mumu hali yena.”

⁴ Chenacho Abrama akatukile mu limbo lia Harane, yaya ngwe chize Mwene Zambi amulwezele. Lote neye yaya hamwe nenyi. Abrama te habwa ni miaka 75.

⁵ Yanda mukwo pwo Sarai ni Lote, mwana wa mwanakwo, yanda nawa ubite weswe ni ndungo eswe waze abichile mu Harane. Mba yaakatuka, yaaya ku chifuchi cha Kanana. Muze haaheta ku Kanana,

⁶ Abrama yendangana mu chifuchi chize ndoo yaheta hamwe homa ha kuwayila, ku mutondo shene, jina liawo More, mu limbo lia Shekeme. (Ha matangwa waze akwa Kanana te kwenako atwama.)

⁷ Mwene Zambi yasolokela Abrama nikwamba ngwenyi: “Chino che chifuchi mungukahana kuli vungu lie.” Mba Abrama yatunga chilumbilo homa haze, mumu kwenako Mwene Zambi amusolokelele.

⁸ Mwabwamuze yaya ku sude ku milundu yize yili ku chivumbuko cha limbo lia Betele. Yajika ko zuwo lienyi lia makubu, hakachi ka Betele ku chitokelo ni Ayi ku chivumbuko. Yatunga ko nawa chilumbilo.

⁹ Mwabwamuze yakatuka ko, yendangana nikututujoka nikutalikisa ku sali lia sude mu Kanana.

Abrama mu Egiptu

¹⁰ Mu chifuchi cha Kanana mwabwile zala yinji. Kashika Abrama yaya ku sude ndoo ku chifuchi cha Egiptu, akatwame ko.

¹¹ Muze te hakundama akanjile mu Egiptu, yambila mukwo pwo ngwenyi: “Tala, yena uli chileza ku meso.

¹² Muze akwa Egiptu maakumona maamba ngwo: ‘Awu pwo lienyi,’ mba mangushiha yami alioze yena ka.

¹³ Ngunakulembe muwamba ngwe, ‘Nguli ndumbwenyi.’ Ha chino, keechi kungushiha, mungutwama kanawa mumu hali yena.”

¹⁴ Muze haaheta mu Egiptu, akwa Egiptu yaamona mwe pwo kali chileza.

¹⁵ Tuvumbi twa mwanangana yaamumona, yaaya ni kumulweza ngwo, pwo weza ni Abrama cho kubema! Mba yaamwanda, yaamutwala ku zuwo lia mwanangana.

¹⁶ Mwanangana yalingila Abrama yibema mumu hali Sarai. Yakwaha ndungo a malunga ni a mapwo, ni ngombe, ni tumelu, ni yimbulu ni mapanga.

¹⁷ Alioze Mwene Zambi yatumina mwanangana ni akwa zuwo lienyi misongo yibi mumu hatambula pwo lia Abrama.

¹⁸ Mba mwanangana yatuma mutu ha kutambika Abrama. Yamuhula ngwenyi: “Kuchi hiwangulinga chibi chino? Mumu yika kuwangulwezele ngwe: ‘Sarai kali mukwetu pwo?’

¹⁹ Ngunakamutambula ha kubwa pwo liami mumu unakamba ngwe: ‘Kali ndumbwami.’ Haliabwila tambula mukwenu pwo, katukenu!”

²⁰ Mba mwanangana yambila atu jenyi hanga atuhwise Abrama ni pwo lienyi ni yuma yenyi yeswe mu Egiptu, no yaatuhwisa mo.