Ubutukilo 10 - Mukanda Wa Zambi 1970

Vungu lia Noa

¹ Wano e mavungu ja ana ja Noa a malunga, Sheme ni Hame ni Jafete. Muze sanga lia meya hiliahwa yaasemasema ana a malunga.

² Ana ja Jafete a malunga wano: Gomere, ni Magoge, ni Madai, ni Javane, ni Tubale, ni Mesheke, ni Tirase.

³ Ana ja Gomere a malunga wano: akwa Askenaze, ni akwa Rifate, ni akwa Togarma.

⁴ Ana ja Javane a malunga wano: akwa Elisha, ni akwa Espanya, ni akwa Shipre, ni akwa Rodese.

⁵ Wano e tushakulu twa waze atwama mu yifuchi ku mbumbulu ya kalunga lwiji ni mu mahongo. Lino lie vungu lia Jafete, waze atwama jimo ni jimo mu chifuchi cho, nikulita ni liji lio.

⁶ Ana ja Hame a malunga wano: Kushe, ni Egiptu, ni Libia, ni Kanana.

⁷ Mavungu ja Kushe wano: akwa Seba, ni akwa Havila, ni akwa Sabtahe, ni akwa Rama, ni akwa Sabteka. Mavungu ja Rama wano: akwa Sheba, ni akwa Detane.

⁸ Kushe yasema Nimrode, iye mwe chitakame mutangu hano hashi.

⁹ Mwene Zambi yamukwasa nawa kubwa yanga munene wa kushiha yifwo. Kashika atu akwamba ngwo: “Zambi akupwise yanga munene ngwe Nimrode ha kushiha yifwo.”

¹⁰ Mu wanangana wenyi utangu yayula membo wano: Babilone, ni Ereke, ni Akade, eswe atatu a mu chifuchi cha Babilonia.

¹¹ Yakatuka mu chifuchi chize, yaya ni kutunga mu chifuchi cha Asuria. Yatunga membo wano: Ninive, ni Rehobote Ire, ni Kala,

¹² ni Resene, hakachi ka Ninive ni lie limbo linene lia Kala.

¹³ Lino lie vungu lia Egiptu: Lidia, ni Aname, ni Lehabe, ni Naptuhe,

¹⁴ ni Patruse, ni Kashluhe, ni Kaptore, tushakulu twa Afilistia.

¹⁵ Ana ja Kanana a malunga wano: Sidone, mwe mukulwana, ni Hete. Mavungu jo wano: akwa Sidone ni akwa Hete.

¹⁶ Kanana yabwa nawa kashakulu ka mavungu wano: akwa Jebuse, ni akwa Amore, ni akwa Girgashe,

¹⁷ ni akwa Hive, ni akwa Arke, ni akwa Sine,

¹⁸ ni akwa Arvade, ni akwa Zemare, ni akwa Hamate. Mavungu eswe a Kanana yamwangashana mwamwaa ndoo

¹⁹ ku njiza ja Kanana yaaheta ku limbo lia Sidone ku norde, ni ku limbo lia Gerare hehi ni limbo lia Gaza ku sude, ni membo ja Sodome, ni Gomora, ni Adma, ni Zeboime hehi ni limbo lia Lasha ku chivumbuko.

²⁰ Wano e mavungu ja Hame waze atwama vungu ni vungu ku chifuchi cho nikulita ni liji lio.

²¹ Sheme yayo ya Jafete, mwe kashakulu ka akwa Hebreu eswe.

²² Ana ja Sheme a malunga wano: Elame, ni Ashure, ni Arfashede, ni Lude, ni Arame.

²³ Wano e mavungu ja Arame: akwa Uze, ni akwa Hule, ni akwa Getere, ni akwa Mesheke.

²⁴ Arfashede yasema Shela, ni Shela yasema Ebere.

²⁵ Ebere yasema ana aali a malunga. Umuwika jina lienyi Pelege, mumu ha matangwa jenyi akwa hashi yaalihandununa. Mwana mukwo jina lienyi Joktane,

²⁶ Mavungu ja Joktane wano: akwa Almodade, ni akwa Shelepe, ni akwa Hazarmavete, ni akwa Jera,

²⁷ ni akwa Hadorame, ni akwa Uzale, ni akwa Dikila,

²⁸ ni akwa Obale, ni akwa Abimaele, ni akwa Sheba,

²⁹ ni akwa Ofiri, ni akwa Havila, ni akwa Jobaba. Wano eswe mavungu ja Joktane.

³⁰ Chifuchi chize te atwama yichikatuka ku Mesha yichiheta ndoo ku Sefa mu chifuchi cha milundu ku chivumbuko.

³¹ Wano e mavungu ja Sheme, vungu ni vungu mu chifuchi cho, nikulita ni liji lio.

³² Mavungu wano eswe kaali mavungu a Noa nikulita ni chize asemukine ni chize amwanganyine hashi heswe. Akwa hashi eswe kaali mavungu ja ana ja Noa.