Ubutukilo 1 - Mukanda Wa Zambi 1970

Zambi yatanga yuma yeswe

¹ Ha Ubutukilo Mukulu Zambi yatanga lilu ni hashi.

² Hashi habwile te hahululu kanda hamokomoko. Kalunga lwiji yoze te wakufuka yuma yeswe yabwa mu milima bwii, ni fuji ya tachi ya kuli Mukulu Zambi yiihuhwa ha meya.

³ Mukulu Zambi yamba ngwenyi: “Pangu libwe.” Mba pangu yilibwa.

⁴ Mukulu Zambi yamona ngwenyi, pangu linabeme. Mba yahandununa pangu ni milima.

⁵ Yaluka pangu ngwenyi: mwalwa, ni milima ngwenyi: ufuku. Muze hikwacha yilibwa lie tangwa litangu.

^6-7 Mukulu Zambi yamba nawa ngwenyi: “Kuzazuluka chibwe hanga chihandunune meya.” Necho yichibwa. Chenacho Mukulu Zambi atangile kuzazuluka. Necho yichihandununa meya kwilu ni hashi.

⁸ Mukulu Zambi yaluka kuzazuluka ngwenyi: lilu. Muze hikwacha yilibwa tangwa lia muchaali.

⁹ Mba Mukulu Zambi yamba ngwenyi: “Meya waze ali kushi lia lilu aswile muma mumuwika hanga mavu asoloke.” Yichibwa chenacho.

¹⁰ Mavu yaaluka ngwenyi: hashi, kuswa cha meya yachiluka ngwenyi: kalunga lwiji. Mukulu Zambi yachimona ngwenyi, chinabeme.

¹¹ Mba yamba ngwenyi: “Hashi hasoke yambu ni mitondo ya milali yeswe, yize yakwima mbuto ni yize yakwima mawundu nikulita ni milali yayo.” Yichibwa chenacho.

¹² Chenacho hashi hasokele yambu ni mitondo ya milali yeswe yize yakwima mbuto ni yize yakwima mawundu nikulita ni milali yayo. Mukulu Zambi yamona ngwenyi, yize yeswe yinabeme.

¹³ Muze hikwacha yilibwa tangwa lia muchitatu.

¹⁴ Mukulu Zambi yamba nawa ngwenyi: “Mapangu abwe mu che kuzazuluka cha lilu ha kuhandununa mwalwa ni ufuku, ni kulweza yinyingi ya yanga, ni matangwa, ni miaka.

¹⁵ Yibwe mapangu kwilu ha kupangulwisa hashi.” Yichibwa chenacho.

¹⁶ Chenacho Mukulu Zambi atangile mapangu anene aali: tangwa ha kupangulwisa mu mwalwa, kakweji ha kupangulwisa mu ufuku. Yatanga nawa matongonoshi.

¹⁷ Mukulu Zambi yaasa mwilu ha kupangulwisa hashi

¹⁸ mu mwalwa ni mu ufuku, ni kuhandununa pangu ni milima. Mukulu Zambi yamona ngwenyi, yize yeswe yinabeme.

¹⁹ Muze hikwacha yilibwa tangwa lia muchiwana.

²⁰ Mukulu Zambi yamba nawa ngwenyi: “Mu meya muzale ni tushitu a milali yeswe, ni tujila endangane kwilu.”

²¹ Mukulu Zambi yatanga tushitu anene anene a mu kalunga lwiji, ni tushitu a milali yeswe akwo a mu meya, yatanga nawa tujila a milali yeswe. Yamona ngwenyi, yino yeswe yinabeme.

²² Mba Mukulu Zambi yawahisa tushitu, yaamba akaliokese hanga akazalise kalunga lwiji, ni tujila nawa akaliokese.

²³ Muze hikwacha yilibwa tangwa lia muchitano.

²⁴ Mba Mukulu Zambi yamba ngwenyi: “Hashi hokese tushitu a milali yeswe, a ha chihunda ni a mu yambu, anene anene ni akepe akepe, azalise hashi.” Mba yichibwa chenacho.

²⁵ Chenacho atangile tushitu eswe. Yamona ngwenyi, eswe kaanabeme.

²⁶ Mukulu Zambi yamba nawa ngwenyi: “Haliabwila tutangenu atu abwe ngwe yetu ni alifwe ni yetu. Akayule yishi a mu meya, ni tujila, ni tushitu eswe a ha chihunda, ni a mu yambu, anene anene ni akepe akepe.”

²⁷ Mba Muluku Zambi yatanga atu, e atu yaalifwa nenyi. Yaatanga lunga ni pwo.

²⁸ Yaawahisa, yaamba ngwenyi: “Semenu, nuliokese, nuzalise hashi heswe ni kuyula ho. Nuyule yishi a mu kalunga lwiji, ni tujila a mu tetela, ni tushitu eswe akwenda hashi.

²⁹ Mba Mukulu Zambi yamba ngwenyi: “Talenu, ngunanwehe milali yeswe ya mbuto ni ya mawundu, yibwe yakulia yenu.

³⁰ Alioze tushitu eswe a mu yambu, ni tujila eswe, yakulia yo mwambu ni mafwo a wisu.” Yichibwa chenacho.

³¹ Mukulu Zambi yatala yuma yeswe yize atangile, yamona ngwenyi, yinabeme kuhiana. Muze hikwacha yilibwa tangwa lia muchisambano.