Titu 3 - Mukanda Wa Zambi 1970

Kutakamisa ni kutoweza

¹ Iwulula eswe ha kwononokena mianangana ni akwa kuyula. Chaatamba kwononokena ni kululika kulinga yitanga yeswe yibema.

² Kanda ahanjika yibi hali mutu niumwe, alioze abwe akwa uhwimino, ni yimbovu, ni akwa kulweza uhomboloji tangwa ha tangwa kuli atu eswe.

³ Mumu ni yetu nawa, twabwile yihepuke, yihulia, akwa kupianguka. Twabwile ndungo ku usolo ubi ni ku uwahililo weka ni weka. Twabwile akwa shili ni akwa lufwachinda, ni kulivwila kole umwe ni mukwo.

⁴ Alioze, muze utu wa Zambi Chilamwina chetu ni zango lienyi hiyasoloka,

⁵ yatulamwina, hi mumu ha yitanga ya ululi ko yize twalingile, alioze mumu watuvwilile keke. Yatulamwina ku kubemesa cha Mwiku wa Linanga, ku kusemuka chaha ni ku mwono Waha.

⁶ Mumu Zambi, kuli Yesu Kristu Chilamwina chetu, yatuhinjila Mwiku wa Linanga wa kulumbama.

⁷ Hachilinga hanga, ku utu wenyi, atupwise akwa ululi, ni hanga tuhase kutambula mwono wa miaka yeswe, uze twakusa mbunge.

⁸ Lienalio lie liji liamwenemwene. Ngunazange ushindakenye kuhiana ha yikuma yino, hanga waze akufuliela Zambi alalaminye yitanga yibema. Yenayo yinalite ni kukwasa atu.

⁹ Alioze China kuhamika cha uhepuke, ni yeswe yize yakutwala ku majina anji a tushakulu, ni Vunda, ni kulitachika hakutwala ku Shimbi ja Mose. Yuma yino kuyishi kukwasa, yili yamokomoko.

¹⁰ Kanjisa yimwe yisuho yaali yoze wakuhandunyona, mba litune ye.

¹¹ Mumu Unanyingika, mutu ngwe yoze kanapianguka, kanavulumuna, kanalihisa mwene.

Kushika

¹² Muze mungukakutumina Artema hanji Tichiku, ukalipupwisa ni kungutakana ku chihunda cha Nikopoli, mumu hinabatula kutwama ko ha mwaka wa chisika.

¹³ Ulikoleleza kukwasa Zena, ngaji, ni Apolo abutule wenyi wo. Utala kanawa, kanda ahona nichimwe.

¹⁴ Chatamba atu jetu nawa alilongese yitanga yibema, hanga ahase kukwasa waze anahono chamwenemwene.

¹⁵ Eswe waze ali hamwe ni yami kaanakumeneka. Meneka akwetu akwa Kristu. Zambi alweze yenu eswe utu wenyi.