Titu 2 - Mukanda Wa Zambi 1970

Longeso ku mbunga jeka ni jeka

¹ Alioze yena, longesa longeso lize linalite.

² Ambila makulwana a malunga akeyele, abwe ni mana, akaliyule; abwe angunu mu ufulielo, ni mu zango, ni mu uhumikizo.

³ Chizechene nawa ambila makulwana a mapwo abwe ngwe chinalite akwa kulinanga, hi yilamikiji ko, hi akwa kuzengewa ko. Chaatamba kulongesa yuma yibema,

⁴ hanga alongese ana mapwo kuzanga malunga jo ni ana jo,

⁵ abwe akwa kuliyula, akwa mbunge jibema, akwa kufunga mazuwo jo, azeyele kuli malunga jo, hanga mutu niumwe kechi kashililika maliji a Zambi.

⁶ Chimuwika nawa, shinjila ana malunga hanga aliyule.

⁷ Ni yena mwene, mu yuma yeswe Chakutamba kubwa chilweza ha yitanga yibema. Bwako mukwa kulihana ni mbunge yimuwika ku milimo ye.

⁸ Hanjika maliji waze atu kaahashile kulelesa, hanga akwa kole je evwe sonyi mumu kaahashile kutwamba chibi nichimwe.

⁹ Ndungo chaatamba kuzeyela kuli miata jo, ni kwawahisa ha yuma yeswe. Kuchatambile kuhamika no,

¹⁰ kuchatambile kwiya nichimwe. Alioze chaatamba kulisolola abema ni akwa kushishika mu yuma yeswe, hanga atu alemese longeso liakutwala kuli Zambi Chilamwina chetu.

¹¹ Mumu Zambi hanasolola utu wenyi ha kulamwina atu eswe.

¹² Utu uze unatulongesa ha kwehuka yitanga yibi ni usolo ubi wa uutu, tuliyule, tubwe akwa ululi, ni akwa kulinanga hano hashi.

¹³ Utu uze wakutulongesa kushimbwila Tangwa lia uwahililo ku lize twakusa mbunge, muze uhenya wa Mukulu Zambi yetu kanda Chilamwina Yesu Kristu muukasoloka.

¹⁴ Hanalihana iye mwene hali yetu, hanga akatulamwine ku yibi yeswe ni kutupwisa akwa mbunge jibema, atu ja iye mwene wika, akwa tachi ha kulinga yitanga yibema.

¹⁵ Yenayo Chakutamba kulongesa, uyishinjile, ukumike ni chiyulo che cheswe. Mutu niumwe kanda akulelesa.