Titu 1 - Mukanda Wa Zambi 1970

Kumeneka

^1-4 Yami Paulu, kavumbi ka Zambi kanda kanganda ka Yesu Kristu, ngunakusonekena yena Titu, mwanami wamwenemwene mu ufulielo wetu. Zambi hanangutongola ha kukolesa ufulielo wa atu, waze iye mwene hanatongola, ni kwalongesa chinyingi cha umwenemwene cha kuwayila chetu, hanga ase mbunge ku mwono wa miaka yeswe. Zambi, yoze keshi kuhanjika mahuza, hanatulakenya mwono uno shimbu te miaka kanda yichibwa. Zambi, ha tangwa lize atongwele, yasolola longeso lienyi. Longeso lino angukunjikile, ngunaliambujola nikulita ni Shimbi jize anguhele Zambi, Chilamwina chetu. Zambi Tata ni Kristu Yesu, Chilamwina chetu, anulweze utu ni anwehe uhwimino.

Ndako ja akwa lutwe mu Chikungulwila

⁵ Nakuhichikile mu tungu lia Kreta ha kululika yize yahonene, ni kutongola makulwana ja Chikungulwila mu limbo heswe. Iwuluka longeso lize nakulongesele, ngwami,

⁶ mukulwana kuchamutambile kubwa ni kapalia. Chamutamba kubwa lunga wa pwo umuwika. Ana jenyi chaatamba kubwa akwa kufuliela, hi akwa lufuma mubi ko, hi akwa kukolema ko.

⁷ Kuchamutambile kubwa ni kapalia mumu kali mukwa lutwe wa milimo ya Zambi. Hi mukwa kulisuta ko, hi chitenu ko, hi mukwa kuzengewa ko, hi mukwa kulambana ko, hi mukwa lwahu wa mbongo ko,

⁸ alioze mukwa kuzumbula ngeji, mukwa kufwila yibema, mukwa kuliyula, mukwa ululi, mukwa kulinanga, mukwa kusuula.

⁹ Chamutamba kukakaminya ku liji liamwenemwene lize liakulita ni longeso libema. Ngwe chino makahasa kutakamisa akwo ni longeso liamwenemwene, ni kukumika akwa kuhamika.

¹⁰ Mumu kwali anji akwa kukolema ni akwa kwonga, chibichibi mukachi ka Ayuda waze haalumuka ku mbunge. Kaakwonga atu ni maliji jo a uhepuke.

¹¹ Chatamba kubakika makanwa jo, mumu kaakubinjisa mazuwo ni kulongesa chize kuchalitele, ha kufumbula mbongo ni uhenge.

¹² Umwe mukwa Kreta mwene, wa hakachi ka akwa munanyi jo, yamba ngwenyi: “Akwa Kreta kaali akwa mahuza matangwa eswe, tushitu abi, akwa ngwaza, kunyonga cho shina kulia lume.”

¹³ Yize anambe yili yamwenemwene. Kashika chatamba kwakumika ni maliji akalu, hanga abwe ni ufulielo wa tachi.

¹⁴ Kanda abanjika nawa ku yishima yamokomoko ya Ayuda ni ku Shimbi ja atu waze haanapianguka ku umwenemwene.

¹⁵ Kuli abema, yuma yeswe yili yibema, alioze kuli akwa luchisa ni waze keeshi kufuliela, kukushi chibema nichimwe mumu malinjekela jo ni manyonga jo haanabihia.

¹⁶ Kaakwamba ngwo, tunanyingika Zambi; alioze ku yitanga yo, kaakulikala ye. Kaali akwa kuzelwokesa, yihulia, keeshi mana ha kumanununa chimwe chitanga chibema.