Tiangu (Jake) 5 - Mukanda Wa Zambi 1970

Kutoweza pichi

¹ Haliabwila achivwenu yenu pichi, lilenu, bwozonokenu ha lamba lize mulikeza hali yenu.

² Ubite wenu unabolo, mahina jenu haanaliwa kuli yiswa.

³ Oru ni prata jenu jinaliwa ni ngengeya. Ngengeya yize yili chela yoze makanusuma, makalia misunya yenu ngwe chize yakuwema ni kahia. Hinunalitulikila ubite ha matangwa akusula.

⁴ Kunwafwetele fweto ya waze akunulimina minda yenu. Ivwenu kunenganyana cho! Malilo ja waze akuhela mihuko yenu haaneza ndoo ku matwi ja Zambi, Mwene Mukwa Ndundo Jeswe!

⁵ Mu kutwama chenu hano hashi hinunawahilila ni yiwape yeka ni yeka, hinunali kuhiana, hinunabu ni maji anji ngwe tushitu ndoo ha tangwa lize maakaashiha.

⁶ Hinunahisa ni kushiha waze keeshi chitela, no kaahamikine ko nenu.

Uhumikizo ni kulemba

⁷ Akwetu akwa Kristu, lihumukizenu ndoo kwiza cha Mwene Yesu. Talenu chize njimi akulihumikiza ha kushimbwila ndoo muze mavu maakasokesa mihuko yibema. Kaakulihumikiza ndoo ku kunoka cha vula musazu, ndoo ku mubatuko.

⁸ Ni yenu nawa lihumikizenu, litakamisenu, mumu Tangwa lia Mwene Yesu hiliakundama.

⁹ Akwetu, kanda nulinyenyeta ni akwenu. Nyi ka, Zambi makanuhisa. Ngaji hakundama, kali hakamwihi ni kunjila!

¹⁰ Akwetu, iwulukenu akwa munanyi a Zambi waze ahanjikile mu jina lia Mwene Zambi. Kaali chilweza cha uhumikizo mu lamba.

¹¹ Twakwavuluka ngwetu, akwa kuwaha, mumu alihumikijine. Hitunevu hakutwala ku uhumikizo wa Jobe, nunanyingika chize Mwene Zambi amuhele ku songo. Yachilinga mumu kali mukwa utu ni keke.

¹² Ni mwene, akwetu, kanda nulishinga: chibwe ni lilu, chibwe ni hashi, chibwe ni Chuma chikwo nichimwe. Shinoho nyi chili “Ewa”, ambenu lume ngwenu: “Ewa”. Nyi chili “Ka”, ambenu lume ngwenu: “Ka”. Nyi ka, Zambi makanuhisa.

¹³ Nyi umwe hakachi kenu mamona lamba, alembe Zambi. Nyi umwe mawahilila, embe miaso ya kuhalisa nayo Zambi.

¹⁴ Nyi umwe hakachi kenu mayiza, atambike makulwana a Chikungulwila, amulembele Zambi, amuwayise maji mu jina lia Mwene Yesu.

¹⁵ Kulemba chize cha ufulielo muchilamwina mweji, mba Mwene mamuhindwisa ni kumukonekena milonga yize hanavulumuna.

¹⁶ Kashika lishikishilenu milonga yenu, lilembelenu, hanga nuhinduke. Kuliumba cha mukwa ululi tachi jinji chikwete.

¹⁷ Eliya te mutu ngwe yetu. Yalemba ni tachi hanga vula kanda anoka, ni vula kanokene ko hashi miaka yitatu ni Chipinji.

¹⁸ Yalemba nawa hanga vula anoke, mba lilu yiliazuluka, vula yanoka, mba mavu yaatuhwisa mihuko yaho.

¹⁹ Akwetu, nyi umwe hapiasuka mu jila yamwenemwene, mba umwe mamuhilwisa,

²⁰ nyingikenu ngwenu, mutu yoze machiza Chivulumunyi mu jila yibi ni kumuhilwisa mu jila ya ululi, malamwina Chivulumunyi yoze ku kufwa. Zambi neye mamukonekena milonga yenyi.