Tiangu (Jake) 4 - Mukanda Wa Zambi 1970

Kulikata ni akwa hano hashi

¹ Kulihi kwakukatuka kulihamika ni kuzwela hakachi kenu? Yakukatuka ku usolo wenu ubi, uze wakulitachika tangwa ha tangwa mu mijimba yenu.

² Nwakuzanga yuma, alioze kunwahashile kuyitambula, mba nwakunyonga kushiha atu. Nwakwivwa kuzo ya yuma, alioze kunwahashile kuyizuka, mba nwakuzwela ni kulitachika. Kunushi kutambula yize nwakuzanga, mumu kunushi kuyita kuli Zambi.

³ Chibwe nwakuyita kuli Zambi, hindu kunushi kuyitambula, mumu nwakubwa ni manyonga abi. Mumu yuma yize nwakwita, nwakuyita ha kuhwisa usolo wenu ubi.

⁴ Yenu yihulia, kunwanyingikine ngwenu, nyi nwakulikata ni akwa hashi, hinwabwa akwa kole kuli Zambi, nyi? Yoze mazanga kulikata ni akwa hashi, kanalipwisa mukwa kole kuli Zambi.

⁵ Kanda nunyonga ngwenu, Mukanda wa Zambi unahanjika chamokomoko ngwo: “Mwiku wa uutu uze Zambi asele muli yetu, uli ni usolo unji.”

⁶ Alioze Zambi kakutulweza utu wenyi Wahiana. Mumu Mukanda wa Zambi unambe ngwo: “Zambi kakulimika ni akwa kulengumuka, alioze akwa kulilelesa kakwalweza utu wenyi.”

⁷ Kashika Zeyelenu kuli Zambi, limikenu ni Sakwonga, mba manuchina kusuku.

⁸ Kundamenu kuli Zambi, neye makundama kuli yenu. Yenu yivulumunyi, sanyisenu moko jenu. Yenu yilembekese, bemesenu mbunge jenu,

⁹ lungajalenu, nenganyanenu, lilenu. Kuseha chenu chalumuke mahio, uwahililo wenu walumuke chinyengo.

¹⁰ Lilelesenu ku meso ja Mwene Zambi, neye makanulemesa.

Kanda nwamba akwenu yibi

¹¹ Akwetu, kanda nwamba akwenu yibi. Yoze mambila mukwo yibi kanachambila Shimbi, ni kanajibatula. Nyi unabatula Shimbi, hi uli yoze ko wakufunga Shimbi, alioze yoze wakujibatula.

¹² Shina Zambi wika wakuhana Shimbi, neye mwe ngaji. Shina iye mahasa kulamwina hanji kwonona. Yena wakuhisa mukwenu, wakunyonga ngwe uli iya?

Kanda nulizata ni kulisamba

¹³ Haliabwila achivwenu, yenu nwakwamba ngwenu: “Musono hanji hamene mutukaya ku limbo lia Sanganji. Mutukalanda ko yuma mwaka umuwika, mutukafumbula ko, mba mutukabwa ni mbongo jinji.”

¹⁴ Alioze kunwanyingikine chize mwono wenu muukabwa hamene! Nuli ngwe mbundu yize muyisoloka ha shimbu likepe, mba muyitanduluka.

¹⁵ Chanutamba kwamba chino ngwenu: “Nyi Mwene Zambi mapala, mutukabwa ni mwono ni kulinga chikachi ni chinganji.”

¹⁶ Alioze haliabwila nwakulizata ni nwakulisamba. Kulisamba cheswe ngwe chize chili chibi.

¹⁷ Kashika, mutu yoze Unanyingika yibema yize te chamutamba kulinga, alioze nyi keshi kuyilinga, kakuvulumuna.