Tiangu (Jake) 2 - Mukanda Wa Zambi 1970

Kanda nubwa ni katonde

¹ Akwetu, yenu waze nwakufuliela Mwene wetu wa uhenya, Yesu Kristu, kanda nubwa ni katonde.

² Achinyongenu chino, pichi, yoze unazala kazeya ka oru ni mahina abema kuhiana, kananjila mu zuwo lia kuwayila; ni chiswale, yoze unazala yibuzu, kananjila nawa.

³ Nyi nwakulemesa yoze unazala mahina abema nikumwamba ngwenu: “Yena, tweya utwame ha chitwamo chino cha vumbi,” nikwamba chiswale ngwenu: “Yena mana hano,” hanji. “Twama ku molu jami,”

⁴ nyi che nwakulinga, kunushi ni katonde, nyi? Kunushi kubatula ni manyonga abi, nyi?

⁵ Akwetu akwa Kristu, banjikenu! Zambi hanatongola yiswale a hano hashi hanga abwe pichi mu ufulielo, ni maswana mu Wanangana wenyi uze alakenyene waze akumuzanga.

⁶ Alioze yenu nwakulelesa yiswale. Waze akunukwata ni kunukoka ku meso ja ngaji, aya? Hi pichi ko, nyi?

⁷ Hi ayo ko waze akushililika jina libema lize anulukile Zambi, nyi?

⁸ Munulinga chibema nyi munufunga Shimbi ya Wanangana, ngwe chize unambe Mukanda wa Zambi ngwo: “Zanga mwenyembo we ngwe chize wakulizanga yena mwene.”

⁹ Alioze, nyi munubwa ni katonde, munuvulumuna, munuhia ku Shimbi, mba munubwa ni mulonga.

¹⁰ Mumu, chibwe mutu mafunga Shimbi jeswe, hindu mavulumuna yimuwika, mahia ku Shimbi jeswe.

¹¹ Mumu yoze wambile ngwenyi: “Kanda Ulinga utanji,” yamba nawa ngwenyi: “Kanda ushiha mutu.” Kashika, chibwe kuwalingile utanji, alioze nyi washiha mutu, hiwavulumuna Shimbi.

¹² Shimbi yize yakutusula atu mu undungo wa shili muyikanubatwila. Kashika talenu kanawa chize munuhanjika ni chize munulinga.

¹³ Mumu, muze Zambi makabatwila atu, mutu yoze kevwilile ko akwo keke, ni Zambi kechi kamuvwila keke. Alioze yoze te wakuvwila atu keke, Zambi neye makamuvwila keke muze makamubatwila.

Ufulielo ni yitanga

¹⁴ Akwetu, chika muchikwasa nyi mutu mamba ngwenyi: “Ufulielo nguli nawo,” alioze kuushi kusoloka mu yitanga yenyi? Ufulielo uze muuhasa kumulamwina, nyi?

¹⁵ Nyongenu chino: nyi mukwa Kristu wa lunga hanji wa pwo mabwa ni chikala cha mahina, hanji cha yakulia,

¹⁶ mba nyi nwamwamba ngwenu: “Yako kanawa, kanda wivwa chishika, liako kanawa,” nyi kunwamuhele yuma yize ali nayo chikala mumu ha mwono wenyi, chika muchimukwasa?

¹⁷ Chimuwika nawa ni ufulielo, nyi wabwa ukawawo kuushi yitanga, kuuli ufulielo wamokomoko.

¹⁸ Alioze, nyi umwe mamba ngwenyi: “Yena ufulielo uli nawo, ni yami nguli ni yitanga yibema,” mungukumbulula ngwami: “Ngulweze chize ufulielo we muuhasa kubwa, nyi kuushi yitanga yibema, ni yami mungukulweza ufulielo wami ku yitanga yami yibema.”

¹⁹ Unafuliela ngwe, kwali Zambi umuwika, nyi? Chinabeme. Mwiku wa luchisa wakuchifuliela nawa ni wakuchikima ni woma.

²⁰ Yena chihepuke, unazange ngukulweze ngwami, mutu yoze ukwete ufulielo, alioze keshi yitanga yibema, ufulielo wenyi uli wamokomoko, nyi?

²¹ Ngwe kuchi Zambi apwishile Abrahama mukwa ululi? Zambi yachilinga mumu ha yitanga yenyi, muze alambwile mwanenyi Isake ngwe mulambu ha chilumbilo

²² Wamona? Ufulielo wenyi ni yitanga yenyi yibema te yakulinga hamuwika. Ufulielo wenyi yaupwisa ungunu ha yitanga yenyi.

²³ Yuma yize Mukanda wa Zambi unambe yili yamwenemwene, ngwo: “Abrahama yafuliela Zambi, ni mumu ha ufulielo wenyi Zambi yamwalula mukwa ululi.” Mba Zambi yamuluka ngwenyi: “Sepa liami.”

²⁴ Nunamono ngwenu, Zambi keshi kupwisa mutu mukwa ululi ku ufulielo wenyi wika, alioze nawa ku yitanga yibema yize akulinga.

²⁵ Chimuwika nawa ni chitanji Rahabe. Yatambula tunganda twa Israele, yaachinyisa ha kuhiluka ku mahio ku jila yeka. Mba Zambi yamwalula mukwa ululi ha yitanga yibema yize alingile.

²⁶ Mumu ngwe mujimba, nyi kuushi mwiku, kuunafu, chizechene nawa ufulielo, nyi kuushi yitanga yibema, kuunafu.