Tiangu (Jake) 1 - Mukanda Wa Zambi 1970

Kumeneka

¹ Yami, Tiangu (Jake), kavumbi ka Zambi ni ka Mwene Yesu Kristu, ngunanumeneka yenu eswe, yenu atu ja Zambi waze hinunamwangashana hashi heswe.

Ufulielo ni malinjekela

² Akwetu akwa Kristu, wahililenu muze yeseko yeka ni yeka muyinuwana,

³ mumu nunanyingika ngwenu, muze ufulielo wenu muukumba mu yeseko, munubwa ni tachi ja kunyongonona.

⁴ Alioze nyongononenu ndoo ku songo, mba munukabwa amuundu ni angunu, kunuchi kahona nichimwe.

⁵ Alioze, nyi umwe hakachi kenu mahona malinjekela, akete kuli Zambi. Mba Zambi mamwaho, mumu Zambi kakuhana kuli eswe ni kuvungumuna, keshi kuchoka.

⁶ Alioze akete ni ufulielo, kuyambashana ka. Mumu yoze wakuyambashana kalifwa ni mwavu wa kalunga lwiji uze fuji yakuhehula ni kuhungumuka sali ni sali.

⁷ Mutu ngwe yoze kanda anyonga ngwenyi, makatambula chimwe Chuma kuli Mwene Zambi,

⁸ mumu kali ni mbunge jaali, ni kakuyambashana mu yitanga yenyi yeswe.

Uswale ni upichi

⁹ Mukwetu mukwa Kristu, chiswale, awahilile muze Zambi mamulemesa.

¹⁰ Mukwetu mukwa Kristu, pichi, awahilile muze Zambi mamulelesa. Mumu pichi kumakafwa ngwe yitemo ya yibuta ya mu yambu.

¹¹ Tangwa liakuvumbuka ni chivukuminya chalio, kuliakulekamisa chibuta. Chitemo chakuholoka, ni ubeme wacho wakutoka. Chimuwika nawa pichi makatoka muze analingi milimo yenyi.

Lamba ni yeseko

¹² Kawaha mutu yoze wakukumba mu yeseko. Mumu muze hakumba, mabwa ni mwono. Mwono uze uli chawana chize Zambi hanalakenya waze akumuzanga.

¹³ Mutu, nyi hamweseka ni yibi, kanda amba ngwenyi: “Zambi hangweseka ni yibi.” Mumu Zambi kahashile kumweseka ni yibi, ni iye mwene kahashile kweseka niumwe ni yibi.

¹⁴ Alioze, mutu, nyi hamweseka ni yibi, nyingikenu ngwenu, usolo wenyi ubi wamukoka ni wamukwata.

¹⁵ Mba muze usolo ubi muuseseka, muusema uvulumwino, ni muze uvulumwino hiwakola muusema kufwa.

¹⁶ Akwetu akwa Kristu, kanda nulionga.

¹⁷ Yawana yeswe yibema ni yingunu yaakuhulumuka mwilu, yaakwiza kuli Zambi, Tangi wa mapangu a mwilu. Zambi keshi kwalumuka, chibwe keshi kuneha chizulie cha kwalumuka.

¹⁸ Ku upale wenyi mwene, hanatupwisa ni mwono ku tachi ja liji liamwenemwene, hanga tukabwe alemu kuhiana hakachi ka yitanga yenyi yeswe.

Kwivwa ni kulinga

¹⁹ Akwetu akwa Kristu, iwulukenu chino ngwami, mutu mweswe alipupwise kwivwa, alioze abwe makoke kuhanjika, makoke kwivwa wuli.

²⁰ Mumu wuli wa mutu kuushi kukwasa kulinga ululi wa Zambi.

²¹ Kashika mbilenu yuma yeswe ya majilo ni yitanga yeswe ya ungulungulu. Zeyelenu kuli Zambi, tayizenu liji lize akutumba mu mbunge jenu, lize linahase kunulamwina.

²² Kanda nulionga ha kwivwa wika liji lia Zambi, alioze chanutamba nawa kulinga chize linambe.

²³ Mumu yoze wakwivwa liji lia Zambi, alioze keshi kulilinga kalifwa ni mutu yoze unalitalila ha katalilo ni kulimona chize abwa.

²⁴ Ni muze halitala maya kwenyi. Hazehene mavulama chize abwa.

²⁵ Alioze yoze wakuhengula kanawa Shimbi yingunu yize yakututusula ni wakulihana ku yiyo, mutu yoze hi mukwa kwivwa wika ko ni kuyivulama, alioze mukwa kuyilinga. Mutu yoze, Zambi makamuwahisa mu yitanga yenyi.

²⁶ Nyi mutu kakunyonga ngwenyi, kali mukwa kuwayila, alioze keshi kufunga kanwa lienyi, kakuhonga iye mwene. Kuwayila chenyi chili chamokomoko.

²⁷ Uwayilo Ubema ni wamwenemwene ku meso ja Tata Zambi wenau au: kukwasa ana a shiwa ni mapwo waze haanafwisa malunga mu lamba lio, ni kulifunga ku yibi ya hano hashi.