Shimbi 9 - Mukanda Wa Zambi 1970

Akwa kukolema Mwene Zambi

¹ “Yenu Aisraele, banjikenu! Musono nunambe kuzauka Yordau nikuzuka chifuchi cha mavungu anene ni a tachi anuhiana yenu. Membo jo kaali anene ni yipanga yo yisuku ndoo kwilu.

² Atu jako ana ja Anake a malunga, kaataluka, nunanyingika, hinunevu atu nikwamba ngwo: ‘Iya mahasa kwakumba?’

³ Alioze musono munulimwena cho yenwene chize Mwene Zambi matetekela kulutwe lienu ngwe mulengi wa kahia. Mwe makaakumba ku meso jenu, mba munukaanongesa liakulu, ngwe chize alakenyene.

⁴ “Muze Mwene Zambi, Zambi yenu, haahanga ku meso jenu, kanda nulinyonga ngwenu, mumu ha ululi wetu kashika twazuka chifuchi chino; hi chocho ko. Mwene Zambi makahuma atu wano ku meso jenu mumu kaali yingulungulu.

⁵ Hi mumu ha ululi wenu ko, hanji ha mbunge jenu jibema kashika Zambi wanukwasa kuzuka chifuchi cho. Makaahanga mumu kaali yingulungulu, ni mumu kanazange kumanununa chilakenyo chize alakenyene kuli tushakulu twenu Abrahama, ni Isake, ni Yakoba.

⁶ Kashika nyingikenu ngwenu, Mwene Zambi kechi kunwaha chifuchi chino cha chinuno mumu nuli akwa ululi. Ka, nuli akalu.

⁷ “Kanda nuvulama chize nwevwishile Mwene Zambi, Zambi yenu, ufwatulo mu puya. Chize ku tangwa lize nwatuhukile ku Egiptu ndoo ni chize hinwaheta kuno, hinunabu akwa kulimika nenyi.

⁸ Chibwe ku mulundu wa Sinai nwevwishile Mwene Zambi ufwatulo, ufwatulo uze te unalite ni kununongesa.

⁹ Yami yingukanduka ha mulundu ni kutambula mawe haze Zambi asonekene maliji a Usendo uze akolesele ni yenu. Yingutwama ko matangwa makumi awana, chalile chibwe chanwine ko Chuma nichimwe.

¹⁰ Mwene Zambi yangwaha mawe aali haze asonekene ni kwoko lienyi mwene maliji waze ahanjikile kuli yenu mu kahia ha tangwa lize nwakungulukile kwe ku mulundu.

¹¹ Muze matangwa makumi awana haabalika, Zambi yangwaha mawe aali waze asonekene maliji a Usendo.

¹² “Mba Mwene Zambi yangwamba ngwenyi: ‘Katuka, Palumuka nikawashi, mumu atu je, waze watuhwishile mu Egiptu, haalumbuka, haalinga yibi. Haahichika kulu jila yize naalwezele, haalilingila hamba.’

¹³ “Mwene Zambi yangwamba nawa ngwenyi: ‘Tala hinamona atu wano, kaali atu akalu.

¹⁴ Ngweche ngwanongese hanga jina lio litoke lume, mba mungukupwisa tato ya vungu linene ni lia tachi kuhiana wano.’

¹⁵ “Yingutewuluka, yingupalumuka ha mulundu, yingumbata mawe aali a Usendo. Milengi ya kahia yiilekwoka ha mulundu.

¹⁶ Yingumona ngwami, hinwakolema kulu Shimbi yize Mwene Zambi, Zambi yenu, haanwaha ni chize hinwamuvulumuna ha kuzuzulula ngombe wa kuji.

¹⁷ Yingunyasa e mawe aali hashi kwe ku meso jenu, yaabalwoka.

¹⁸ Hohene yingufulamana nawa ku meso ja Mwene Zambi matangwa makumi awana, chalile, ni chanwine Chuma nichimwe. Nalingile chino mumu yenu nwavulumwine Mwene Zambi, nwamuvwishile ufwatulo.

¹⁹ Yingwivwa woma wa ufwatulo wa Mwene Zambi, mumu yamba kununongesa; alioze yangwivwa nawa.

²⁰ Mwene Zambi yevwila nawa Arone ufwatulo, yamba kumushiha. Mba ha shimbu lizeliene yingumulembela nawa.

²¹ Yingwanda Chuma chize chibi hinwazuzulula, ngombe yoze wa kuji, yinguchikonga mu kahia. Mba yinguchifwenya yifwenyufwenyu ni kuyimbila mu chitwetwe chize te chapalumuka ha mulundu.

²² “Yinuvwisa nawa Mwene Zambi, Zambi yenu, ufwatulo muze nwabwile ku Tabera, ni ku Masa, ni ku Kibrote Hatava.

²³ Ni muze nwabwile ku Kadeshe Barnea yanwamba ngwenyi: ‘Yeenu nuzuke chifuchi chize hinanwaha,’ alioze yinukolema Shimbi ja Mwene Zambi, Zambi yenu, kunwamufulielele ko chibwe kumwononokena.

²⁴ Chize ku tangwa lize nanunyingikine, yingunyingika ngwami, nuli akwa kulimika ni Mwene Zambi.

²⁵ “Chenacho nafulamanyine ku meso ja Mwene Zambi matangwa waze makumi awana, mumu yingunyingika ngwami, habatula kulu kununongesa.

²⁶ Yingulemba ngwami: ‘Mwene Zambi, kanda unongesa atu je, atu waze walamwinyine ni watuhwishile mu Egiptu ni ndundo je jahiana.

²⁷ Iwuluka tuvumbi twe Abrahama, ni Isake, ni Yakoba. Kanda walula kama uhulia, ni ungulungulu, ni shili ya Aisraele.

²⁸ Nyi ka, akwa Egiptu maamba ngwo: “Zambi te kakahashile kwatwala mu chifuchi chize aalakenyene, ni mumu te kakwavutwokela kashika haashihila mu puya.”

²⁹ Kaali atu waze watongwele kubwa niee, waze watuhwishile mu Egiptu ni ndundo je jahiana.’ ”