Shimbi 8 - Mukanda Wa Zambi 1970

Kuzuka chifuchi chibema

¹ “Fungenu kanawa Shimbi jeswe jize hinanulongesa musono, hanga nubwe ni mwono, hanga nwoke kuhiana, ni kuzuka chifuchi chize Mwene Zambi alakenyene tushakulu twenu.

² Iwulukenu ngwe chize Mwene Zambi, Zambi yenu anusongwelele mu wenyi uno miaka makumi awana mu puya hanga anuhombole, anweseke ni lamba lieka ni lieka, mba hanga anyingike mbunge jenu, nyi munufunga Shimbi jenyi, nyi ka.

³ Yanuhombola, yanuvwisa zala, yanwaha mana ha kulia, yakulia yize yenu chibwe tushakulu twenu haanga te kanda nuchiyilia kama. Yachilinga ha kunulongesa ngwenyi, mutu kahashile kubwa ni mwono ku mbolo wika, alioze ku maliji eswe waze akuhanjika Zambi.

⁴ Ku miaka yino yeswe makumi awana mahina jenu kaatanukine ko, chibwe molu jenu kaajimbile ko.

⁵ Nyingikenu ngwenu, Mwene Zambi, Zambi yenu, kakunufumba ni kunumwesa lamba ngwe chize tata akufumba mwanenyi.

⁶ Kashika, lingenu ngwe chize Mwene Zambi anuhele Shimbi: fungenu Shimbi jenyi ni kumuvwila woma.

⁷ Mwene Zambi, Zambi yenu, kananutwala mu chifuchi cha chinuno, chifuchi chize chikwete njiji ni mashima a meya, ni njiji kushi lia milundu yize yaakupukumuka meya mu yikulo ni ha milundu.

⁸ Chifuchi chize chakwima tiriku, ni masa, ni vinyu, ni makuyu, ni granade, ni olive, ni wuchi.

⁹ Kunuchi kafwa ko zala hanji kuhona ko chimwe Chuma. Mawe jacho akwete utale, ni ku milundu yacho munuhasa kufula ko unengu.

¹⁰ Munukalia ni kukuta; munukasakwilila Mwene Zambi, Zambi yenu, mumu ha chifuchi cha chinuno chize hanwaha.”

Mose yakanyamisa Aisraele kuchina maavulama

¹¹ “Kanyamenu kuchina munuvulama Mwene Zambi, Zambi yenu, ha kulituna kufunga Shimbi jenyi jize ngunanulongesa musono.

¹² Muze hinwalia hinwakuta, hinwatunga mazuwo abema,

¹³ ni muze hinwabita ngombe ni mapanga anji, hinwabwa ni prata ni oru ni yuma yeswe yikwo yinji,

¹⁴ kanyamenu kanda nukalengumuka nikuvulama Mwene Zambi, Zambi yenu, yoze wanuchijile ku chifuchi cha Egiptu kuze nwabwile ndungo.

¹⁵ Yanusongwela mu puya yinene yakukomwesa muze mwabwile tupela a utende ni tuvwanda. Mu chifuchi chize chumu kuchishi meya, yanutuhwishila meya mu liwe.

¹⁶ Mu puya yanwaha mana ha kulia, yakulia yize tushakulu twenu haanga te kanda achiyilia kama. Yachilinga hanga anuhombole ni anweseke. Ha kusula anuwahise ni yuma yibema.

¹⁷ Kashika, kanda nunyonga nichimwe ngwenu, hinunabichi yino yeswe ku tachi ja yenwene.

¹⁸ Iwulukenu ngwenu Mwene Zambi, Zambi yenu, mwe wakunupwisa pichi. Halinga chino mumu ndoo ni musono kakufunga Usendo uze akolesele ni tushakulu twenu.

¹⁹ Kanda nuvulama nichimwe Mwene Zambi, Zambi yenu, nikutewulukila kuli mazambi eka ni kwawayila ni kwalingila. Ngwamie, nyi nwachilinga, chamwenemwene munukanonga.

²⁰ Nyi kunwononokenene Mwene Zambi, makanunongesa ngwe chize makanongesa mavungu akwo waze munukakumba.”